Search form

NAI VAKATEKIVU 27

Sa vakaroti Iso ko Aisake, 1-5. Sa vakavulici Jekope ko tinana me vakaisini Aisake, 6-17. Sa kauta na kei Aisake ko Jekope, ka sa lasu vei tamana, ka sa vosavakalougatataki kina, 18-29. Sa qai lako ko Iso, a sa rarawa vakalevu ni sa butakoca ko Jekope na vosa ni veivakalougatataki, 30-40. Sa cati Jekope ko Iso, 41. Sa talai tani ko Jekope, 42-46.

1Ia ni sa qase mai ko Aisake, a sa buawa na matana, me sega ni rai rawa, sa qai kacivi Iso na luvena sa ulumatua, a sa kaya vua, Na luvequ. A sa kaya vua, Raica, koi au. 2A sa kaya vua ko Aisake, Raica, ka'u sa qase mai, au sa sega ni kila na siga ka'u na mate kina: 3ia oqo, mo kauta mada na nomu i yaragi, na nomu taga gasau kei na nomu dakai titi, ka lako yani ki na veikau, ka tobo manumanu me qau; 4ka cakava vei au na kakana sa kana vinaka ka'u sa vinakata, ka kauta mai vei au me'u kania; ka me vosavakalougatataki iko na yaloqu, me'u qai mate. 5Ia ko Repeka sa rogoca ni sa vosa ko Aisake kivei Iso na luvena. A sa lako yani ki veikau ko Iso me tobo manumanu, ka me kauta mai.

6A sa vosa vei Jekope na luvena ko Repeka, ka kaya, Raica, ka'u a rogoca ni sa vosa ko tamamu vei Iso na tuakamu, ni sa kaya, 7Mo kauta mai vei au na manumanu sa tobo, ka cakava vei au na kakana vinaka, me'u kana kina, ka vosavakalougatataki iko e na mata i Jiova, me'u qai mate. 8Ia oqo, na luvequ, mo vakarorogo vei au e na ka ka'u sa vakarota vei iko. 9Mo lako mada ki na qele ni me, ka kauta mai vei au e rua na luve ni me vinaka: ia ka'u na vakarautaka me kakana vinaka me kei tamamu, me vaka sa dauvinakata ko koya: 10ia ko na qai kauta vei tamamu, me kania ko koya, ka me vosavakalougatataki iko ni sa bula tiko.

11A sa kaya ko Jekope kivei Repeka na tinana, Raica, ko Iso na tuakaqu, sa tamata vutuvutua, ia koi au, ka'u sa tamata drulua: 12de yamoci au ko tamaqu, ia ka'u na qai vaka na dauveivakaisini vua, ka'u na vakayacora vei au na cudru, ka segai na veivakalougatataki. 13A sa kaya vua ko tinana, Me tau vei au na kena cudru ka me kakua vei iko, na luvequ: mo vakarorogo ga ki na noqu vosa, ka la'ki kauta mai vei au. 14A sa la'ki taura, ka kauta vei tinana: a sa cakava na kakana vinaka na tinana, me vaka na ka sa dauvinakata ko tamana.

15A sa tara ko Repeka nai sulu vinaka ka tu vua e vale, ka nei Iso na luvena ko koya sa qase, a sa vakaisulutaki Jekope na luvena sa gone: 16a sa vakaisulutaka na ligana, kei na domona sa drulua, e na kuli ni me: 17a sa solia vei Jekope na luvena na kakana vinaka, kei na madrai, ka vakarautaka oti ko koya.

18A sa lako vei tamana, ka kaya, Kemuni na tamaqu. A sa kaya ko koya, Raica, koi au; ko cei ko iko, na luvequ? 19A sa kaya vei tamana ko Jekope, Koi au ko Iso na nomu ulumatua; au sa cakava na ka ko ni a kaya vei au: mo ni duri mada, mo ni tiko ka kania na noqu manumanu sa tobo, ka me vosavakalougatataki au na yalomuni.

20A sa kaya vua na luvena ko Aisake, E vakaevei ni ko sa kunea vakatotolo, na luvequ? A sa kaya, Ni sa kauta vakatotolo mai kivei au ko Jiova na nomuni Kalou.

21A sa kaya vei Jekope ko Aisake, Toro mada mai, me'u yamoci iko, na luvequ, se dina ni ko sa luvequ ko Iso, se segai.

22A sa torovi Aisake na tamana ko Jekope; a sa yamoca, a sa kaya, A domona na domo i Jekope, ia na ligana na liga i Iso. 23A sa sega ni kilai koya, ni sa vutuvutua na ligana me vaka na liga i Iso na tuakana: a sa qai vosavakalougatataki koya.

24A sa kaya, Ko iko dina na luvequ ko Iso, se segai? A sa kaya, Sai au ga.

