Search form

NAI VAKATEKIVU 41

Sa tadra vakarua ko Fero, 1-24. Sa vakaibalebaletaka ko Josefa, 25-36. Sa lesi ko Josefa me turaga mai Ijipita, 37-45. E vitu na yabaki ni sautu, 46-52. A veiyabaki dausiga, 53-57.

1Ia ni sa oti vinaka e rua na yabaki, sa qai tadra ko Fero: ka raica, sa tu mai na uciwai. 2Ka raica, sa lako cake mai na uciwai e vitu na pulumokau, sa rairai vinaka, ka sa yago vinaka na lewedra; a ra sa kana voli e veico: 3ka raica, sa muri ira cake mai e vitu na pulumokau tani mai na uciwai, sa rairai ca, ka sa suivotu; a ra sa tu vata kei ira na pulumokau e na bati ni uciwai: 4ia na pulumokau sa rairai ca ka suivotu, era sa kania na pulumokau e vitu sa rairai vinaka ka yago vinaka. A sa yadra mai ko Fero. 5A sa moce ka tadra tale: ka raica, sa tubu cake e na dua na tolo ni sila e vitu na kena sola, sa lelevu, ka vinaka: 6ka raica, sa vitu na sola ca, ka kana mate e na cagi mai na tu-i-cake, sa tubu emuri: 7ia na sola e vitu sa ca sa tiloma na sola e vitu sa lelevu ka vinaka. A sa yadra mai ko Fero, ka raica, sa tadra ga.

8Ia e na mataka sa kidroa na lomana: a sa talaki ka kacivi ira kece mai na daucaka-mana mai Ijipita, kei na tamata vuku kecega sa tiko kina: a sa tukuna vei ira ko Fero na nona tadra; a sa sega me vakaibalebaletaka rawa vei Fero.

9Sa qai vosa vei Fero ko koya sa turaga vei ira sa daucaka mena, ka kaya, Au sa nanuma edaidai na noqu cala: 10sa cudru ko Fero vei rau na nona tamata, ka biuti au me'u sogolati e nona vale na kapiteni ni valu i vakatawa, koi keirau kei na nodra turaga na dauvavavi: 11ia keirau a tadrataka e dua na tadra e na dua na bogi, koi au kei koya; keirau a tadra yadua me vaka nai balebale ni nona tadra: 12a sa tiko maikea e dua na cauravou, na Iperiu, a sa qarava na kapiteni ni valu i vakatawa ko koya; ia keirau a tukuna vua, a sa vakaibalebaletaka vei keirau na neirau tadra; sa vakaibalebaletaka vei keirau yadua me vaka na neirau tadra: 13ia me vaka sa vakaibalebaletaka vei keirau, sa yaco vakakina; sa vakalesui au ko koya ki na noqu i tavi, ka sa vakalilici koya.

14Sa qai talatala ko Fero me lako mai ko Josefa, a ra sa kauti koya vakusakusa mai na vale butobuto: a sa tasi koya, ka sulumaka nai sulu tani, ka lako kivei Fero. 15A sa kaya vei Josefa ko Fero, Au sa tadrataka e dua na tadra, a sa sega me vakaibalebaletaka: ia ka'u sa rogoca ni ko sa rawata mo vakaibalebaletaka na tadra ko rogoca.

16A sa vosa vei Fero ko Josefa, ka kaya, Sa sega vei au: ia na Kalou ga ena vosa vinaka vei Fero.

17A sa kaya vei Josefa ko Fero, Na noqu tadra oqo, ka'u a tu mai na bati ni uciwai: 18ka raica, sa lako cake mai na uciwai e vitu na pulumokau, sa yago vinaka, ka rairai vinaka; a ra sa kana voli e na veico: 19ka raica, e vitu na pulumokau tani sa muri ira cake mai, sa suivotu, ka rairai ca sara, ka yali na lewedra; ka'u sa sega ni raica e dua sa ca vakakina e na vanua taucoko ko Ijipita: 20ia na pulumokau sa suivotu ka yago ca sa kania na pulumokau e vitu ka liu mai sa yago vinaka: 21ia ni ra sa kania oti, sa dredre ni kilai ni ra kania; ni ra sa rairai tiko, me vaka eliu. Ka'u a qai yadra. 22Ia ka'u a qai kunea e na noqu tadra, ka raica, sa tubu e vitu na sola ni sila e na dua na tolona, sa vuai vinaka ka lelevu: 23ka raica, sa tubu cake emuri e vitu na sola, sa malai ka lalai, e kana mate e na cagi mai na tu-i-cake: 24ia na sola sa lalai sa tiloma na sola vinaka e vitu: ia ka'u a tukuna na ka oqo vei ira na daucaka-mana; ka sa sega e dua sa vakamacalataka vei au.

