Search form

NAI VAKATEKIVU 39

Sa tamata yaco mai Ijipita ko Josefa, 1-6. Sa dauveretaki koya na nona marama, ka qai lasutaki koya, 7-18. Sa cudruvi koya na nona turaga, ka biuta ki na vale ni veivesu, 19,20. Ia sa tiko kaya ko Jiova, 21-23.

1A sa kau sobu ki Ijipita ko Josefa; ia ko Potifa, na matanivanua i Fero, ka kapiteni ni valu i vakatawa, a kai Ijipita, sa voli koya maivei ira na luve i Isimeli, era sa kauti koya sobu kina. 2A sa tiko kei Josefa ko Jiova, a sa tamata yaco ko koya; a sa tiko e na vale ni nona turaga na kai Ijipita. 3A sa raica na nona turaga ni sa tiko vata kaya ko Jiova, ka vakayacora ko Jiova na ka kecega sa cakava ko koya: 4A sa lomani Josefa, a sa qaravi koya ko Josefa; a sa lesi koya me lewa e nona vale, ka solia ki na ligana na ka kecega sa tu vua. 5Ia mai na siga sa lesi koya kina me lewa e nona vale, kei na nona ka kecega, sa vakalougatataka na nona vale na kai Ijipita ko Jiova e na vuku i Josefa; ia sa vakalougatataka ko Jiova na nona ka kecega e vale, kei na were. 6A sa laiva na nona ka kecega me lewa ko Josefa; ka sega ni kila e dua na ka sa tu vua, na kakana ga sa kania ko koya. A sa yago vinaka ka matavinaka ko Josefa.

7Sa oti na ka oqo, sa dauraici Josefa na wati ni nona turaga; ka kaya, Me daru moce vata. 8A sa bese ko koya, ka kaya vua na wati ni nona turaga, Raica, sa sega ni kila na noqu turaga na ka sa tu vei au e vale, ka sa solia me'u lewa na nona ka kecega; 9sa sega e dua e vale oqo me levu cake vei au, a sa sega e dua na ka sa bureitaka vei au, ko iko duaduaga, ni ko sa watina: au na qai cakava rawa vakaevei na ka ca vakaidina oqo, kai valavala ca vua na Kalou? 10Ia ni sa vosa tikoga vei Josefa e na veisiga kecega, sa sega ga ni rogoci koya ko koya, me moce vata kaya, se me rau tiko vata kaya.

11Ia sa dua na siga, sa curu ki vale ko Josefa me kitaka na nonai tavi, ka sega ni tiko kina e dua vei ira na lewe-ni-vale. 12A sa taura ga na nonai sulu, ka kaya, Me daru moce vata: a sa laiva na nonai sulu ki ligana ko Josefa, ka dro, ka curu yani ki tuba. 13Ia ni sa raica ko koya sa biuta tu vua na nonai sulu, ka dro tani, 14sa qai kaci vei ira na nona lewe-ni-vale, a sa vosa vei ira, ka kaya, Raica, sa kauta mai vei keda ko koya e dua na Iperiu me vakalialiai keda; sa curu mai vei au me keirau moce vata kaya, ia ka'u a kaci e na domo levu: 15ia ni sa rogoca ko koya ni'u a tabalaka na domoqu, ka kaci, sa qai laiva vei au na nonai sulu, ka dro, ka curu yani ki tuba. 16A sa taura tiko ko koya na nonai sulu, ka me tale mada mai ki vale na nona turaga. 17A sa tukutuku vua ko koya vakaoqo, Ko koya na Iperiu, na tamata ko a kauta mai vei keda, sa curu mai vei au me vakalialiai au: 18a sa yaco ni'u a tabalaka na domoqu, ka kaci, sa qai laiva vei au na nonai sulu, ka dro ki tuba.

19Ia ni sa rogoca na nona turaga na vosa ni watina, ni sa kaya, Sa kitaki au vakaoqo na nomu tamata; sa qai cudru vakalevu. 20A sa tauri Josefa na nona turaga, ka biuta ki na vale ni veivesu, na vale era vesu kina ko ira ka vesuka na tui: a sa tiko ga kina ko koya.

21Ia sa tiko vata kei Josefa ko Jiova, ka vakayacora vua na loloma, ka vagolea na yalo ni vakatawa ni vale ni veivesu me lomani koya. 22Ia ko koya nai vakatawa ni vale ni veivesu sa lesi Josefa me lewa na tamata kecega sa vesu tiko e na vale ni veivesu; ia sa vakatau vua na ka kecega era cakava kina. 23Ai vakatawa ni vale ni veivesu sa sega ni vakaraica e dua na ka sa lewa ko koya, ni sa tiko vata kaya ko Jiova; ka sa vakayacora ko Jiova na ka sa cakava ko koya.

Vakavakadewa Makawa

©1974 Bible Society of the South Pacific

More Info | Version Index