Search form

NAI VAKATEKIVU 46

Sa vakacegui Jekope na Kalou, ka sa lako sobu ki Ijipita ko koya 1-7. A kawa i Isireli era sa lako ki Ijipita, 8-27. Sa la'ki veitata kei tamana ko Josefa; ka vakarautaki ira na veitacini me ra lako vei Fero, 28-34.

1A sa lako ko Isireli kei na nona kecega, ka yaco ki Pieri-sepa, a sa vakacabora nai soro vua na Kalou i Aisake na tamana. 2A sa vosa vei Isireli na Kalou, e na raivotu e na bogi, ka kaya, I Jekope, i Jekope! A sa kaya ko koya, Koi au saka oqo. 3A sa kaya, Koi au na Kalou, na Kalou i tamamu: kakua ni ko rere ni lako sobu ki Ijipita; ni'u na vakamatanitulevutaki iko maikina. 4Au na lako sobu kei iko ki Ijipita; ia ka'u na kauti iko cake tale vakaidina: ia ena tabaka na matamu ko Josefa e na ligana. 5A sa cavu tu mai Pieri-sepa ko Jekope: ia ko ira na luve i Isireli, era sa kauti Jekope na tamadra, kei na nodra lalai, kei na watidra, e na veiqiqi-ni-tamata ka vakatala ko Fero me kauti koya. 6A ra sa kauta na nodra manumanu, kei na nodra i yau, era a rawata e na vanua ko Kenani, a ra sa lako ki Ijipita, ko Jekope, kei ira kece vata kaya na nona kawa: 7a luvena tagane, kei na makubuna tagane; na luvena yalewa, kei ira na makubuna yalewa, kei na nona kawa kecega, sa kauta vata kaya ki Ijipita.

8Ia oqo na yacadra na luve i Isireli era sa lako ki Ijipita, ko Jekope kei na luvena: ko Rupeni, na ulumatua i Jekope. 9Ia na luve i Rupeni eratou tagane; ko Enoke, kei Palu, kei Esironi, kei Kamai. 10Ia na luve i Simioni eratou tagane; ko Jimueli, kei Jamini, kei Oati, kei Jakini, kei Soari, kei Saula, na luvena e dua na yalewa ni Kenani. 11Ia na luve i Livai eratou tagane; ko Kerisoni, ko Koaca, kei Mirari. 12Ia na luve i Juta eratou tagane; ko Eri, kei Onani, kei Sela, kei Feresi, kei Sera; ia ko Eri kei Onani erau a mate e na vanua ko Kenani: ia na luve i Feresi erau tagane; ko Esironi, kei Emuli. 13Ia na luve i Isakari eratou tagane; ko Tola, kei Fuva, kei Jopi, kei Simironi. 14Ia na luve i Sepuloni eratou tagane; ko Sereti, kei Eloni, kei Jalieli. 15Ko ira na tagane oqo na luve i Lia, ka vakasucuma vei Jekope mai Petani-erama, kei Taina na luvena yalewa: ko ira vata na luvena tagane kei na luvena yalewa, era lewe tolusagavulu ka tolu.

16Ia na luve i Kata eratou tagane; ko Sifioni, ko Aki, ko Suni, kei Esiponi, ko Eri, kei Eroti, kei Areli. 17Ia na luve i Aseri eratou tagane; ko Imina, kei Isiva, kei Isivi, kei Piria, kei Sera na ganedratou: ia na luve i Piria erau tagane, ko Eperi, kei Malikieli. 18Ko ira na tagane oqo na luve i Silipa, ko koya ka solia ko Lepani vei Lia na luvena yalewa: ia ko ira oqo sa vakasucuma ko koya vei Jekope, era lewe tinikaono.

19Na luve i Rejeli, na wati i Jekope: ko Josefa kei Penijamini. 20Ia na luve i Josefa sa sucu e na vanua ko Ijipita, ko Manasa kei Ifireimi, koi rau ka vakasucuma ko Asenaca na luve i Poti-fera na bete mai Oni. 21Ia na luve i Penijamini eratou tagane; ko Pela, kei Pekeri, kei Asipeli, ko Kira, kei Neamani, ko Ei, kei Rosi, ko Mupimi, kei Upimi, kei Ariti. 22Ko ira na tagane oqo era luve i Rejeli, ko ira sa vakasucuma vei Jekope: a tamata kecega era lewe tinikava.

23Ia na luve i Tani ka tagane, ko Usimi. 24Ia na luve i Nafitalai eratou tagane; ko Jasieli, kei Kuni, kei Jeseri, kei Silemi. 25Ko ira na tagane oqo na luve i Pila, ko koya ka solia ko Lepani vei Rejeli na luvena yalewa; a sa vakasucumi ira oqo ko koya vei Jekope: ko iratou kecega era lewe vitu.

26Ko ira na tamata kecega ka lako vata kei Jekope ki Ijipita, ka ra taka maivua, era lewe onosagavulu ka ono, ia ka sa vo na watidra na luve i Jekope. 27Ia sa lewe rua na luve i Josefa, erau sa sucu mai Ijipita. Ko ira kece na tamata e na mataqali i Jekope era lako ki Ijipita, era lewe vitusagavulu.

28A sa talai Juta me liutaki koya vei Josefa, me kauti koya ki Koseni; a ra sa yaco ki na vanua ko Koseni. 29A sa vakarautaka na nona qiqi vakaturaga ko Josefa, ka lako cake me veitavaki kei Isireli na tamana, mai Koseni; a sa vakaraitaki koya vua: a sa mokota na domona, a sa tagi vakadede kina. 30A sa kaya vei Josefa ko Isireli, Me'u qai mate, ni'u sa raica tale na matamu, ka ni ko sa bula tiko. 31A sa kaya ko Josefa vei ira na veitacini, kei na mataqali i tamana, Au na lako cake, ka tukuna vei Fero, ka kaya vua, Ko ira na veitacini, kei na mataqali i tamaqu, ka tiko mai na vanua ko Kenani, era sa lako mai vei au; 32ka ra sai vakatawa ni sipi na tamata; ni ra sa tamata dauvakana manumanu; a ra sa kauta mai na nodra sipi kei na nodra pulumokau, kei na nodra ka kecega. 33Ia ni sa kacivi kemudou ko Fero, ka vaka, A cava dou sa daukitaka? 34dou qai kaya, Keitou na nomuni tamata keitou sa dauvakana manumanu, ni keitou a gone ka yacova na gauna oqo, koi keitou, ko ira talega na neitou qase: mo dou tiko kina mai na vanua ko Koseni; ni ra sa ka vakasisila vei ira na kai Ijipita na tamata kecega sa dauvakana sipi.

Vakavakadewa Makawa

©1974 Bible Society of the South Pacific

More Info | Version Index