Search form

NAI VAKATEKIVU 25

A kawa i Eparaama ni sa watina ko Ketura, 1-4. Sa vola na nonai yau, a sa mate, 5-10. A kawa i Isimeli, 12-18. Sa sucu ko Jekope kei Iso, 19-26. Sa volitaka na nonai tutu vakaulumatua ko Iso, 29-34.

1A sa la'ki vakawati tale ko Eparaama, ia na yaca ni yalewa ko Ketura: 2a sa luvedrau ko Simirani, kei Jokisani, kei Mitani, kei Mitiani, kei Isipaki, kei Sua. 3Ia na luve i Jokisani ko Sipa, kei Titana. Ia na luve i Titana, era tagane, ko Asuri, kei Letusi, kei Leumi. 4Ia na luve i Mitiani era tagane, ko Ifa, kei Iferi, kei Enoke, kei Apaita, kei Elitea. Ko ira kece oqo na luve i Ketura.

5A sa solia ko Eparaama na nona ka kecega vei Aisake. 6Ia vei ira na luvedratou na watina lalai, sa solia eso na ka ni loloma ko Eparaama, ni sa bula tiko ka talai ira tani maivei Aisake na luvena, vaka ki na tu-i-cake, ki na vanua vaka isiti.

7Ia na yabaki ni bula i Eparaama, ka bula kina ko koya, sa dua na drau ka vitusagavulu ka lima na yabaki. 8Sa qai ciba ko Eparaama, ka mate yani, ni sa qase vinaka mai, ia sa tamata qase, ka yabaki vuqa sara; a sa toki yani vei ira na kai nona. 9Ia koi rau na luvena ko Aisake kei Isimeli, erau a buluta e na qara-vatu mai Makipila, e nona tiki ni vanua ko Efironi na luve i Soari na Itaiti, sa donui Mamire; 10na tiki ni vanua ka volia ko Eparaama maivei ira na Itaiti: erau sa bulu kina ko Eparaama kei Sera na watina.

11Ia ni sa mate ko Eparaama, sa vakalougatataki Aisake na luvena na Kalou: a sa tiko ko Aisake mai nai keli-wai ko Leai-roi.

12Ia oqo na kawa i Isimeli, na luvedrau ko Eparaama kei Eka, na yalewa ni Ijipita, na vada i Sera: 13ia na yacadra na luve i Isimeli, era tagane, na yacadra me vaka na nodra veimataqali: na ulumatua i Isimeli, ko Nepeioci, kei Kitari, kei Atipieli, kei Mipisami, 14kei Misima, kei Tuma, kei Masa, 15ko Etari, kei Tima, ko Jeturi, ko Nefisi, kei Ketema: 16ko ira oqo na luve i Isimeli, kei na yacadra me vaka na nodra veikoro, kei na nodra i tikotiko; e le tinikarua na turaga me vaka na nodra veivanua. 17Ia na yabaki ni bula i Isimeli, e dua na drau ka tolusagavulu ka vitu na yabaki: a sa ciba ko koya, ka mate yani, ka sa toki yani vei ira na kai nona. 18A ra sa taukena na vanua mai Avila ka kauta ki Suri, ko ya sa donui Ijipita, e na sala vaka ki Asiria: ka sa tiko ko koya me donui ira na wekana kecega.

19Ia oqo na kawa i Aisake, na luve i Eparaama: sa sucu na luve i Eparaama ko Aisake: 20ia sa vasagavulu na yabaki i Aisake, ni sa vakawati kei Repeka, na luve i Pecueli na kai Siria mai Petani-erama, na gane i Lepani na kai Siria.

21A sa vakamasuti Jiova ko Aisake e na vuku ni watina, ni sa yava: a sa rogoci koya ko Jiova, a sa kunekune ko Repeka na watina. 22A rau sa veivala na gone e ketena: a sa kaya ko koya, Kevaka sai koya, a cava ka'u sa vaka kina oqo? A sa la'ki tarogi Jiova.

23A sa kaya vua ko Jiova,

E rua na matanitu sa tiko e ketemu,

Ia e rua na vanua mai na ketemu, erau na tawasei;

Ia ena kaukauwa e dua na vanua ka malumalumu na vanua kadua;

Ia ko koya sa qase ena qaravi koya sa gone.

24Ia ni sa yaco na siga me vakasucu kina, raica, sa drua e ketena. 25A sa sucu mai nai kadua ka sa damudamu taucoko, sa vaka e dua nai sulu vutivuti; a ra sa vakayacani koya ko Iso: 26a sa oti, sa qai sucu mai na tacina, a sa taura tu na bukubuku-ni-yava i Iso na ligana; a sa vakayacani ko Jekope: a sa onosagavulu na yabaki i Aisake ni rau sa sucu.

27A rau sa tubu na gone: a sa yaco me kena dau ni tobo manumanu e yavai va ko Iso, a tamata daulasa mai veikau; ia ko Jekope na tamata dautiko malua, ka sa tiko e na vale laca. 28A sa lomani Iso ko Aisake, ka ni sa daukania na manumanu sa toboka; ia ko Repeka sa lomani Jekope.

29A sa vakasasaqa rourou ko Jekope: a sa lako mai veikau ko Iso, a sa viakana; 30a sa kaya vei Jekope ko Iso, Mo vakani au mada e na rourou damudamu ko ya; ni'u sa viakana: o koya sa vakatokai kina na yacana ko Itomi Damudamu. 31A sa kaya ko Jekope, Mo volitaka vei au edaidai na nomu i tutu ni ulumatua. 32A sa kaya ko Iso, Raica, ka'u sa vakarau mate; ka cava na kena yaga vei au na noqu i tutu ni ulumatua? 33A sa kaya vua ko Jekope, Mo bubului kina vei au edaidai: a sa bubului kina vua; a sa volitaka na nona i tutu ni ulumatua vei Jekope. 34A sa solia vei Iso ko Jekope na madrai, kei na rourou; a sa kana ka gunu, ka cavu tu, ka lako yani. Ia sa beca ko Iso na nonai tutu ni ulumatua.

Vakavakadewa Makawa

©1974 Bible Society of the South Pacific

More Info | Version Index