Search form

NAI VAKATEKIVU 22

Sa kaya vei Eparaama ko Jiova me vakacabora na luvena, 1,2. A sa vakabauta ko Eparaama; a sa tarova na Kalou; a sa qai vakacabora na sipi mei sosomi ni luvena, 3-14. Sa vosavakalougatataki Eparaama na Kalou, 15-19. A kawa ni tuaka i Eparaama, 20-24.

1Sa oti na ka oqori, sa qai vakatovolei Eparaama na Kalou, a sa kaya vua, I Eparaama. A sa kaya ko koya, Koi au, noqu Turaga2A sa kaya ko koya, Mo kauta mada na luvemu, na luvemu e dua bauga, ko Aisake ko sa lomana, ka lako ki na vanua mai Moraia; ka vakacabori koya kina mei soro kama e na dua na ulu-ni-vanua ka'u na vakatakila vei iko.

3A sa sou e na mataka ko Eparaama, ka vauca nai vodovodo ki na nona asa, ka kauta vata kaya e le rua na nona cauravou, kei Aisake na luvena, ka taya na buka ni soro kama, ka ia, ka lako vaka ki na yasana ka vosa kina vua na Kalou. 4Ia e na kenai katolu ni siga sa ta cake ko Eparaama, ka raica na yasana ni sa vakayawa tu. 5A sa kaya ko Eparaama vei rau na nona cauravou, Drau tikotiko ga eke kei na asa; ia keirau na lako kei na gone ki na yasana ko ya me soro, ka lako tale mai vei kemudrau. 6A sa kauta na buka ni soro kama ko Eparaama, ka tauca vei Aisake na luvena; a sa kauta e ligana na buka sa waqa, kei nai sele: e rau a lako vata ruarua. 7A sa vosa vei Eparaama na tamana ko Aisake, ka kaya, I ratu. A sa kaya, Sa vakaevei, na luvequ. A sa kaya ko Aisake, Sa tu na buka kei na buka sa waqa; ia sa evei mada na lami mei soro kama? 8A sa kaya ko Eparaama, Na luvequ, ena vakarautaka na Kalou e dua na nona lami mei soro kama. A rau a lako vata ruarua tiko.

9A rau a yaco ki na tikina ka vosa kina vua na Kalou; a sa cakava maikina nai cabocabo-ni-soro ko Eparaama, a sa tuva na buka; a sa vesuki Aisake na luvena, ka vakotora ki nai cabocabo-ni-soro e na dela ni buka. 10A sa dodoka na ligana ko Eparaama, ka taura nai sele, ka me vakamatea na luvena. 11A sa kaci vua mai lomalagi ko koya na Agilose i Jiova, a sa kaya, I Eparaama, i Eparaama! A sa kaya, Koi au ga noqu Turaga. 12A sa kaya ko koya, Mo kakua ni dodoka na ligamu vua na gone, ia mo kakua ni kitaka vua e dua na ka: ni'u sa qai kila ko sa rerevaka na Kalou, ni ko sa sega ni bureitaka vei au na luvemu, na luvemu e dua bauga. 13A sa ta cake ko Eparaama, ka rai voli, ka raica, sa tiko mai dakuna e dua na sipi tagane sa tacori e na kau na kenai leu; a sa la'ki taura mai na sipi tagane ko Eparaama, ka vakacabora mei soro kama mei sosomi kei luvena.

14A sa vakatoka na yaca ni tikina ko ya ko Eparaama ko Jiova jaire: me vaka sa kainaki ka yacova na siga oqo, Mai na ulu-ni-vanua ena vakarautaka ko Jiova.

15A sa kaci vakarua vei Eparaama mai lomalagi ko koya na Agilose i Jiova, 16ka kaya, Sa vaka ko Jiova, Au sa bubului ki na yacaqu; ni ko sa cakava na ka oqo, ka sa sega ni bureitaka na luvemu, na luvemu e dua bauga; 17au na vakalougatataki iko vakalevu, ka vakavuqataka vakalevu na nomu kawa me ra vaka na kalokalo ni lomalagi, kei na nuku mai matasawa; ia ena taukena na matamata-ni-koro ni nodra meca ko ira na nomu: 18ena kalougata talega na veimatanitu kecega e vuravura e na nomu kawa; ni ko a vakarorogo ki domoqu.

19A sa lesu tale vei rau na nona cauravou ko Eparaama; a ratou sa cavu tu ka lako vata ki Pieri-sepa: a sa tiko mai Pieri-sepa ko Eparaama.

20Sa oti na ka oqo sa tukuni vei Eparaama, ka vaka, Raica, ko Milika, sa vakasucu gone talega era luvei Neori na tuakamu; 21ko Usa na nona ulumatua, kei Pusa na tacina, kei Kemueli na tama i Erami, 22kei Kiseti, kei Eso, kei Pilitasa, kei Jetilafi, kei Pecueli: 23ia sa luve i Pecueli ko Repeka: ko iratou na lewe walu oqo sa vakasucuma ko Milika, na tamadratou ko Neori na tuaka i Eparaama. 24A watina lailai talega, na yacana ko Reuma, sa vakasucumi Tipa, kei Keama, kei Teasi, kei Meeka.

Vakavakadewa Makawa

©1974 Bible Society of the South Pacific

More Info | Version Index