Search form

NAI VAKATEKIVU 20

Sa vunitaki watina ko Eparaama, 1,2. Sa tukuna vei Apimeleki na Kalou, ka vakarerea, ni sa kauti Sera ko koya, 3-7. Sa vunauci Eparaama ko Apimeleki, ka vakasukai Sera, ka solia nai yau, 8-16. Sa bula e na masu i Eparaama, 17,18.

1A sa lako tani maikea ko Eparaama ki na vanua ki na Ceva, a sa la'ki tiko e na maliwa i Ketesa kei Suri, a sa tiko vakavulagi mai Kira. 2A sa kaya ko Eparaama e na vuku i Sera na watina, Sa ganequ: a sa talaki ko Apimeleki na tui Kira, ka kauti Sera.

3A sa lako mai kivei Apimeleki na Kalou e na tadra e na bogi, a sa kaya vua, Raica, ko sa vaka na tamata sa mate, e na vuku ni yalewa ko sa kauta; ni sa watina na tamata tani ko koya. 4A sa sega ni veiyacovi kaya ko Apimeleki: a sa kaya ko koya, Noqu Turaga, ko na vakamatea tale beka e dua na matanitu sa sega ni cala? 5sa sega beka ni kaya vei au na tagane, Sa ganequ ko koya? a sa kaya talega na yalewa, Sa ganequ ko koya: sa dodonu na yaloqu, ka sega ni cala na ligaqu, ni'u sa cakava na ka oqo. 6A sa kaya vua e na tadra na Kalou, Io, au sa kila dina ni ko a kitaka na ka oqori ni sa dodonu tiko na yalomu; au a tarovi iko talega koi au mo kakua ni valavala ca vei au: o koya ka'u sega ni laivi iko kina mo tarai koya: 7ia oqo, mo vakasuka na watina na tamata ko ya; ni sa parofita ko koya, ka na masulaki iko, ia ko na bula: ia kevaka ko sa sega ni vakasuka, mo kila ko na mate vakaidina, ko iko kei ira kece na nomu.

8A sa sou e na mataka ko Apimeleki, a sa kacivi ira kecega na nona tamata, ka tukuna na ka kecega oqo vei ira: a ra sa rere vakalevu na tamata. 9A sa kacivi Eparaama ko Apimeleki, ka kaya vua, A cava na ka ko sa kitaka vei keimami? ia a cava na noqu cala vei iko, ko sa vakayacora kina vei au kei na noqu matanitu nai valavala ca levu? ko sa cakava vei au na ka sa sega ni dodonu ni caka. 10Sa kaya talega vei Eparaama ko Apimeleki, A cava ko a kunea, ko sa cakava kina na ka oqo? 11A sa kaya ko Eparaama, Au a kaya e lomaqu, E dina beka era sega ni rerevaka na Kalou ko ira e na yasana oqo; a ra na vakamatei au e na vuku ni watiqu: 12ia ka sa dina ga ni ganequ ko koya; sa luve i tamaqu, ia ka sega ni luve i tinaqu; a sa yaco me watiqu: 13a sa yaco ni sa vakasesei au na Kalou mai na vale i tamaqu, au a qai kaya vua, sa dua na nomu i loloma oqo mo cakava vei au; a veiyasana kecega edaru lako kina mo kaya e na vukuqu, A ganequ ko koya. 14A sa kauta ko Apimeleki eso na sipi, kei na pulumokau, kei na tamata, kei na vada, ka solia vei Eparaama, a sa vakasuka talega vua na watina ko Sera. 15A sa kaya ko Apimeleki, Raica, sa tu e matamu na noqu vanua: a yasana ko vinakata, mo tiko kina. 16A sa kaya vei Sera ko koya, Raica, ka'u sa solia vua na ganemu e dua na udolu na tiki ni siliva: raica, ena nomu ka me tabonaki kina na matamu vei ira kecega era tiko kei iko, kei ira kece na tani: ia sa vunauci ko koya. 17A sa masuta na Kalou ko Eparaama: a sa vakabulai Apimeleki na Kalou, kei na watina kei iratou na nona vada; a ra sa vakasucu. 18Ni ka sogota sara ko Jiova na ketedra kecega na lewe-ni-vale i Apimeleki, e na vuku i Sera, na wati i Eparaama.

Vakavakadewa Makawa

©1974 Bible Society of the South Pacific

More Info | Version Index