Search form

NAI VAKATEKIVU 42

Sa lako ki Ijipita na tuakai Josefa me voli kakana, 1-28. Era tukutuku vei Jekope, 29-34. Sa rarawa ko Jekope e na vuku ni luvena sa yali, 35-38.

1Ni sa kila ko Jekope sa tiko na sila mai Ijipita, sa kaya ko Jekope vei ira na luvena, A cava dou sa veiraici tu kina? 2Sa kaya talega ko koya, Raica, ka'u sa rogoca sa tiko na sila mai Ijipita; dou lako sobu kina, ka volia na keda maikea: me da bula ga ka sega ni mate. 3A ra sa lako sobu na tuakai Josefa e le tini, me voli sila mai Ijipita. 4Ia ko Penijamini, na taci i Josefa, sa sega ni tala vata kei na tuakana ko Jekope; ni sa kaya ko koya, De yacovi koya e dua na ca.

5A ra sa la'ki volivoli vata na luve i Isireli kei ira na tani eso: ni sa dausiga na vanua ko Kenani. 6Ia ko Josefa sa lewa na vanua, ia sai koya ga sa volitaki sila vei ira kecega na lewe ni vanua: a ra sa lako mai na tuakai Josefa, ka cuva vua ki na qele. 7A sa raici ira na tuakana ko Josefa, a sa kilai ira, ka sa vakalecalecavi koya vei ira, ka vosa vakaukauwa vei ira; ka kaya vei ira, Dou sa lako maivei? A ra sa kaya, Mai na vanua ko Kenani, me voli kakana. 8A sa kilai ira na tuakana ko Josefa, a ra sa sega ni kilai koya. 9A sa nanuma ko Josefa na tadra ka tadrataki ira kina ko koya, a sa kaya vei ira, Kemudou sa mai yamata; dou sa lako mai mo dou raica na kena sega ni vakarau tu ni vanua. 10A ra sa kaya vua, E segai, noqu turaga; keitou sa lako ga mai na nomuni tamata me voli kakana ga: 11koi keitou kece na luvena e le dua ga na tamata; keitou sa dina; keitou sega ni yamata na nomuni tamata. 12A sa kaya vei ira ko koya, E segai; dou sa lako ga mai mo dou raica na kena sega ni vakarau tu ni vanua. 13A ra sa kaya, A nomuni tamata, keitou lewe tinikarua na veitacini; keitou na luvena e le dua na tamata mai na vanua ko Kenani: ka raica, ko koya sa gone sa tiko edaidai kei na tama i keitou, ka dua sa yali. 14A sa kaya vei ira ko Josefa, Sai koya ga ka'u a vosa kina vei kemudou, Kemudou sa mai yamata: 15na ka ga oqo ena kilai kina na nomudou dina; Me vaka sa bula ko Fero, dou na sega ni lako tani eke, kevaka sa sega ni lako mai ki ke na tacimudou sa gone: 16Dou tala mada e dua vei kemudou, me kauta mai na tacimudou, ia koi kemudou, dou na vesu, me kilai kina se dina na nomudou vosa, se segai: ia kevaka e segai, me vaka sa bula ko Fero, sa qai macala dou sa mai yamata. 17A sa biuti ira vata me ra vakatawai mada bogi tolu. 18Ia e na bogi tolu, sa qai kaya vei ira ko Josefa, Dou kitaka na ka oqo, mo dou bula kina; au sa rerevaka na Kalou: 19Kevaka dou sa dina, me dua vei kemudou na veitacini me vesuki tiko e na vale dou sa sogolati kina: ia koi kemudou, dou la'ki kauta na sila ni ra dausiga na nomudou lewe ni veivale: 20ia dou kauta ga mai vei au na tacimudou sa gone; ena qai vakadinadinataki na nomudou vosa, ia dou na sega ni mate. A ra sa kitaka vakakina. 21A ra sa veikayaka vakai ira, Eda sa cala vakaidina e na vuku ni tacida, ni da a raica na rarawa ni yalona, ni sa vakamasuti keda, ia eda a sega ni vakarogoci koya; o koya oqo sa yacovi keda kina na rarawa oqo. 22A sa vosa vei ira ko Rupeni, ka kaya, Au a sega beka ni vosa vei kemudou, ka kaya, Dou kakua ni caka ca vua na gone? ia dou a sega ni rogoca: raica, sa tarogi talega kina na kena dra. 23A ra sa sega ni kila ni sa macala vei Josefa; ni sa tiko vei ira na tamata sa lave vosa vua. 24A sa lako tani vei ira ko koya, ka tagi; a sa lesu vei ira, ka veivosaki kei ira, a sa kauti Simioni, ka vesuka e matadra.

