Search form

NAI VAKATEKIVU 38

A luve i Juta, 1-5. Sai valavala ca ko Eri kei Onani, ka mate kina, 6-11. Sa dauyalewa ko Juta, 12-26. Sa sucu na luvena ka drua, 27-30.

1Ia e na gauna ko ya sa lako sobu tani vei ira na veitacini ko Juta, ka la'ki tiko kei na dua na kai Etulama, a yacana ko Ira. 2A sa kunea maikea ko Juta na luve ni dua na kai Kenani na yalewa, a yacana ko Sua; a sa kauti koya, ka la'ki moce kaya. 3A sa kunekune ko koya, ka vakasucuma e dua na luvena tagane; ia ko Juta sa vakayacani koya ko Eri. 4A sa kunekune tale ko koya, ka vakasucuma na luvena tagane; ia na yalewa sa vakayacani koya ko Onani. 5A sa vakasucu tale ka sa tagane, ka sa vakayacani koya ko Sela: ia, ni sa vakasucumi koya, sa tiko ko Juta mai Kisipi.

6A sa kauta ko Juta e dua na yalewa, me wati i Eri na nona ulumatua na yacana ko Tema. 7A sa tamata ca e na mata i Jiova ko Eri na ulumatua i Juta; a sa vakamatea ko Jiova. 8A sa kaya vei Onani ko Juta, Mo curu vua na yada nei tuakamu, ka mo veiwatini kaya, ka vakatubura na kawa vua na tuakamu. 9A sa kila ko Onani ni na sega ni nona na kawa: a sa yaco ni sa curu vua na yada nei tuakana, sa qai livia ki na qele, de solia na kawa vua na tuakana. 10Ia na ka sa cakava ko koya sa ca e na mata i Jiova: a sa vakamatei koya talega. 11A sa kaya ko Juta vei Tema na vugona, Mo tiko vakayada ga e na vale i tamamu, ka me tubu mada ko Sela na luvequ: ni sa kaya ko koya, De mate talega ko koya, me vakataki rau na tuakana. A sa lako ko Tema ka tiko e na vale i tamana.

12Ia e na dua na gauna emuri sa mate na luve i Sua ka yalewa; ko koya na wati i Juta; a sa vakacegui ko Juta, a sa lako cake ki Timinaca vei ira na tamata era kotiva na nona sipi, ko koya kei na nonai tau ko Ira na kai Etulama. 13A sa tukuni vei Tema, ka vaka, Raica, sa lako cake ki Timinaca na vugomu me kotiva na nona sipi. 14A sa luvata tani na nona tabui sulu vakayada, ka puloutaki koya e nai sulu ni mata, ka vakaitutuvitaki koya, ka la'ki tiko e na matamata ki Eneima e na sala ki Timinaca; ni sa raica ko koya sa levu ko Sela, a sa sega ni musu vua me watina. 15A sa kunea ko Juta, ka nanumi koya ni yalewa dautagane; ni sa puloutaka na matana ko koya. 16A sa lako vakatikitiki vua e na sala, ka kaya, Me'u moce vata kei iko, ne; ni sa sega ni kila sa vugona. A sa kaya ko koya, A cava ko na solia, mo qai moce vata kei au? 17A sa kaya, Au na vakauta vei iko e dua na luve ni me mai na qele ni me. A sa kaya ko koya, ko na solia beka na kenai vakadinadina, ni na kau mai? 18A sa kaya, A cava na ka me'u solia vei iko me kenai vakadinadina? A sa kaya ko koya, A nomu mama, kei na nomu qato, kei na nomu i titoko. A sa solia vua ko koya, a sa la'ki moce kaya, a sa kunekune vua ko koya. 19A sa cavu tu ko koya, ka lako yani, a sa luvata tani vua na nona pulou, ka vakaisulu tale e na nona tabui sulu vakayada. 20A sa tala na nonai tau na kai Etulama ko Juta me kauta na luve ni me, me kau tale mai nai vakadinadina sa tu vua na yalewa: ka sa sega ni kunei koya. 21A sa tarogi ira na lewe ni koro ni yalewa ko ya, ka kaya, Sa evei na yalewa dautagane ka tiko e Eneima e na bati ni sala? A ra sa kaya, Sa sega na yalewa dautagane eke. 22A sa lesu vei Juta, ka kaya, Au sa sega ni kunei koya; a ra kaya talega na tamata e na yasana ko ya, Sa sega na yalewa dautagane eke. 23A sa kaya ko Juta, Me kauta mada ko koya, de sa da madua: raica, ka'u a vakauta na luve ni me oqo, ia ko sa sega ni kunei koya.

24Ia sa oti e tolu na vula, sa qai tukuni vei Juta, ka vaka, ko Tema na vugomu sa dautagane; ka sa bukete ko koya. A sa kaya ko Juta, Dou kauti koya mada mai, me mai vakamai. 25Ia ni sa kau mai ki tautuba, sa talaki vua na vugona, ka kaya, Au sa bukete vua na tamata sa nona oqo: a sa kaya ko koya, Mo kila mada se sa nei cei na ka oqo, na mama, kei na qato, kei nai titoko. 26A sa kila ko Juta, ka kaya, Sa dodonu cake vei keirau ko koya; ni'u a sega ni soli koya vei Sela na luvequ. A sa sega ni moce tale kaya.

27A sa yaco e na siga sa vakasucu kina, raica, sa drua e ketena. 28Ia ni sa vakasucu tiko, sa dodoka yani na ligana e dua: a sa taura na vu-ni-kalou, ka viviga na ligana e na wa kulakula, ka kaya, Oqo sa liu mai. 29Ia ni sa vakasuka tale na ligana, raica, sa lako mai na tacina: a sa kaya na vu-ni-kalou, A cava ko sa basuka kina e na vukumu? o koya sa vakatokai kina na yacana ko Feresi. 30Sa oti, sa qai lako mai na tuakana, ko koya ka vivi na ligana e na wa kulakula: a sa vakayacani koya ko Sira.

Vakavakadewa Makawa

©1974 Bible Society of the South Pacific

More Info | Version Index