Search form

NAI VAKATEKIVU 32

Sa rairai vei Jekope eso na agilose, 1,2. Sa talaki vei Iso ko koya, 3-6. Sa rerevaki Iso, 7,8; a sa masuta kina na Kalou, 9-12. A nona ka ni loloma vei Iso, 13-23. Sa veimoqe kaya e dua na agilose, 24-32.

1A sa lako tu e nona sala ko Jekope, a ra sa sota kaya na agilose ni Kalou. 2Ia ni sa kunei ira ko Jekope, sa kaya, Oqo na matai valu ni Kalou. A sa vakatoka na yaca ni yasana ko ya ko Meeneimi [A matai valu e rua].

3A sa tala na mata ko Jekope me liu yani kivei Iso na tuakana, ki na vanua ko Sia, ki na vanua i Itomi. 4A sa vakaroti ira, ka kaya, Dou vosa vakaoqo vua na noqu turaga ko Iso; Sa kaya vakaoqo na nomu tamata ko Jekope, Au tiko vulagi vei Lepani, ka'u sa dede kina, ka yacova na gauna oqo: 5a sa tu vei au na pulumokau, kei na asa, na sipi, kei na tamata, kei na vada: ia ka'u sa qai talatala me'u tukuna vua na noqu turaga, ka me'u kune loloma vei iko.

6A ra sa lesu mai kivei Jekope nai talaki, a ra kaya, Keitou a lako vua na tuakamu ko Iso, a sa lako talega mai ko koya me mai tavaki iko, kei ira vata kaya na tamata e lewe va na drau.

7A sa rere vakalevu ko Jekope, a sa kidroa: a sa wasea rua na tamata era tiko kaya, kei na qele ni sipi, kei na pulumokau, kei na kameli; 8ni sa kaya, Kevaka sa lako mai ko Iso ki na dua nai vavakoso, ka mokuta, ena qai dro bula nai vavakoso kadua.

9A sa kaya ko Jekope, Na Kalou ni tamaqu ko Eparaama, kei na Kalou talega i Aisake na tamaqu, kemuni Jiova, ko ni a kaya vei au, Mo lesu ki na nomu vanua, ka vei ira na wekamu, ka'u na caka vinaka vei iko: 10au a sega ni yaga me'u rawata e dua na ka lailai e na nomuni loloma kecega, kei na nomuni vosa dina, ko ni sa cakava vei au na nomuni tamata; ni'u a qalo-kosova na Joritani oqo kei na noqu i titoko wale; ia ka'u sa qai tubu me rua nai vavakoso: 11au masuti kemuni, mo ni vakabulai au mada mai na liga i Iso na tuakaqu: ni'u sa rerevaki koya, de sa lako mai ko koya ka mokuti au, kei ira vata na gone kei na tinadra: 12Ia ko ni a kaya, Ka'u na caka vinaka vakaidina vei iko, ka vakatubura na nomu kawa me ra vaka na nuku mai matasawa, sa sega ni wili rawa ni ra sa lewe vuqa.

13A sa moce maikea e na bogi ko ya: a sa taura mai na ka sa tiko vua me ka ni loloma vei Iso na tuakana; 14e rua na drau na me yalewa, ka ruasagavulu na me tagane, e rua na drau na sipi yalewa ka ruasagavulu na sipi tagane, 15e tolusagavulu na kameli yalewa kei na luvedra, e vasagavulu na pulumokau yalewa, ka tini na pulumokau tagane, ruasagavulu na asa yalewa, ka tini na luve ni asa. 16A sa solia kivei ira na nona tamata, me lako vakai koya na qele ni manumanu yadua; a sa kaya vei ira na nona tamata, Dou liutaki au yani, ka me veiyawaki na qele ni manumanu e dua kei na qele ni manumanu e dua. 17A sa vakarota vua sa liu, ka kaya, Ni sa sota kei iko ko Iso na tuakaqu, ka tarogi iko, A nei cei ko iko? ka ko sa lako kivei? ka nei cei na ka oqo sa liutaki iko? 18mo qai kaya, A nei Jekope na nomuni tamata; oqo nai loloma sa kau vua na noqu turaga ko Iso: ka raica, sa muri keitou talega ko koya. 19A sa vakarota nai karua talega, kei nai katolu, kei ira kecega era muria na qele ni manumanu, a sa kaya, Dou vosa vakaoqo vei Iso, ni dou sa veikune kaya: 20ia dou kaya talega, Raica, sa muri keitou mai ko Jekope na nomuni tamata. Ni sa kaya ko koya, Au na vakayalovinakataka e na ka ni loloma sa liu yani, ia emuri ka'u na raica na matana; de sa vinakati au beka ko koya.

21A sa kau yani eliu na ka ni loloma: a sa tiko vata kei ira ko koya e na bogi ko ya. 22A sa cavu tu ko koya e na bogi ko ya, ka kauti rau na watina, kei rau na nona vada, kei iratou na luvena tagane e le tinikadua, ia sa vutokosova na uciwai ko Japoki: 23A sa kauti ira, ka talai ira me ra vutokosova na uciwai, ia sa tala ki tai kadua na nona ka.

24A sa tiko duadua ko Jekope; a sa veimoqetaki kaya e dua na tamata ka yacova na kida ni mataka. 25Ia ni sa kunea ko koya sa sega ni gumatua vua, sa tara na veiuturi ni dibina; a sa mavule na veiuturi ni dibi i Jekope, ni sa veimoqe tiko kaya. 26A sa kaya ko koya, Mo laivi au mada me'u lako, ni sa kida na mataka. A sa kaya ko Jekope, Au na sega ni laivi iko, kevaka ko sa sega ni vosavakalougatataki au mada. 27A sa kaya vua ko koya, Ko cei na yacamu? A sa kaya, Ko Jekope. 28A sa kaya, Ena sega tiko ni yacamu ko Jekope, ko Isireli ga: ni ko sa kaukauwa vua na Kalou kei ira na tamata, ka ko sa gumatua. 29A sa taroga ko Jekope, Mo ni tukuna mada mai vei au na yacamuni. A sa kaya ko koya, A cava ko sa taroga kina na yacaqu? A sa vakalougatataki koya maikea. 30A sa vakatoka ko Jekope na yaca ni yasana ko ya ko Penueli [A mata ni Kalou]: ni keirau sa veikune kei na Kalou, ia ka'u sa bula tiko.

31A sa cadra vua na mata-ni-siga ni sa lako tani mai Penueli, a sa lokiloki tiko e dibina. 32O koya era sega ni kania kina na ua mai na veiuturi ni dibi ko ira na Isireli, ka yacova na gauna oqo: ni sa tara ko koya na ua mai na veiuturi ni dibi i Jekope.

Vakavakadewa Makawa

©1974 Bible Society of the South Pacific

More Info | Version Index