25A sa vakarota ko Josefa me vakasinaiti na nodra taga e na sila, ka me vakasukai na nonai lavo na tamata yadua ki na nona taga, ka me soli vei ira nai vaqa ni gaunisala: a sa cakava vakaoqo vei ira ko koya. 26A ra sa vakavodoka na nodra sila ki na nodra asa, ka lako tani maikea. 27Ia e dua sa sereka na nona taga e na bure me vakania na nona asa, a sa kunea na nonai lavo; ka raica, sa tiko e na gusu ni nona taga. 28A sa kaya vei ira na veitacini, A noqu i lavo sa vakasukai; ka sa tiko e na gusu ni noqu taga. A sa waicala na yalodra, a ra sa rere vata, ka kaya, A ka cava oqo sa cakava vei keda na Kalou?

29A ra sa lako mai vei Jekope na tamadra ki na vanua ko Kenani, ka tukuna vua na ka kecega ka yacovi ira: ka kaya, 30Ko koya na tamata sa turaga ni vanua, sa vosa vakaukauwa vei keitou, ka kaya ni keitou sa vakaraica vakaca na vanua: 31ia keitou a kaya vua, Keitou sa dina; keitou sa sega ni yamata: 32koi keitou na veitacini e lewe tinikarua, na luvena na tama i keitou: e dua sa yali, ia ko koya ka gone sa tiko edaidai kei na tama i keitou, e na vanua ko Kenani. 33A sa kaya vei keitou na tamata, ko koya sa turaga ni vanua, A ka oqo ka'u na kila kina ni dou sa dina; dou laiva e dua vei kemudou na veitacini me tiko kei au, ia koi kemudou, dou kauta na kedra na nomudou lewe ni veivale era dausiga, dou qai lako: 34ia dou kauti koya mai na tacimudou sa gone: au na qai kila ni dou sa sega ni yamata, ni dou sa dina ga: au na qai solia vei kemudou na tacimudou, ia dou na qai mai dauveivoli e na vanua.

35Ia ni ra sa vakalalataka na nodra taga, raica, sa tiko na nonai oloolo lavo na tamata yadua e na nona taga: ia ni ra sa raica kei tamadra nai oloolo lavo, era sa rere. 36A sa kaya vei ira ko Jekope na tamadra, Dou sa vakayalia vei au na luvequ: sa yali ko Josefa, ka sa yali ko Simioni, ia dou na kauti Penijamini talega: sa luvuca na lomaqu na ka kecega oqo. 37A sa vosa vei tamana ko Rupeni, ka kaya, Mo vakamatei rau na luvequ, kevaka ka'u sa sega ni kauti koya tale mai vei iko: mo laiva vei au, ka'u na kauti koya tale mai vei iko. 38A sa kaya ko koya, Ena sega ni lako sobu kei kemudou na luvequ; ni sa mate na tuakana, a sa vo duaduaga ko koya: kevaka sa yacovi koya na ca e na sala dou sa lako kina, dou na qai vakayacora e na rarawa na uluqu sa sika ki nai bulubulu.

Vakavakadewa Makawa

©1974 Bible Society of the South Pacific

More Info | Version Index