Search form

NAI VAKATEKIVU 30

Sa vuvutaki tuakana ko Rejeli, ka solia na nona vada vei Jekope, 1-8. Sa qai solia na nona vada ko Lia, 9-13. Sa garova ko Rejeli na ka e kunea ko Rupeni, 14-16. Sa vakasucu tale ko Lia, 17-21. Sa vakasucu ko Rejeli, 22-24. Sa gu ki nona vanua ko Jekope: ia sa masuta ko Lepani me tiko ga, a sa yalataka na kenai voli, 25-36. A ka sa cakava ko Jekope me levu kina na nona manumanu 37-43.

1Ia ni sa kunea ko Rejeli ni sa sega ni vakasucu vei Jekope, sa qai vuvutaki tuakana ko Rejeli; a sa kaya vei Jekope, Solia mada vei au na gone, de'u mate. 2A sa cudru sara vei Rejeli ko Jekope: a sa kaya, Koi au beka nai sosomi kei na Kalou, ko koya sa lewa mo kakua ni luvea? 3A sa kaya ko koya, Raica, na noqu vada ko Pila, mo curu vua; ka me vakasucu gone ni'u tenea, ka me'u vakaivakawa talega vua. 4A sa soli Pila na nona vada me watina: a sa mocera ko Jekope. 5A sa kunekune ko Pila, ka vakasucuma na gonetagane na luve i Jekope. 6A sa kaya ko Rejeli, Sa lewa e na vukuqu na Kalou, ka sa rogoca na noqu vosa, a sa solia vei au e dua na gonetagane: a sa vakayacani koya kina ko Tani. 7A sa kunekune tale ko Pila na vada i Rejeli, a sa vakasucuma nai karua ni luvedrau kei Jekope. 8A sa kaya ko Rejeli, Au sa veiqati sara kei tuakaqu, ia ka'u sa gumatua: a sa vakayacana ko Nafitalai.

9Ia ni sa kunea ko Lia ni sa cegu ni vakasucu, sa kauti Silipa na nona vada, a sa solia vei Jekope me watina. 10A sa vakasucuma e dua na luvedrau tagane kei Jekope, ko Silipa na vada i Lia. 11A sa kaya ko Lia, Sa lako mai na vinaka. A sa vakayacani koya ko Kata. 12A sa vakasucuma nai karua ni luve i Jekope ko Silipa na vada i Lia. 13A sa kaya ko Lia, Au sa kalougata, ni ra na vosavakalougatataki au na goneyalewa: a sa vakayacani koya ko Aseri.

14A sa lako voli yani ko Rupeni e nai tabayabaki sa tamusuki kina na witi, a sa kunea eso na tuta mai na veico, a sa kauta mai kivei Lia na tinana. A sa kaya vei Lia ko Rejeli, Mo solia mada vei au eso na nona tuta na luvemu. 15A sa kaya vua ko koya, E ka lailai beka ni ko sa kauta tani na watiqu? ia ko sa via kauta talega na nona tuta na luvequ, oi? A sa kaya ko Rejeli, Ia drau na moce vata kaya e na bogi oqo ka me qau na nona tuta na luvemu. 16A sa tale mai na veico ko Jekope e na yakavi, a sa la'ki tavaki koya ko Lia, ka kaya, Ko na mai moceri au; ni'u sa voli iko dina ga e na nona tuta na luvequ. A sa moce kaya ko koya e na bogi ko ya.

17A sa rogoci Lia na Kalou, a sa kunekune ko koya, a sa vakasucuma na kenai kalima ni luvedrau tagane kei Jekope. 18A sa kaya ko Lia, Sa solia vei au na Kalou na ka ka'u a volia, ni'u a solia na noqu vada vua na watiqu: a sa vakayacani koya ko Isakari. 19A sa kunekune tale ko Lia, a sa vakasucuma na kenai kaono ni luvedrau tagane kei Jekope. 20A sa kaya ko Lia, Sa solia vei au na Kalou nai loloma vinaka; sa na qai via tiko vata kei au na watiqu, ka ni'u sa vakasucuma e le ono na luvena tagane: a sa vakayacani koya ko Sepuloni. 21Ia emuri, sa vakasucuma e dua na luvena yalewa, a sa vakayacani koya ko Taina.

22A sa nanumi Rejeli na Kalou, a sa rogoci koya na Kalou, ka vakarawarawataka vua me vakasucu. 23A sa kunekune ko koya, ka vakasucuma e dua na luvena tagane; a sa kaya, Sa kauta tani na noqu madua na Kalou: 24a sa vakayacani koya ko Josefa; a sa kaya, Me kuria tale vei au e dua na luvequ tagane ko Jiova.

