Search form

NAI VAKATEKIVU 40

E le rua na tamata i Fero sa biu ki na vale ni veivesu, 1-4. Erau tadra, a sa vakatakila ko Josefa nai balebale ni nodrau tadra, 5-19. Sa yaco na ka sa tukuna vei rau ko Josefa, 20-23.

1Sa oti na ka oqo, erau sa vakacalaka vua na nodrau turaga na tui Ijipita, ko koya sa daucaka mena vua na tui Ijipita, kei koya sa dauvavavi. 2A sa cudru ko Fero vei rau na nona tamata turaga, na turaga vei ira sa daucaka mena, kei koya sa turaga vei ira sa dauvavavi. 3A sa sogolati rau e nona vale ni veivesu na kapiteni ni valu i vakatawa, na tikina sa vesuki tu kina ko Josefa. 4Ia na kapiteni ni valu i vakatawa sa lesi Josefa me vakatawai rau, a sa qaravi rau ko koya: a rau sa tikotiko ga kina.

5A rau sa dui tadra koi rau ruarua, e na dua na bogi, na tamata yadua me vaka nai balebale ni nona tadra, ko koya ka daucaka mena, kei koya ka dauvavavi, vua na tui Ijipita, erau sa vesuki e na vale ni veivesu. 6A sa lako vei rau e na mataka ko Josefa, ka raici rau, ka rau sa mataveveku: 7a sa tarogi rau na tamata turaga i Fero eratou sa sogolati kaya tiko e na vale ni nona turaga, a sa kaya, A cava drau sa vakaveveku mata kina edaidai? 8A rau a kaya vua, Keirau sa tadrataka na tadra, ka sa sega me vakaibalebaletaka. A sa kaya vei rau ko Josefa, Sa sega beka ni rawa vua na Kalou me vakaibalebaletaka na ka? drau tukuna mada mai vei au.

9A sa tukuna vei Josefa na nona tadra ko koya ka turaga vei ira sa daucaka mena na tui, a sa kaya vua, E na noqu tadra, raica, sa tu e mataqu e dua na vaini; 10a sa tolu na tabana: ia ni sa kubu mai, sa seraka na sena, ka vuataka na vua dreu na kenai soso: 11ia sa tu e ligaqu na bilo i Fero: ia ka'u a vetia na vua-ni-vaini, ka lobaka ki na bilo i Fero, ka'u a qai solia na bilo i Fero, ka'u a qai solia na bilo ki na liga i Fero. 12A sa kaya vua ko Josefa, Oqo na kenai balebale: A tabana e tolu sa bogi tolu: 13sa vo ga na bogi tolu, ena qai vueta na ulumu ko Fero, ka vakalesui iko ki na nomu i tavi: ia ko na solia tale na bilo i Fero ki na ligana, me vaka nai valavala eliu ni ko a daucaka mena: 14ia mo nanumi au ni ko na tiko vinaka, ka lomani au mada, ka tukuni au vei Fero, ka kauti au tani e na vale oqo: 15ni sa dina ka'u a butakoci mai na nodra vanua na Iperiu; eke talega, sa sega na ka ka'u sa cakava, me ra biuti au kina ki na vale butobuto.

16Ia ni sa kila na turaga ni vavavi ni sa vinaka na kenai balebale, sa kaya vei Josefa, Au a tadra talega ka raica, sa tolu na kato madrai vulavula e uluqu: 17ia e na kato sa toka e cake sa tu na kakana kecega sa dauvavavi me kei Fero; a ra sa mai kania na manumanu vuka mai na kato, sa tu e uluqu. 18A sa vosa ko Josefa, ka kaya, Oqo na kenai balebale: A kato e tolu sa bogi tolu: 19sa vo ga na bogi tolu, ena qai vueta na ulumu mai delamu ko Fero, ka vakalilici iko e na kau, a ra na kania na lewemu na manumanu vuka.

20Ia e na kenai katolu ni siga, na siga ni sucu i Fero, sa cakava ko koya e dua na magiti vei ira kecega era qaravi koya: a sa vueta na ulu ni turaga vei ira sa daucaka mena, kei na ulu ni turaga vei ira sa dauvavavi. 21A sa vakalesuya na turaga vei ira sa daucaka mena ki na nonai tavi; a sa solia tale ko koya na bilo ki na liga i Fero: 22ia sa vakalilica na turaga vei ira sa dauvavavi: me vaka sa vakaibalebaletaka vei rau ko Josefa. 23Ia na turaga vei ira sa daucaka mena na tui sa sega ni nanumi Josefa, sa guilecavi koya ga.

Vakavakadewa Makawa

©1974 Bible Society of the South Pacific

More Info | Version Index