25A sa kaya vei Fero ko Josefa, A tadra i Fero sa dua ga: sa tukuna vei Fero na Kalou na ka sa voleka ni cakava ko koya. 26A pulumokau vinaka e vitu sa yabaki e vitu; kei na sola vinaka e vitu sa yabaki e vitu: sa dua bauga na tadra: 27Ia na pulumokau e vitu sa suivotu ka yago ca sa muri ira cake mai, sa yabaki e vitu; kei na sola e vitu sa lala e kana mate e na cagi mai na tu-i-cake, ena yabaki dausiga e vitu. 28Oqo na ka ka'u sa kaya vei Fero: sa vakatakila vei Fero na ka sa voleka ni cakava na Kalou. 29Raica, ena lako mai e vitu na yabaki vakalewe sara e na vanua taucoko ko Ijipita: 30ia ena qai yaco emuri e vitu na yabaki dausiga; ia na sautu kece ena guileca e na vanua ko Ijipita; ni na kania na vanua na dausiga; 31ia ena sega ni kilai na sautu e na vanua, e na vuku ni dausiga ko ya sa muri mai; ni na ka rerevaki sara. 32Ia ni sa vakarua vei Fero na tadra, sa ka ni sa vakataudeitaka na Kalou, ia sa na sega ni dede ena qai vakayacora na Kalou. 33O koya oqo me qara mada ko Fero e dua na tamata yalomatua ka vuku, ka lesia me lewa na vanua ko Ijipita. 34Me lesia ko Fero eso na matanivanua me lewa na vanua, ka kumuna nai kalima e na vanua ko Ijipita e na veiyabaki vakalewe e vitu: 35Ia me ra kumuna vata na kakana kecega e na veiyabaki vinaka sa bera mai, ka binia na sila me lewa ko Fero, ka me ra maroroya talega na kakana e na veikoro. 36Ia na kakana ko ya ena maninitaki me kena na vanua e na veiyabaki dausiga e vitu, ena yaco e na vanua ko Ijipita; ka me kakua ni kawaboko na vanua e na dausiga.

37A sa vinaka vei Fero na ka oqo, ka vei ira kecega na nona tamata. 38A sa kaya vei ira na nona tamata ko Fero, Eda na kunea li e dua vakaoqo, a tamata sa tiko vua na yalo ni Kalou? 39A sa kaya vei Josefa ko Fero, Ni sa vakatakila vei iko na Kalou na ka kecega oqo, sa sega e dua sa yalomatua ka vuku me vakataki iko: 40ko na turaga e na noqu vale, ia ko ira na noqu tamata kecega era na vakarorogo ki na nomu vosa: e nai tikotiko-vakaturaga duaduaga ka'u na levu cake vei iko.

41Sa kaya tale vei Josefa ko Fero, Raica, ka'u sa lesi iko mo lewa na vanua taucoko ko Ijipita. 42A sa luvata na nona mama ko Fero mai na ligana, ka daramaka ki na liga i Josefa, ka vakaisulutaki koya e na lineni matailalai, ka vakataubena e na sinucodo koula; 43a sa vakavodoki koya ki nai karua ni nona qiqi vakaturaga a ra sa kacivaka voli e matana, Mai cuva mada: a sa lesi koya me lewa na vanua taucoko ko Ijipita. 44A sa kaya vei Josefa ko Fero, Koi au ko Fero, ia ena sega na tamata me yavalata na ligana se na yavana e na vanua taucoko ko Ijipita, kevaka ko sa sega ni lewa mada kina. 45A sa vakayacani Josefa ko Fero, me Savenaca-panea; a sa soli Asenaca vua me watina, ko koya na luve i Poti-fera na bete mai Oni. A sa lako voli yani ko Josefa ki na veiyasana kecega mai Ijipita.

46A sa tolusagavulu na yabaki i Josefa, ni sa tu e na mata i Fero na tui Ijipita. A sa lako tani e na mata i Fero ko Josefa, ka lako voli yani e na veiyasana kecega mai Ijipita. 47Ia e na yabaki vakalewe e vitu sa vua vinaka ka vakalevu sara na vanua. 48A sa kumuna vata na kakana kecega e na yabaki e vitu, sa tu e na vanua ko Ijipita, ka binia na kakana e na veikoro: na kakana ni veiwere sa volita e dua na koro, sa binia ko koya e na koro ko ya. 49A sa binia na sila ko Josefa me vaka na nuku mai matasawa, na ka levu sara, ka qai sega ni wilika tiko; ni sa sega ni wili rawa.

50A sa sucu e le rua na luve i Josefa erau tagane ni sa bera na veiyabaki ni dausiga, sa vakasucuma ko Asenaca, na luve i Poti-fera na bete mai Oni. 51A sa vakatoka ko Josefa na yaca ni ulumatua ko Manasa; ka kaya, Ni sa vakayacora na Kalou me'u guilecava na noqu oca kecega, kei na lewe-ni-vale kece i tamaqu. 52A sa vakayacana nai karua ko Ifireimi; ka kaya, Ni sa vakayacora na Kalou me'u vakaivakawa e na vanua ni noqu rarawa.

53A sa oti na yabaki vakalewe e vitu e na vanua ko Ijipita. 54A sa tekivu na veiyabaki dausiga, me vaka ka kaya ko Josefa: a sa kania na veivanua kecega na dausiga; ia sa tiko na kakana e na vanua taucoko ko Ijipita. 55Ia ni sa viakana sara na vanua taucoko ko Ijipita, era sa qai tagi vei Fero na tamata me soli kedra: a sa kaya vei ira na kai Ijipita kecega ko Fero, Dou lako vei Josefa; ia na ka sa kaya vei kemudou, dou cakava. 56A sa tiko na dausiga e na vanua taucoko: a sa dolava na lololo kecega ko Josefa, ka volitaki sila vei ira na kai Ijipita; a sa gumatua mai na dausiga e na vanua ko Ijipita. 57A sa lako mai ki Ijipita vei Josefa na lewe ni veivanua kecega me voli sila; ni sa gumatua na dausiga e na veivanua kecega.

Vakavakadewa Makawa

©1974 Bible Society of the South Pacific

More Info | Version Index