Search form

NAI VAKATEKIVU 17

Sa ia tale na veiyalayalati kei Eparama ko Jiova, ka me cilivi ko koya kei na nona kawa, 1-14. Sa vakayacani vou ko Eparama kei Serai, 5,15. Sa yalataki ko Aisake, 15-22. Sa cilivi ko Eparaama kei ira na tagane e nona vale, 23-27.

1Sa ciwasagavulu ka ciwa na yabaki i Eparama, sa qai rairai vei Eparama ko Jiova, a sa kaya vua, Koi au na Kalou Kaukauwa: me dodonu na nomu i valavala vei au, ka mo kakua ni cala: 2ia ka'u na vakayacora na noqu veiyalayalati kei iko, ka vakalewevuqataki iko vakalevu sara. 3A sa cuva vakatoboicu ko Eparama: a sa vosa vua na Kalou, ka kaya, 4Koi au, raica, sa tiko kei iko na noqu veiyalayalati, ia ko na tamadra na matanitu e vuqa: 5ia ena sega ni vakatokai tiko na yacamu ko Eparama, sa na yacamu ga ko Eparaama; ni'u sa lewa vei iko mo tamadra na matanitu e vuqa: 6ia ka'u na vakalewevuqataka sara na nomu kawa, ia ka'u na vakatubura maivei iko na matanitu eso, a ra na tubu maivei iko na tui eso: 7ia ka'u na vakataudeitaka na noqu veiyalayalati kei iko, kei ira talega na nomu kawa, e na nodra i tabatamata kecega, ka me veiyalayalati e tawa mudu, ka me'u sa nomu Kalou, ka me'u nodra Kalou talega na nomu kawa: 8ia ka'u na solia vei iko kei ira na nomu kawa, na vanua ko sa tiko vulagi kina, a vanua taucoko ko Kenani, ka me ra taukena ka tawa mudu; ia ka'u na nodra Kalou.

9Sa kaya talega vei Eparaama na Kalou, Mo vakabauta na noqu veiyalayalati, ko iko, kei ira na nomu kawa era na muri iko, e na nodra i tabatamata kecega. 10Oqo na noqu veiyalayalati kei kemudou, kei na nomu kawa, mo dou vakabauta; Me cilivi mada na nomudou gonetagane kecega. 11Dou ciliva na kuli ni vusomudou; ia sa na kenai vakatakilakila oqo ni noqu veiyalayalati kei kemudou: 12ia ko koya vei kemudou sa bogi walu ena cilivi, na gonetagane kecega e na nomudou i tabatamata kecega; ko koya sa sucu e vale, se voli e nai lavo mai vua na kai tani kece, sa sega ni nomu kawa: 13me cili ga, ko koya sa sucu e nomu vale, kei koya sa voli e na nomu i lavo: ia ena tu e na lewemudou nai vakatakilakila ni noqu veiyalayalati, me veiyalayalati ka tawa mudu. 14Ia na gonetagane sa sega ni cilivi ena vakatatabui sara na tamata ko ya maivei ira na kai nona; sa vakacataka ko koya na noqu veiyalayalati.

15Sa kaya talega vei Eparaama na Kalou, Ko Serai na watimu, mo kakua ni vakatoka na yacana ko Serai, sa na yacana ga ko Sera: 16ia ka'u na vakalougatataki koya, ka solia me sucu mai vua e dua na luvemu tagane; io, ka'u na vakalougatataki koya, ena tubu talega mai vua na matanitu eso; a nodra turaga lelevu na veimataqali ena tubu mai vua.

17A sa cuva vakatoboicu ko Eparaama, ka dredre, ni sa kaya e lomana, Ena sucu beka na gone vua sa qai dua na drau na nona yabaki? ia ena vakasucu beka ko Sera, ni sa qai ciwasagavulu na nona yabaki? 18A sa kaya vua na Kalou ko Eparaama, Me bula mada e matamuni ko Isimeli! 19A sa kaya na Kalou, Ena sucu vakaidina e dua na luvemu-tagane vei Sera na watimu; ia ko na vakatoka na yacana ko Aisake, ia ka'u na vakataudeitaka vua na noqu veiyalayalati me veiyalayalati ka tawa mudu, vei ira na nona kawa era na muri koya. 20Ia ko Isimeli talega, ka'u sa rogoci iko e na vukuna: Raica, ka'u sa vakalougatataki koya, ka na lewe vuqa mai na luvena, ka'u na vakalevutaki koya vakalevu sara: e le tinikarua na turaga ena vakatubura: ia ka'u na vakamatanitulevutaki koya. 21Ia ka'u na vakataudeitaka na noqu veiyalayalati kei Aisake ga, ko koya na luvemu vei Sera o koya ena sucu e na kena gauna e na yabaki sa muri mai.

22A sa mudu ni vosa tiko vua, a sa lako tani vei Eparaama na Kalou.

23A sa kauti Isimeli na luvena ko Eparaama, kei ira kecega era sucu e nona vale, kei ira kecega era voli e na nona i lavo, a tagane kecega vei ira na lewe-ni-vale i Eparaama, a sa cilivi ira e na siga dina ko ya, me vaka ka vosa vua na Kalou. 24A sa ciwasagavulu ka ciwa na yabaki i Eparaama, ni sa cilivi. 25A sa tinikatolu na yabaki i Isimeli na luvena, ni sa cilivi. 26Ia e na siga dina ko ya sa cili ko Eparaama kei Isimeli na luvena; 27kei ira kece na tagane era nona lewe-ni-vale, era sucu e vale, kei ira era voli e nai lavo mai vua na kai tani, era sa cili vata kaya.

Vakavakadewa Makawa

©1974 Bible Society of the South Pacific

More Info | Version Index