Search form

NAI VAKATEKIVU 34

Sa vaqasei Taina ko Sikemi, ka kerea me watina, 1-12. Sa kaya ko ira na luve i Jekope me ra cilivi na kai Sikemi, 13-17. Sa vinakata ko ira, 18-24. Sa samuta na koro koi rau na luve i Jekope, 25-31.

1Ia ko Taina, e dua na goneyalewa, na luve i Lia, kei Jekope, sa lako voli yani me raici ira na goneyalewa ni vanua ko ya: 2A sa raica ko Sikemi na luve i Amori na Aivaiti, na turaga ni vanua ko ya, a sa kauta, ka moce vata kaya, ka vaqasea. 3A sa vinakati Taina vakalevu na luve i Jekope, a sa lomani koya na goneyalewa, ka vosa vakayalololoma vua na goneyalewa. 4A sa vosa vei Amori na tamana ko Sikemi, ka kaya, Mo segata mada na goneyalewa oqo me watiqu. 5A sa rogoca ko Jekope ni sa vaqasei Taina na luvena ko koya: a ra sa tiko na luvena tagane kei na manumanu mai na veico; a sa tiko lo ko Jekope ka me ra tale mada mai.

6A sa lako yani vei Jekope ko Amori na tama i Sikemi, me rau veivosaki kaya. 7A ra sa lako mai na veico na luve i Jekope ni ra rogoca: a ra sa rarawa na tamata, ka cudru vakalevu, ka ni sa kitaka na ka lialia vei Isireli ko koya, ni sa mocera na luve i Jekope; a ka sa sega ni dodonu me caka.

8A sa veivosaki kei ira ko Amori, ka kaya, Sa guta na nomuni goneyalewa na yalona na luvequ: au masuti kemuni mo ni musuka vua me watina: 9ia me da veimusumusukitaki ira na luveda me ra vakawati, mo ni musuka na nomuni goneyalewa vei keimami, ka kauta na neimami goneyalewa vei kemuni: 10ka mo ni tiko ga kei keimami: sa koto e matamuni na vanua; mo ni tiko ka veivoli kina, ka rawata kina nai yau. 11A sa kaya ko Sikemi vua na tama ni goneyalewa kei ira na ganena, Me'u kune loloma mada e matamuni, ia na ka kemuni sa cavuta ka'u na solia: 12me ka levu sara nai yau kei nai solisoli kemuni na cavuta vei au, ia ka'u na solia me vaka na ka kemuni na cavuta vei au: ia mo ni musuka ga na goneyalewa me watiqu.

13Ia ko ira na luve i Jekope, era sa vosa vaqaseqase vei Sikemi kei Amori na tamana, ni sa vaqasei Taina na ganedra: 14a ra sa kaya vei rau, E dredre ni keitou cakava na ka oqo, ka me musuka na gane i keitou ki na tamata sa sega ni cilivi; ni sa rogo ca vei keitou. 15E na ka duaduaga oqo keitou na rogoci kemudrau: Kevaka kemuni na vakataki keitou, ka me cili na nomuni tagane kecega; 16keitou na qai musuka na neitou goneyalewa vei kemuni, ka kauta na nomuni goneyalewa vei keitou, keitou na tiko talega kei kemuni, ia eda na dua vata ga: 17ia kevaka kemuni na sega ni rogoci keitou, mo ni cili; keitou na qai kauti koya na neitou goneyalewa, ka lako.

18A sa vinakata na nodra vosa ko Amori, kei Sikemi na luve i Amori. 19A sa sega ni berabera na cauravou ni kitaka na ka ko ya, ka ni sa rekitaki koya na luve i Jekope: ka sa tamata yalovakaturaga vei ira kecega e na mataqali i tamana. 20A sa lako ko Amori kei Sikemi na luvena ki na nodrau matamata-ni-koro, ka vosa vei ira na lewe ni nodrau koro ka kaya, 21Ko ira na tamata oqo era tiko malua ga kei keda; me ra tiko ga e na vanua, ka veivoli kina; ka raica, sa levu na vanua me rauti ira; me da vakawati mada kei na nodra goneyalewa, me da musuka talega na noda goneyalewa vei ira: 22e na ka ga oqo era na rogoci keda na tamata, me tiko kei keda, me da tamata vata, kevaka sa cili na tagane kecega vei keda, me vaka era sa cilivi: 23Ena qai sega li ni noda na nodra manumanu, kei na nodra i yau, kei na nodra pulumokau kece? me da vakarorogo ga vei ira, era na qai tiko kei keda. 24A ra sa vakarorogo vei Amori kei Sikemi na luvena ko ira kecega era curu yani e na nona matamata-ni-koro; a sa cili kecega na tagane, io ko ira kecega era curu yani e na nona matamata-ni-koro.

25Ia e na kenai katolu ni siga, ni ra sa rara, erau sa taura yadua na nonai seleiwau e lewe rua vei ira na luve i Jekope, ko Simioni kei Livai, na gane i Taina, a rau sa lako vakadoudou ki na koro, ka vakamatei ira kecega na tagane. 26A rau sa vakamatei Amori kei Sikemi na luvena e nai seleiwau, ka kauti Taina yani mai na vale i Sikemi, ka lako yani. 27Era sa qai lako mai ki na moku ko ira na luve i Jekope, ka tokitaka nai yau ni koro, ni ra sa vaqasea na ganedra: 28Era sa kauta na nodra sipi, kei na nodra pulumokau, kei na nodra asa, kei na ka sa tiko e na koro, kei na ka sa tiko mai na were; 29kei na nodra i yau kecega, kei na nodra gone kecega, kei na nodra yalewa, era kauta vakabobula ka tokia, io, na ka kecega sa tiko e vale.

30A sa kaya ko Jekope kivei Simioni kei Livai, Drau sa vakararawataki au, ni drau sa vakaboicataki au vei ira na lewe ni vanua, e na kedra maliwa na kai Kenani kei na lewe ni Veikoro lalai: ia koi au, ka lewe lailai, ka ra na soqoni vata, ka mai vakamatei au; ia ka'u na rusa vata kei na noqu mataqali. 31A rau sa kaya, E vinaka li ni kitaka ko koya na gane i keirau me vaka sa yalewa dautagane?

Vakavakadewa Makawa

©1974 Bible Society of the South Pacific

More Info | Version Index