Search form

NAI VAKATEKIVU 44

Era sa talai, a sa vauci ira ko koya na tamata i Josefa, ka kauti ira tale ki na koro me vaka na bobula, 1-13. A vakamamasu i Juta, 14-34.

1A sa vakarota na tamata ka lewa na nona vale ko Josefa, ka vaka, Mo vakasinaita na nodra taga na tamata e na kakana, me vaka na ka era kauta rawa, ka viritaka na nonai lavo na tamata yadua ki na gusu ni nona taga: 2kei na mequ bilo, na bilo siliva, mo viritaka ki na gusu ni nona taga sa gone, kei nai lavo ni nona sila. A sa cakava ko koya me vaka sa kaya ko Josefa. 3Ni sa kida na mataka, era sa talai yani na tamata, kei na nodra asa. 4Ni ra sa lako tani e na koro, ka sa sega ni vakayawa, sa kaya ko Josefa vua na tamata ka lewa na nona vale, Mo ia, mo muri ira na tamata; ia ni ko sa vauci ira, mo qai kaya vei ira, A cava dou sa sauma kina na vinaka e na ca? 5sa sega beka oqo sa gunu maikina na noqu turaga, kei na ka sa kila-ka kina? dou sa caka ca e na ka dou sa cakava. 6A sa vauci ira ko koya, ka vosataka vei ira na vosa oqo. 7A ra sa kaya vua, A cava sa vosataka kina na noqu turaga na vosa vakaoqo? me yawa sara vei ira na nomuni tamata me kitaka na ka vakaoqori: 8raica, nai lavo keitou a kunea e na gusu ni neitou taga, keitou a kauta tale mai kivei kemuni mai na vanua ko Kenani: keitou na qai butakoca vakacava na siliva se na koula mai na vale ni nomuni turaga? 9Ko koya vei keitou na nomuni tamata sa kune vua, me mate ko koya; ia koi keitou, keitou na nona bobula na noqu turaga. 10A sa kaya ko koya, Me vaka mada ga na nomudou vosa: ko koya sa kune vua ena noqu bobula; ia koi kemudou, dou na sega ni cala. 11A ra sa kusarawa, ka tauca sobu ki na qele ko ira na tamata yadua na nona taga, ka sereka yadua na nona taga. 12A sa vakasaqara ko koya, sa vakatekivu vua sa qase, ka vakaotia vei koya sa gone: a sa kune na bilo e na taga i Penijamini. 13A ra sa dresuka na nodra i sulu, ka vakavodoka na tamata yadua na nona taga ki na nona asa, ka lesu ki na koro.

14A ra sa lako mai ko Juta kei na veitacini ki na vale i Josefa; ni sa tikotiko ga kina ko koya: a ra sa cuva ki na soso e matana. 15A sa kaya vei ira ko Josefa, A cakacaka cava oqo dou sa cakava? dou sa lecava beka ni sa rawarawa sara ki na tamata sa vakataki au me'u kila-ka? 16A sa kaya ko Juta, A cava keitou na kaya vua na noqu turaga? a cava me keitou vosataka? se keitou na vakadonui keitou vakacava? sa kunea na Kalou na neitou cala na nomuni tamata: raica, koi keitou sa nona bobula na noqu turaga, koi keitou, kei koya sa kune vua na bilo. 17A sa kaya ko koya, Me yawa sara vei au me'u cakacaka vakaoqori: a tamata sa kune vua na bilo, ko koya ga ena noqu bobula; ia koi kemudou, dou lako vakacegu vua na tamamudou.

18Sa qai toro vua ko Juta, ka kaya, Kemuni na noqu turaga, ni vosota mada na nomuni tamata me'u vosataka e dua na vosa e daligamuni na noqu turaga, ia me kakua ni waqa na nomuni cudru vei au na nomuni tamata: ni kemuni sa vakataki Fero. 19A noqu turaga sa tarogi keitou na nona tamata eliu, ka vaka, Sa dua li na tamamudou, se na tacimudou? 20Ia keitou a kaya vei kemuni na noqu turaga, Sa dua na tama i keitou, a qase, a sa dua na luvena ni sa qase, a gone ga; a sa mate na tuakana, ia sa vo duaduaga ko koya na luve i tinana, a sa lomani koya ko tamana. 21Ia ko a kaya vei keitou na nomuni tamata, Dou kauti koya sobu mai vei au, me raici koya na mataqu. 22Ia keitou a kaya vei kemuni na noqu turaga, E dredre ni lako tani vei tamana na gone: ni na mate ko tamata, kevaka sa lako tani vua. 23Kemuni sa qai kaya vei keitou na nomuni tamata, Kevaka sa sega ni lako sobu mai kei kemudou na tacimudou sa gone, dou na sega ni raica tale na mataqu. 24Ia ni keitou a lako vua na nomuni tamata na tamaqu, keitou sa qai tukuna vua na nomuni vosa na noqu turaga. 25A sa kaya na tama i keitou, Dou lako tale, volia vakalailai na keda. 26Keitou sa qai vaka, E dredre ni keitou lako sobu; kevaka ena lako kei keitou na taci i keitou sa gone, keitou na qai lako sobu: ni sa tabu ni keitou raica na matana na tamata, kevaka sa sega ni tiko kei keitou na taci i keitou sa gone. 27A sa kaya vei keitou na nomuni tamata na tamaqu, Dou sa kila ni ka vakasucuma vei au na watiqu e le rua: 28e dua sa lako tani vei au, ka'u a kaya, Sa dresulaki vakaidina ko koya; ia ka'u sa sega ni raica ka yacova na gauna oqo: 29ia kevaka dou kauta talega yani vei au oqo, a sa yacovi koya na ca, dou na qai vakayacora na uluqu sa sika ki nai bulubulu e na rarawa. 30Ia ni'u sa lako vua na nomuni tamata na tamaqu, a sa sega ni tiko kei keitou na gone; ka ni sa vauci vata na nodrau bula; 31ena yaco, ni sa raica sa yali na gone, ena qai ciba ko koya: ia ena vakayacora kina koi keitou na nomuni tamata na uluna sa sika na nomuni tamata na tama i keitou ki nai bulubulu e na rarawa. 32Ni sai au na nomuni tamata sa na taroga na tamaqu e na vuku ni gone ke sa yali, ni'u sa kaya vua, Kevaka ka'u sa sega ni kauti koya tale mai vei iko, mo qai beitaki au kina na tamaqu, ka tawa mudu. 33Ia oqo, me'u tiko mada na nomuni tamata mei sosomi kei na gone, me'u nomu bobula na noqu turaga; ia me lako cake na gone kei ira na tuakana. 34Ni'u na lako cake vakacava vei tamaqu, ni sa sega ni tiko kei au na gone? de'u raica na ka ca ena yacovi koya na tamaqu.

Vakavakadewa Makawa

©1974 Bible Society of the South Pacific

More Info | Version Index