Search form

NA VUNAU NI SORO 10

Erau sa vakamatei ko Netapi kei Epaiu, 1-7. Sa vakarota ko Jiova me ra kakua ni gunuva na waini, se na yaqona na bete ni ra sa curuma na vale ni veitavaki, 8-11. A tiki ni soro sa dodonu me laukana, 12-15. Sa vunauci ira na bete ko Mosese, 16-20.

1Ia ko Netapi kei Epaiu na luve i Eroni, erau sa dui kauta na nona miqa ni ka boi vinaka, a rau sa biuta kina na bukawaqa, ka viria kina na ka boi vinaka, ka cabora e na mata i Jiova na bukawaqa tani, sa sega ni vakarota vei rau ko Jiova. 2A sa lako yani na bukawaqa maivei Jiova, ka kani rau, a rau sa ciba e na mata i Jiova. 3A sa kaya vei Eroni ko Mosese, Oqo ka vosataka ko Jiova, ni sa kaya, Au na vakatabui vei ira era sa toro voleka vei au, ia ka'u na vakarokorokotaki e na matadra kecega na tamata. A sa galu ko Eroni. 4Ia ko Mosese sa kacivi Misaeli kei Elisapani, na luve i Usieli na tama i Eroni lailai, a sa kaya vei rau, Toro mai, drau kauta tani na wekamudrau mai na mata ni vale tabu, ki nai bili ni tikotiko. 5A rau sa toro voleka, ka kauti rau e na nodraui curucuru balavu ki nai bili ni tikotiko; me vaka ka kaya ko Mosese.

6A sa kaya vei Eroni ko Mosese, vei rau talega na luvena, ko Eliesa kei Icama, Dou kakua ni luvata nai sala mai na ulumudou, kakua talega ni dresulaka na nomudou i sulu; de dou mate, de yaco talega na cudru vei ira kecega na tamata; ia ko ira ga na wekamudou, na mataqali kecega i Isireli, me ra tagicaka na kama sa vakavuna ko Jiova: 7ia dou kakua ni curu yani e na katuba ni vale ni veitavaki, de dou mate: ni dou sa lumuti e na waiwai i Jiova. A ratou sa muria na vosa i Mosese.

8A sa vosa vei Eroni ko Jiova, ka kaya, 9Dou kakua ni gunuva na waini, se na yaqona kaukauwa, ni dou sa curu ki na vale ni veitavaki, o iko, se na luvemu, de dou mate: oqo me kenai lesilesi ka tawa mudu vei ira na nomudou veitabatamata; 10mo dou vakatakilakilataka na ka e tabu kei na ka e sega ni tabu, kei na ka e sega ni savasava kei na ka e savasava; 11ia mo dou vakavulici ira na Isireli e na vunau kecega sa vosataka ko Jiova vei ira e na gusu i Mosese.

12A sa kaya ko Mosese vei Eroni, kei rau na luvena sa vo, ko Eliesa kei Icama, Dou kauta nai madrali laukana sa vo e na ka sa cabo e na bukawaqa vei Jiova, ka kania ni sa sega ni vakalevenitaki, ni dou sa tu voleka ki nai cabocabo-ni-soro: ni sa ka tabu sara: 13ia dou kania e na dua na tikina tabu, ni sa nomu i votavota, kei na nodraui votavota na luvemu, e na ka sa cabo e na bukawaqa vei Jiova; ni'u sa vakaroti vakaoqo. 14Ia na serena sa yalovaki kei na tabana sa lavelaveti dou kania e na dua na tikina savasava; o iko kei rau na luvemu tagane, kei iratou na luvemu yalewa; ni sa nomu i votavota, kei na nodra i votavota na luvemu, sa soli mai na nodra i madrali ni veivinakati era sa cabora na Isireli. 15Na tabana sa lavelaveti kei na serena sa yalovaki me ra kauta vata mai, kei na uro sa cabo e na bukawaqa, ka me yalovaka mei soro e yalovaki e na mata i Jiova; ia me sa nomu, kei na nodra na luvemu talega, sai lesilesi ka tawa mudu; me vaka sa vakarota ko Jiova.

16A sa vakasaqara matua ko Mosese na me sai soro ni valavala ca, ka raica, sa vakamai; a sa cudru vei Eliesa kei Icama, na luve i Eroni sa vo, ka kaya, 17A cava drau sa sega ni kania kina nai soro ni valavala ca e na tikina tabu, ni sa ka tabu sara, a sa solia vei kemudou na Kalou me colata kina nai valavala ca ni soqosoqo, me sorovaki ira e na mata i Jiova? 18raica, na kena dra sa sega ni kau ki loma ni tikina tabu: sa dodonu mo dou kania e na tikina tabu: me vaka ka'u a vakarota. 19A sa kaya vei Mosese ko Eroni, Raica, era sa cabora edaidai na nodra i soro ni valavala ca, kei na nodra i soro kama, e na mata i Jiova; a sa yacovi au na ka vakaoqo: ia kevaka ka'u a kania nai soro ni valavala ca edaidai, sa na vinaka beka e na mata i Jiova? 20Ia ni sa rogoca ko Mosese, sa vakadonuya.

Vakavakadewa Makawa

©1974 Bible Society of the South Pacific

More Info | Version Index