25A sa kaya ko koya, Kauta mai vei au, ka'u na kania na manumanu sa toboka na luvequ, ka me vosavakalougatataki iko na yaloqu. A sa kauta vua, a sa kana: a sa kauta vua na waini, a sa gunu. 26A sa kaya vua ko Aisake na tamana, Toro mada mai, ka reguci au, na luvequ. 27A sa toro, ka reguci koya: a sa boica nai boi ni nonai sulu, a sa vosavakalougatataki koya, ka kaya,

Raica, nai boiboi kei luvequ

Sa vaka nai boiboi ni veiwere sa vakalougatataka ko Jiova:

28Ia me solia ga vei iko na Kalou na tegu kei lomalagi,

Kei na kena vinaka kei vuravura,

Ka levu na sila, kei na waini:

29Me qaravi iko na veimataqali, Ka cuva vei iko na veimatanitu: Mo turaga vei ira na wekamu, Ia me ra cuva vei iko na luve i tinamu; Me cudruvi ko ira era sa cudruvi iko, Ka me ra kalougata ko ira era vosavakalougatataki iko.

30Ia ni sa vosavakalougatataki Jekope ko Aisake, ka sa qai lako tani walega ko Jekope mai vei Aisake na tamana, sa qai tale mai ko Iso na tuakana mai na nona tobo manumanu. 31A sa cakava talega ko koya na kakana vinaka, ka kauta vei tamana, a sa kaya vei tamana, Me duri mada na tamaqu, ka kania na manumanu sa toboka na luvena, ka me vosavakalougatataki au na yalomuni. 32A sa kaya vua ko Aisake na tamana, Ko cei ko iko? A sa kaya ko koya, Koi au na luvemu, na nomu ulumatua, ko Iso. 33A sa sautaninini vakalevu sara ko Aisake, ka kaya, Ko cei beka ko koya sa tobo manumanu, ka kauta mai vei au, ka'u sa kana kece kina, ni ko sa bera mai, ia ka'u sa vosavakalougatataki koya oti? io, ena kalougata ko koya. 34Ni sa rogoca na vosa i tamana ko Iso, sa tagi vakalevu ka qoqolou vakararawa sara, ka kaya vei tamana, Mo vosavakalougatataki au, io koi au talega, na tamaqu! 35A sa kaya, Sa lako vaqaseqase mai ko tacimu, a sa kauta tani na vosa mo vakalougatataki kina. 36A sa kaya ko Iso, Sa sega beka ni vakayacani dina ko koya ko Jekope? ni sa qai vakarua oqo na nona cakacaka vaqaseqase vei au: sa kauta tani eliu na noqu i tutu vakaulumatua; ka raica, sa qai kauta tani oqo na vosa me'u vakalougatataki kina. A sa kaya, Sa sega beka ni vo tiko vei kemuni e dua na vosa me'u vakalougatataki kina?

37A sa vosa vei Iso ko Aisake, ka kaya, Raica, ka'u sa qisi koya me turaga vei iko, ka'u sa soli ira kecega na wekana me qaravi koya; au sa vakaukauwataki koya e na sila kei na waini: ia ka cava me'u qai cakava vei iko, na luvequ?

38A sa kaya vei tamana ko Iso, Sa dua bau li na nomu vosa ni veivakalougatataki, na tamaqu? mo vosavakalougatataki au, io koi au talega, na tamaqu! A sa tabalaka na domona ko Iso, ka tagi. 39A sa vosa ko Aisake na tamana, a sa kaya vua, Raica, na nomu i tikotiko ena yawa mai na kena vinaka kei vuravura, Kei na tegu mai lomalagi: 40Ia ko na bula e na nomu i seleiwau, ka qaravi koya na tacimu; Ia ena yaco ni ko sa kaukauwa, Ko na qai musuka tani na nonai vau mai na domomu.

41A sa cati Jekope ko Iso, e na vuku ni vosa ni veivakalougatataki sa vosavakalougatataki koya kina ko tamana: a sa kaya e lomana ko Iso, Sa voleka na veibogi eda tagicaki tamaqu kina, au na qai vakamatei Jekope na taciqu.

42A sa tukuni vei Repeka na vosa oqo ni nona ulumatua ko Iso. A sa talaki vei Jekope na luvena sa gone, a sa kaya vua, Raica, na tuakamu ko Iso, sa vakacegui koya e na vukumu, ni sa nakita me vakamatei iko: 43Ia oqo, mo vakarorogo mada vei au na luvequ; ka cavu tu, ka dro vei Lepani na ganequ mai Karana: 44ka tiko kaya ka bogi vica walega, ka me oti mada na cudru katakata i tuakamu; 45ka me oti mada vei iko na cudru i tuakamu, a sa guilecava na ka ko sa cakava vua: au na qai talaki vei iko, ka kauti iko maikea: a cava so mo drau yali ruarua kina vei au e na dua na siga?

46A sa kaya vei Aisake ko Repeka, Sa ka rarawa na noqu bula e na vukudra na goneyalewa i Eci: kevaka sa vakawati ko Jekope kei na dua vei ira na goneyalewa i Eci, sa vakataki ira na goneyalewa ni vanua oqo, a cava na kena yaga vei au na noqu bula?

Vakavakadewa Makawa

©1974 Bible Society of the South Pacific

More Info | Version Index