25Ia ni sa vakasucumi Josefa ko Rejeli, sa qai kaya vei Lepani ko Jekope, Mo laivi au me'u lako ki na noqu yasana, kei na noqu vanua: 26Mo solia na watiqu kei na luvequ, ko iratou ka'u sa qaravi iko kina, ka me'u lako: ni ko sa kila na noqu cakacaka ka'u sa cakava vei iko.

27A sa kaya vua ko Lepani, Kevaka ko sa lomani au, mo tiko ga: ni'u sa kila vinaka sa vakalougatataki au ko Jiova e na vukumu. 28Sa kaya talega ko koya, Tukuna vei au na kemui sau, ka'u na solia.

29A sa kaya ko koya, ko sa kila na noqu i valavala ni'u sa qaravi iko, kei na kena tiko vinaka na nomu manumanu vei au: 30ni sa lailai na nomu ka ni'u a bera ni lako mai, a sa qai tubu me ka levu; ka sa vakalougatataki iko ko Jiova ni ka'u sa tiko eke: ia oqo, ka'u na vakarautaka ninaica na nodra ka na noqu lewe ni vale talega?

31A sa kaya ko koya, A cava me'u solia vei iko? A sa kaya ko Jekope, E sega na ka mo solia vei au: kevaka ko na cakava vei au na ka oqo, ka'u na vakania ka vakatawa tale na nomu qele ni manumanu: 32au na lako e loma ni nomu qele ni manumanu kecega e na siga edaidai, ka kauta tani maikina na manumanu kecega sa tavukadikadiri se sa tavutonotono, kei na sipi yadua sa loaloa, kei na me sa tavutonotono se sa tavukadikadiri; ia ko ira sa vakaoqo emuri ena kenai sau vei au. 33Ia ena qai rairai vei iko e na gauna maimuri na noqu i valavala dodonu, ni ko sa la'ki raica na qau i sau: na me kecega sa na kune vei au, sa sega ni tavu kadikadiri se tavutonotono, se na sipi sa sega ni loaloa se damudamu sa macala sa butakoci.

34A sa kaya ko Lepani, Raica, e vinaka vei au ke sa vaka na nomu vosa.

35A sa kauta tani ko koya e na siga ko ya na me tagane sa vola koso ka tavutonotono, kei na me yalewa sa tavukadikadiri se tavutonotono, oqori kecega sa vulavula vakatikina, kei na sipi loaloa kecega, ka sa solia kivei iratou na luvena. 36A sa lewa me rau veiyawaki kei Jekope na kena yawa e lakovi rawa e na siga e tolu: a sa vakania ko Jekope na kena vo ni qele ni manumanu i Lepani.

37A sa taura ko Jekope na taba ni popila, kei na taba ni amodi kei na ivi ni papalagi; a sa karia na kulina vakatikina me rairai na vulavula e na taba ni kau: 38ia na taba ni kau sa karia oti, sa viritura e na mata ni qele ni manumanu e nai gunugunu, e na tikina ka lako mai kina na qele ni manumanu me gunu; ni ra daukunekune ni ra lako mai me gunu. 39A sa kunekune na qele ni manumanu e na mata ni taba ni kau, a sa vakasucuma na manumanu e vola koso, ka tavukadikadiri, ka tavutonotono. 40A sa wasea tani ko Jekope na lami, a sa vaqara na mata ni sipi vaka ki na vola koso, kei na sipi loaloa kecega e na qele ni manumanu nei Lepani: a sa kauta na nona qele ni manumanu me tiko vakai ira, ka sega ni kauta me tiko kei na manumanu i Lepani. 41A sa yaco ni sa kunekune na manumanu kaukauwa, sa qai viritura na taba ni kau ko Jekope e na mata ni manumanu e nai gunugunu ka me ra kunekune e na maliwa ni taba ni kau. 42Ia ni sa malumalumu na manumanu, sa sega ni viritura kina: a sa yaco me nei Lepani na ka malumalumu, ka nei Jekope na ka kaukauwa. 43A sa vutuniyau vakalevu sara na tamata ko ya, a sa ka levu na nona manumanu, kei na nona vada, kei na tamata, kei na kameli, kei na asa.

Vakavakadewa Makawa

©1974 Bible Society of the South Pacific

More Info | Version Index