Search form

NAI VAKATEKIVU 48

Sa lako ko Josefa kei rau na luvena me raici tamana, ni sa vakarau mate; a sa vosavakalougatataki rau ko Jekope.

1Sa oti na ka oqo, sa kainaki vei Josefa, Raica, sa tauvi mate ko tamamu: a sa kauta vata kaya na luvena tagane ruarua, ko Manasa kei Ifireimi. 2A sa tukuni vei Jekope, ka vaka, Raica, sa lako mai vei iko ko Josefa na luvemu: a sa vakaukauwataki koya ko Isireli, ka sa duri cake e nai mocemoce. 3A sa kaya vei Josefa ko Jekope, Na Kalou Kaukauwa sa rairai vei au mai Lusa mai na vanua ko Kenani, a sa vosavakalougatataki au, 4a sa kaya vei au, Raica, au na vakatubura na nomu kawa, ka vakalewevuqataki iko, ka vakatuburi iko mo matanitu e vuqa; ka'u na solia talega na vanua oqo vei ira na nomu kawa, me ra taukena ka tawa mudu. 5Ia na luvemu tagane ruarua oqo, erau a sucu eliu e na vanua ko Ijipita, ni'u sa bera ni lako mai vei iko ki Ijipita, erau sa noqu; ko Ifireimi kei Manasa, me vakataki Rupeni kei Simioni, erau na noqu: 6Ia na luvemu era na sucu emuri, era na nomu; era na vakatokai e na yaca ni tuakadra, e na vanua era taukena: 7ia koi au, ni'u a lako mai Petani, sa mate i tikiqu e gaunisala ko Rejeli e na vanua ko Kenani, ni sa vo tiko na sala me yaco ki Efiraca: ia ka'u a buluta maikea mai na sala ki Efiraca; ko ya ko Pecileema.

8A sa raici rau na luve i Josefa ko Isireli, a sa kaya, Ko cei koi rau oqo? 9A sa kaya vei tamana ko Josefa, Erau sa luvequ, sa solia vei au na Kalou eke. A sa kaya ko koya, Mo kauti rau mada mai kivei au, me'u vosavakalougatataki rau. 10A sa rai vakaca na mata i Isireli ni sa qase, sa sega ni rai vinaka rawa. A rau sa kau voleka vua; a sa reguci rau ko koya, ka mokoti rau. 11A sa kaya vei Josefa ko Isireli, Au a sega ni nanuma me'u raica na matamu; ia, sa vakaraitaka talega na nomu kawa vei au na Kalou. 12A sa kauti rau ko Josefa mai na maliwa ni duruna, a sa vakacuva na matana ki na qele. 13A sa tuberi rau ruarua ko Josefa, ko Ifireimi e na ligana i matau me donuya na liga i mawi i Isireli, kei Manasa e na ligana i mawi me donuya na liga i matau i Isireli, ka kauta voleka vua. 14A sa dodoka na ligana i matau ko Isireli, ka tabaka na ulu i Ifireimi, ko koya ka gone, kei na ligana i mawi ki na ulu i Manasa; ia sa kitaka oqo ni sa kila; ka ni sa ulumatua ko Manasa.

15A sa vosavakalougatataki Josefa, ka kaya, Na Kalou, ko koya erau daulako voli e matana na tamaqu, ko Eparaama kei Aisake, na Kalou ka vakani au ni'u a gone ka yacova na siga oqo, 16na Agilose ka vakabulai au mai na ca kecega, me vakalougatataki rau na gone; ia me toka vei rau na yacaqu, kei na yacadrau na tamaqu, ko Eparaama kei Aisake; me rau tubu talega me rau lewe vuqa sara e vuravura. 17Ia ni sa raica ko Josefa sa tabaka na ulu i Ifireimi e na ligana i matau, sa sega ni vinakata: a sa laveta na liga i tamana, me kauta mai na ulu i Ifireimi ki na ulu i Manasa. 18A sa kaya vei tamana ko Josefa, Me kakua ni vakakoya, na tamaqu: ni sa ulumatua ko koya oqo; mo tabaka na uluna e na ligamu i matau. 19A sa bese ko tamana, ka kaya, Au kila, na luvequ, au kila: ena yaco talega ko koya me yavusa, ka na levu talega ko koya; ia sa dina ena levu cake vua na tacina, ni na yaco na nona kawa me matanitu e vuqa. 20A sa vosavakalougatataki rau e na siga ko ya, ka kaya, Ena cavuti kemudrau yadua ko ira na Isireli ni ra ia na vosa ni veivakalougatataki, a ra na kaya, Me qisi iko na Kalou mo tautauvata kei Ifireimi ka vakataki Manasa: a sa cavuti Ifireimi ko koya me liu, ka me muri ko Manasa.

21A sa kaya vei Josefa ko Isireli, Raica, ka'u na mate; ia na Kalou ena tiko kei kemudou, ka kauti kemudou tale ki na nodra vanua na nomudou qase: 22ia koi au, ka'u sa solia e dua na tiki ni vanua vei iko, e levu cake e na nodra na veitacini, ka'u a rawata mai vua na Amoraiti e na noqu i seleiwau kei na noqu dakai.

Vakavakadewa Makawa

©1974 Bible Society of the South Pacific

More Info | Version Index