Search form

NAI VAKATEKIVU 45

Sa vakatakilai koya vei ira na veitacini ko Josefa, ka veivosaki kei ira, 1-15. Era sa talai me kauti tamadra mai, kei na nodra lewe-ni-vale kecega, 16-24. A marau i Jekope ni sa rogo mai ko Josefa, 25-28.

1Sa qai sega ni kinoci koya rawa tiko ko Josefa e na matadra era tu vata kaya; a sa kaci, Me ra lako tani vei au ki tuba na tamata kecega. A sa sega e dua sa tiko vata kaya, ni sa tukuni koya ko Josefa vei ira na veitacini. 2A sa tabalaka na tagi ko koya: a ra sa rogoca na kai Ijipita, ka sa rogoca na lewe-ni-vale i Fero. 3A sa kaya ko Josefa vei ira na veitacini, Koi au ko Josefa; Sa bula dina tiko ko tamaqu? A ra sa sega ni vosa rawa vua na tuakana; ni ra sa taqaya e matana.

4A sa kaya vei ira na veitacini ko Josefa, Dou toro mada mai vei au. A ra sa toro vua: A sa kaya ko koya, koi au ko Josefa na tacimudou, ko koya dou a volitaka ki Ijipita: 5ia oqo, mo dou kakua ni rarawa, se veicudruvi vakai kemudou, ni dou a volitaki au ki ke: ni sa talai au na Kalou me'u liutaki kemudou, me ia na veivakabulai: 6ni sa qai yabaki rua, sa dausiga kina na vanua; a sa vo e lima na yabaki, ena sega kina na laulau se na tamusuki sila: 7A sa talai au na Kalou me'u liutaki kemudou, me maroroi na nomudou kawa e vuravura, ka me vakabulai kemudou e na veivakabulai levu: 8ia oqo, dou sa sega ni talai au mai ki ke, na Kalou ga: a sa qisi au ko koya me'u tama i Fero, ka me'u turaga vei ira kecega na nona lewe-ni-vale, ka lewa e na vanua taucoko ko Ijipita. 9Dou kusarawa, ka lako cake vei tamaqu, ka kaya vua, Sa vosa vakaoqo ko Josefa na luvemu, Sa qisi au na Kalou me'u turaga mai Ijipita taucoko; mo lako sobu mai vei au, mo kakua ni berabera: 10ia ko na tiko mai na vanua ko Koseni, mo voleka kina vei au, ko iko, kei ira na luvemu, kei na mokubumu, kei na nomu qele ni sipi, kei na nomu qele ni pulumokau, kei na nomu ka kecega: 11ka'u na vakani iko maikea, de ko dravudravua mai, kei na nomu lewe-ni-vale, kei na nomu ka kecega; ni sa vo e lima na yabaki ni dausiga. 12Ka raica, sa kunea na matamudou, kei na mata i Penijamini na taciqu, ni sa gusuqu ga sa vosa vei kemudou: 13ia dou tukuna vua na tamaqu na noqu lagilagi kecega e Ijipita, kei na ka kecega dou sa raica; ia dou kusarawa, ka kauta sobu mai ki ke na tamaqu.

14A sa mokoti Penijamini na tacina, ka tagi; a sa tagi talega ko Penijamini. 15A sa reguci ira na tuakana kecega, ka tagicaki ira; ka sa oti, era sa qai veivosaki kaya na veituakani.

16A sa rogo ki na vale i Fero na kenai rogorogo, ka sa kainaki, Era sa lako mai na tuakai i Josefa: a sa vinaka vei Fero, kei ira na nona tamata. 17A sa kaya vei Josefa ko Fero, Mo kaya vei ira na wekamu, Mo dou kitaka oqo: dou vakavodoka na ka ki na nomudou manumanu, ka lako ki na vanua ko Kenani; 18ka kauti koya na tamamudou, kei na nomudou lewe ni veivale, ka lako mai vei au: ka'u na solia vei kemudou na vinaka ni vanua ko Ijipita, ia dou na kania na kena vinaka ni vanua: 19sa qai tau vei kemudou nai vakaro, dou cakava ga; dou kauta vei kemudou eso na qiqi-ni-tamata mai na vanua ko Ijipita, e na vukudra na nomudou lalai, kei na watimudou, ka kauti koya mai na tamamudou, ka lako mai: 20Ia dou kakua ni nanuma na nomudou i yaya; ni na nomudou na ka vinaka ni vanua taucoko ko Ijipita. 21A ra kitaka vakakina na luve i Isireli: a sa solia vei ira eso na qiqi-ni-tamata ko Josefa, me vaka na vosa i Fero, ka solia vei ira nai vaqa ni gaunisala. 22Sa solia ko koya vei ira kecega na tamata yadua nai sulu me rauta vakarua; ia sa solia ko koya vei Penijamini e tolu na drau na tiki ni siliva, kei nai sulu me rauta vakalima. 23Ia vei tamana sa vakauta na ka oqo; e tini na asa sa colata eso na ka vinaka mai Ijipita, ka tini na asa yalewa sa colata na sila kei na madrai kei na kakana me kei tamana e gaunisala. 24A sa talai ira yani na veitacini, a ra sa lako: a sa kaya vei ira ko koya, Dou kakua ni veicudruvi e na gaunisala.

25A ra sa lako cake mai Ijipita, ka yaco ki na vanua ko Kenani kivei Jekope na tamadra, 26ka tukuna vua, ka vaka, Sa bula tiko ko Josefa, a sa lewa ko koya na vanua taucoko ko Ijipita. A sa luvu na lomana, ni sa sega ni vakadinati ira. 27A ra sa tukuna vua na vosa kecega i Josefa, ka vosataka vei ira: ia ni sa raica ko koya na veiqiqi-ni-tamata sa vakatala ko Josefa me kauti koya, sa qai bula tale mai na yalo i Jekope na tamadra: 28a sa kaya ko Isireli, Sa levu; sa bula tiko ko Josefa na luvequ: au na la'ki raici koya ni'u sa bula tiko.

Vakavakadewa Makawa

©1974 Bible Society of the South Pacific

More Info | Version Index