Search form

NAI VAKATEKIVU 16

Sa soli Eka vei Eparama ko Serai, a sa sucu kina ko Isimeli.

1Ia ko Serai na wati i Eparama sa sega ni vakaluveni vua: a sa dua na nona vada, a yacana ko Eka na yalewa ni Ijipita. 2A sa kaya vei Eparama ko Serai, Raica, sa tarovi au ko Jiova me'u kakua ni vakaluveni: mo la'ki veiyacovi mada kei na noqu vada; de'u na vakaivakawa vua. A sa vakarorogo vei Serai ko Eparama. 3Sa yabaki tini ko Eparama e na vanua ko Kenani, sa qai kauti Eka na nona vada na yalewa ni Ijipita ko Serai na wati i Eparama, a sa solia vei Eparama me watina. 4A rau sa veiyacovi kei Eka ko koya, a sa kunekune ko koya: ia ni sa kila sa kunekune ko koya, sa qai beca na nona marama ko koya. 5A sa kaya vei Eparama ko Serai, Sa bale vei iko na noqu vakacacani: au a solia na noqu vada ki na lomaseremu; ia ni sa kila ko koya sa kunekune, sa qai beci au ko koya: me lewa vei kedaru mada ko Jiova. 6A sa kaya vei Serai ko Eparama, Raica, sa tu ga vei iko na nomu vada; mo kitaka ga vua na ka ko vinakata. Ia ni sa vakararawataki koya ko Serai, sa qai drotani yani mai vua. 7A sa kunei koya na Agilose i Jiova mai na dua na mata-ni-wai mai na vanua liwa, io mai na mata-ni-wai e na sala ki Suri. 8A sa kaya ko koya, I Eka, na vada i Serai, ko sa lako maivei? ko sa lako talega kivei? A sa kaya, Au sa drotaki Serai na noqu marama. 9A sa kaya vua na Agilose i Jiova, Mo lesu tale mada vua na nomu marama, ka vakamalumalumutaki iko vua. 10Sa kaya talega vua ko koya na Agilose i Jiova, Au na vakalevutaka vakalevu na nomu kawa, ka na sega ni wili rawa e na vuku ni kena levu. 11Sa kaya talega vua ko koya na Agilose i Jiova, Raica, ko sa bukete, ko na vakasucuma talega e dua na gonetagane, ia ko na vakayacani koya mada ko Isimeli; ni sa kila na nomu rarawa ko Jiova; 12ia ena tamata kila ko koya; a ligana ena via vakacacana na tamata kecega, kei na liga ni tamata kecega ena via vakacacani koya; ia ena tiko ko koya e na matadra na wekana kecega. 13A sa vakatoka ko koya na yaca i Jiova ka vosa vua, Kemuni na Kalou ka raici au tiko: ni sa kaya, Eke talega ka'u sa sega li ni raici koya ka dauvakaraici au? 14O koya sa vakayacana kina na mata-ni-wai ko ya ko Pierileairoi [Na mata-ni-wai nei Koya sa bula, ko Koya sa raici au]: raica, sa tiko e na maliwa kei Ketesa kei Pereti. 15A sa vaka sucuma vei Eparama ko Eka e dua na luvedrau tagane; ia ko Eparama sa vakayacana na luvena oqo ko Isimeli. 16A sa walusagavulu ka ono na yabaki i Eparama, ni sa sucu na luvena ko Isimeli vei Eka.

Vakavakadewa Makawa

©1974 Bible Society of the South Pacific

More Info | Version Index