Search form

NAI VAKATEKIVU 49

Sa vosavakalougatataki ira yadua na luvena ko Jekope, 1-28. Sa kaya me bulu vata kei Eparama, ka sa qai mate, 29-33.

1A sa kacivi ira na luvena tagane ko Jekope, ka kaya, Dou soqoni vata, me'u tukuna vei kemudou na ka ena yacovi kemudou e na gauna maimuri: 2Dou soqoni vata mai, ka vakarorogo kemudou na luve i Jekope; ia dou rogoci Isireli na tamamudou. 3I Rupeni, ko iko na noqu ulumatua, na noqu qaqa, kei nai vakatekivu ni noqu kaukauwa, Sa uasivi e na vakaturaga, ka uasivi e na kaukauwa: 4Sa sega ni tarovi vaka na wai, ka ko na sega ni uasivi cake; E na vuku ni ko a davo e nai mocemoce i tamamu; ko a qai vakasisilataka: sa davora ko koya na noqu i davodavo. 5Erau veitacini ko Simioni kei Livai; ai yaragi ni ravuravu na nodraui seleiwau: 6Na yaloqu, mo kakua ni bose vata kei rau; Me kakua ni tiko vata kei na nodraui soqosoqo: na noqu lagilagi, Ni rau a vakamatea na tamata E na nodrau cudru, ka tularuataka na pulumokau e na nodrau lomaqa: 7Me cudruvi na nodrau cudru, ni sa kaukauwa; Kei na nodrau cudru waqawaqa, ni sa dauveiturisautaki: Au na tawasei rau e Jekope, Ka dui biubiuti rau e Isireli. 8I Juta, ko iko era na vakavinavinaka kina na veitacini: A ligamu ena taura na domodra na nomu meca; Era na cuva vei iko na luve i tamamu. 9A luve ni laioni ko Juta; Ko sa lako cake, na luvequ, ni ko rawa na kemu: Sa cuva ko koya, sa koto me vaka na laioni, Ia ka vaka na laioni yalewa; ko cei me vakacudruya? 10Ena sega ni lako tani vei Juta nai titoko vakaturaga, Se na turaga ni lewa maivei ira na nona kawa, Ka me lako mada mai ko Sailo, Ko koya era na talairawarawa kina na veimataqali. 11Ena nokata ko koya na nona asa ki na vaini, Kei na nona luve ni asa ki na vaini talei; Ena sava na nonai tutuvi e na waini, Kei na nonai sulu e na dra ni vua-ni-vaini: 12Ena damudamu na matana e na waini, Ka vulavula na batina e na wai-ni-sucu. 13Ko Sepuloni, ena tiko mai na toba mai waitui: Ia ena tiko ko koya mai nai kelekele ni waqa; Ia ena yacovi Saitoni na nonai yalayala. 14Ko Isakari, na asa kaukauwa, Sa koto sobu e na macawa ni bai ni sipi: 15A sa kunea ko koya ni sa vinaka nai cegucegu, Ka ni sa ka me marautaki na vanua; A sa solia na tabana me colacola, A sa dausauta ki na nonai tavi cakacaka. 16Ko Tani, ena lewai ira na nona tamata, Me vaka e dua vei ira na mataqali i Isireli. 17Ko Tani ena dua na gata e na bati ni sala, A gata daukata e na bati ni salatu, Sa katia na bukubuku-ni-yava ni ose, A sa lutu kina ki ra ko koya sa vodoka. 18Au sa waraka na bula maivei kemuni Jiova! 19Ko Kata, ena gumutua mada vua e dua na matai valu: Ia emuri ena gumutua ko koya. 20Ko Aseri, ena uro na magiti mai nona vanua, Ena vuataka talega ko koya na kakana vinaka vakaturaga. 21Ko Nafitalai, sa me kila ka tasere; Sa tukuna ko koya na vosa me marautaki. 22Ko Josefa, sa taba ni kau dauvua, Io na taba ni kau dauvua e na bati ni mata-ni-wai; Sa salava na dela ni bai-vatu na tabana. 23A ra sa dauvakararawataki koya na dauvavana, Ka vana, ka ra sagai koya: 24Ia sa kaukauwa tiko ga na nona dakai, A sa vakaukauwataki na taba ni ligana, E na ligana na Kaukauwa i Jekope. Sa vu maikina nai Vakatawa, na Ulu-vatu i Isireli; 25Io mai na Kalou i tamamu, ko koya ena vukei iko; Ko koya sa Kaukauwa talega ka na vakalougatataki iko. E na ka ni veivakalougatataki mai lomalagi e cake, kei Na ka ni veivakalougatataki mai na vanua titobu era, Kei na ka ni veivakalougatataki ni sucu kei na kete: 26Na vosa ni veivakalougatataki i tamamu Sa levu cake e na ka ni veivakalougatataki ni noqu qase; Ka yacova na veiulu-ni-vanua e sega ni oti rawa: Ena tauca na ulu i Josefa, Kei na buradelai koya ka tawase maivei ira na tuakana. 27Ko Penijamini, ena daukata me vaka na wolifa: Ena kania e na mataka na kena sa rawa, Ka na vota e na yakavi nai toki.

28Ko ira kecega oqo na mataqali i Isireli e tinikarua: ia oqo na ka sa vosataka vei ira ko tamadra, ni sa vosavakalougatataki ira; sa vosavakalougatataki ira yadua me vaka na ka era dui kalougata kina.

29A sa vakaroti ira, ka kaya vei ira, Au sa na toki yani kivei ira na kai noqu: dou buluti au kei ira na tamaqu e na qara-vatu mai na tiki ni vanua nei Efironi na Itaiti; 30e na qara-vatu e na tiki ni vanua ko Makipila, sa donui Mamire, mai na vanua ko Kenani, ko ya sa volia ko Eparaama, kei na tiki ni vanua, vei Efironi na Itaiti, me nona vanua ni bulubulu. 31Era a buluti Eparaama kina, kei Sera na watina; era a buluti Aisake kina, kei Repeka na watina; ka'u a buluti Lia talega kina: 32a tiki ni vanua ko ya, kei na qara-vatu sa tu kina, sa voli maivei ira na Itaiti.

33Ia ni sa vakaroti ira oti na luvena ko Jekope, sa lokia cake na yavana ki nai mocemoce, ka ciba yani, a sa toki yani vei ira na kai nona.

Vakavakadewa Makawa

©1974 Bible Society of the South Pacific

More Info | Version Index