Search form

NAI VAKATEKIVU 43

Era lako tale ki Ijipita me voli kakana, ka kauti Penijamini, 1-17. Sa vakacegui ira ko Josefa, ka sai valavala vinaka vei ira, 18-34.

1A sa ka levu na dausiga e na vanua. 2Ia ni ra sa kania oti na sila era a kauta mai Ijipita, sa qai kaya vei ira ko tamadra, Dou lako tale, volia vakalailai na keda kakana. 3A sa vosa vua ko Juta, ka kaya, Sa vakadinadina sara vei keda na tamata, ka vaka, Dou na sega ni raica tale na mataqu, kevaka sa sega ni tiko kei kemudou na tacimudou. 4Kevaka ko na tala vata kei keitou na taci i keitou, keitou na qai lako sobu ka volia na kemu: 5ia kevaka ko na sega ni tala, keitou na sega ni lako sobu: ni sa kaya vei keitou na tamata, Dou na sega ni raica tale na mataqu, kevaka sa sega ni tiko kei kemudou na tacimudou.

6A sa kaya ko Isireli, A cava dou a sega ni lomani au kina, ni dou a tukuna vua na tamata sa dua tale na tacimudou? 7A ra sa kaya, Sa tarogi keitou matua na tamata se keitou vakaevei, kei ira na weka i keitou, ka kaya, Sa bula tiko li na tamamudou? sa dua li na tacimudou? ia keitou a tukuna vua me vaka na nona taro: keitou a kila vakacava ni na kaya, Dou kauta sobu mai na tacimudou?

8A sa kaya ko Juta vei Isireli na tamana, Mo talai keirau vata kei na gone, keitou na qai cavu tu ka lako; me da bula kina, ka sega ni mate, koi keitou, kei iko, kei ira talega na noda lalai: 9Koi au ga me'u tarogi e na vukuna ke sa yali; mo tarogi au e na vukuna: kevaka ka'u sa sega ni kauti koya tale mai vei iko, ka vakatura e matamu, me qai baleti au ka sega ni mudu: 10kevaka keitou a sega ni vakaberabera, keitou sa tale vakarua oqo.

11A sa kaya vei ira ko Isireli na tamadra, Kevaka sa qai vakaoqo, dou cakava mada na ka oqo; dou kauta e na nomudou taga eso na vuata ni vanua oqo ka vinaka cake, ka kauta sobu me ka ni loloma vua na tamata, e dua na pami lailai, ka dua na oni lailai, na ka boi vinaka, kei na mura, na ivi, kei na amodi: 12ka kauta nai lavo me rauta vakarua: kei nai lavo sa kau tale mai e na gusu ni nomudou taga, dou kauta tale; de sa ia cala ga; 13dou kauta talega na tacimudou, ka ia, ka lako tale vua na tamata: 14ia na Kalou Kaukauwa, me vakayacora mo dou lomani mai vua na tamata, ka me sereki koya mai na tacimudou kadua, kei Penijamini: ia koi au, kevaka sa yali vei au na luvequ, au sa rarawa dina ga.

15A ra sa kauta na ka ni loloma ko ya ko ira na tamata, a ra sa kauta nai lavo me rauta vakarua, kei Penijamini; ka ia, ka lako sobu ki Ijipita, ka tu e na mata i Josefa. 16Ia ni sa raici Penijamini kei iratou ko Josefa, sa kaya vua sa lewa na nona vale, Mo kauti ira na tamata oqo ki vale, ka vakamate manumanu, ka vakarau; ni ra na vakasigalevu vata kei au ko ira. 17A sa kitaka na tamata ko ya me vaka ka kaya ko Josefa; a sa kauti ira na tamata ki na vale i Josefa.

18A ra sa rere na tamata, ni ra sa kau ki na vale i Josefa; a ra sa kaya, E na vuku ni lavo ka vakasukai eliu e na noda taga eda sa kau kina, me beitaki keda kina, ka tauri keda, ka vakabobulataki keda, kei na noda asa. 19A ra sa toro vua na tamata ka lewa na vale i Josefa, a ra sa veivosaki kaya mai katuba ni vale, 20a ra sa kaya vua, Kemuni na turaga, keitou a lako dina mai eliu me voli kakana: 21ia ni keitou a yaco ki na dua na bure, keitou sa qai sereka na neitou taga, ka raica, sa tiko na nonai lavo na tamata yadua e na gusu ni nona taga, ia na neitou i lavo kece sara: ia keitou sa kauta tale mai oqo: 22kei nai lavo tani keitou sa kauta sobu mai oqo, me keitou voli kakana: keitou sa sega ni kila se ko cei ka viritaka na neitou i lavo ki na neitou taga. 23A sa kaya vei ira ko koya, Dou vakacegu ga, kakua ni rere: a nomudou Kalou, ko koya sa nona Kalou na tamamudou talega, sa solia vei kemudou nai yau e na nomudou taga: ka'u a taura na nomudou i lavo. A sa kauti Simioni mai ki tautuba kivei ira.

24Ia na tamata ko ya sa kauti ira na tamata ki na vale i Josefa, ka solia na wai, a ra sa vuya na yavadra; a sa vakania ko koya na nodra asa. 25A ra sa vakarautaka na ka ni loloma ka waraki Josefa me lako mai e na siga levu: ni ra sa rogoca era na kana maikea. 26Ia ni sa lako mai ki vale ko Josefa, era sa kauta vua na ka ni loloma sa tu vei ira, a ra sa cuva vua ki na qele. 27A sa tarogi ira se ra vinaka tiko, ka sa kaya, Sa vinaka tiko na tamamudou, ko koya na qase dou a vosa kina? sa bula tiko, se segai? 28A ra sa kaya, Na nomuni tamata na tama i keitou sa vinaka ga, sa bula tiko. A ra sa vakarokoroko, ka cuva. 29A sa ta cake, ka raici Penijamini na tacina, na luve i tinana, a sa kaya, Oqo beka na tacimudou sa gone, ko koya dou a vosa kina vei au? Sa kaya talega, Me yalololoma na Kalou kivei iko, na luvequ.

30Ia sa yavala na yalona e na loloma vua na tacina, ka sa kusarawa ko Josefa: ka sa qara na tikina me tagi kina; a sa curuma na nona vale ni moce, ka tagi kina. 31Sa qai tavoya na matana, ka curu yani, ka kinoci koya, ka kaya, Dou tauca mai na magiti. 32A ra sa tauca vua vakai koya, vei ira talega vakai ira, vei ira talega na kai Ijipita era kana vata kaya vakai ira: ni sa dredre me ra kana vata na kai Ijipita kei ira na Iperiu; ni sa ka vakasisila oqori vei ira na kai Ijipita. 33A ra sa tiko e matana, sa tiko eliu ko koya sa ulumatua, a sa muri sara ko koya sa gone: a ra sa veivakurabuitaki vakai ira ko ira na tamata. 34A sa kau yani mai vua na kedrai votavota: ia nai votavota kei Penijamini sa levu cake, ka vakalima, e na kedra yadua. A ra sa gunu vata kaya, ka ra marau.

Vakavakadewa Makawa

©1974 Bible Society of the South Pacific

More Info | Version Index