Search form

NA VUNAU NI SORO 13

A lewa e na vuku ni vukavuka.

1A sa vosa vei Mosese kei Eroni, ko Jiova ka kaya, 2Kevaka sa dua na tamata sa tu e na kulina na vuvuce, se na vidikoso, se na tikina rama, a sa tu e na kulina me vaka na vukavuka; me kau ko koya vei Eroni na bete, se vua e dua vei ira na luvena sa bete: 3ia me dikeva ko koya na bete na mate e na kulina; ia kevaka sa vulavula mai na vutikana e na tikina sa tu kina na mate, a sa rairai ni sa kania na lewena, oqo na vukavuka; ia ni sa raici koya na bete, me qai tukuni koya ni sa sega ni savasava. 4Ia kevaka sa vulavula mai na tiki ni kulina sa rama, a sa rairai ni sa tauva walega na kulina, a sa sega ni vulavula mai na vutikana; me qai sogoti koya na mate na bete, ka bogi vitu: 5me qai raici koya na bete e na kenai kavitu ni siga: ia kevaka sa rairai vua, ni sa sega ni tetela na mate e na kulina; me qai sogolati koya tale na bete, ka bogi vitu tale: 6me qai raici koya tale na bete ni sa oti na bogi vitu: ia kevaka sa loaloa mai na mate, a sa sega ni tetela na mate e na kulina, me qai tukuni koya na bete ni sa savasava; sa bu ca walega: me sava ko koya na nonai sulu, ka na sa savasava. 7Ia kevaka sa tetela vakalevu na bu ca e na kulina, ni sa raici koya oti na bete me tukuni koya ni sa savasava, me qai raici koya tale na bete: 8ia ni sa dikeva na bete, kevaka sa tetela na bu ca e na kulina, me qai tukuni koya na bete ni sa sega ni savasava: sa dina ga sa vukavuka.

9Ni sa tauvi vukavuka e dua na tamata, me qai kau ko koya vua na bete; 10ia me dikevi koya na bete: ia kevaka sa dua na vuvuce vulavula e na kulina, a sa vakavulavulataka na vutikana, ka sa tiko e na vuvuce na tiki ni lewena sa bulabula; 11sai koya na vukavuka makawa e na kulina; me qai tukuni koya na bete ni sa sega ni savasava, me kakua ni sogolati koya: ni sa sega ni savasava ko koya. 12Ia ke sa tetela sara na vukavuka e na kulina, a sa robota kece na kulina sa tauvi vukavuka, mai na uluna ka cavaraka ki na yavana, e na tikina kecega sa rai kina na bete; 13me qai vakaraica na bete: ia ke sa robota na lewena taucoko na vukavuka, me qai tukuni koya ka mate ni sa savasava: sa vulavula kece mai: sa savasava ko koya. 14Ia e na siga ga sa rairai kina na tikina sa bulabula, ena sega ni savasava kina. 15Ia me dikeva na tikina sa bulabula na bete, ka tukuni koya ni sa sega ni savasava: sa sega ni savasava sa bulabula na tikina: oqo na vukavuka. 16Ia kevaka sa vuki tale na tikina sa bulabula, me vulavula mai, me qai lako mai ko koya vua na bete; 17ia me dikevi koya na bete: ia kevaka sa vulavula mai na mate; me qai tukuna na bete ni sa savasava mai na mate: sa savasava ko koya.

18Ia ke tu e na lewena, e dua na bo, a sa mavo, 19a sa tubu na vuvuce vulavula, e na tikina ka tu kina na bo, se na tikina rama, e vulavula, ka via damudamu mai, me sa vakatakilai vua na bete; 20ia me sa dikeva na bete, ia kevaka sa rairai ni sa kakana ki na lewena, a sa vulavula mai na vutikana; me qai tukuni koya na bete ni sa sega ni savasava: oqo na vukavuka, sa tubu e na bo. 21Ia kevaka sa dikeva na bete, ka sa sega kina na vutikana vulavula, ka tiko walega e na kulina, a sa loaloa mai; me qai sogolati koya na bete, ka bogi vitu: 22ia kevaka sa tetela vakalevu e na kulina, me qai tukuni koya na bete ni sa sega ni savasava: oqo na vukavuka. 23Ia kevaka sa tu ga na tikina sa rama, a sa sega ni tetela, sa qai bo katakata; ia me na tukuni koya na bete ni sa savasava.

24Ia kevaka sa tu e na kulina na we ni kama, a sa tu e na lewena bulabula, sa we ni kama, e dua na tikina sa rama, e vulavula, sa via damudamu mai, se vulavula ga; 25me qai dikeva na bete: ia kevaka sa vulavula mai na vutikana e na tikina rama, a sa rairai ni sa kakana ki na lewena; oqo na vukavuka, sa tubu e na tikina sa kama e na bukawaqa: ia me qai tukuni koya na bete ni sa sega ni savasava: oqo na vukavuka. 26Ia kevaka sa dikeva na bete, ka sa sega na vutikana vulavula e na tikina sa rama, a sa tu walega e na kulina, a sa loaloa mai; me qai sogolati koya na bete, ka bogi vitu: 27ia me dikevi koya na bete e na kenai kavitu ni siga: kevaka sa tetela vakalevu e na kulina, me qai tukuni koya na bete ni sa sega ni savasava: oqo na vukavuka. 28Ia kevaka sa tu ga na tikina sa rama, a sa sega ni tetela e na kulina, a sa loaloa mai; oqo ga na vuvuce ni tikina sa kama, ia me tukuni koya na bete ni sa savasava: ni sa we walega ni kama.

29Ia kevaka sa tauva e dua na tagane se dua na yalewa, na mate e na uluna se kumina; 30me qai dikeva na mate na bete; ia kevaka sa rairai ni sa kakana; a sa tu kina na drauna dromodromoa e matailalai; me qai tukuni koya na bete ni sa sega ni savasava: oqo na bu ca mamaca, io na vukavuka e na uluna se kumina. 31Ia kevaka sa dikeva na mate ni bu ca na bete; ka sa rairai me vaka sa tiko walega e na kulina, ka sa sega kina na drauna loaloa; me qai sogolati koya sa tauvi bu ca ko koya na bete, ka bogi vitu: 32ia e na kenai kavitu ni siga me dikeva na mate na bete: ia kevaka sa sega ni tetela na bu ca, a sa sega kina na drauna dromodromoa, ka sa rairai na bu ca ni sa tiko walega e na kulina; 33me qai tasi ko koya, ia me kakua ga ni tasia na tikina e bu ca; me qai sogolati koya sa tauvi bu ca na bete, ka bogi vitu tale: 34ia e na kenai kavitu ni siga me dikeva na bu ca na bete; ia, kevaka sa sega ni tetela e na kulina na bu ca, ka sa sega ni kakana ki na lewena; me qai tukuni koya na bete ni sa savasava: me sava ko koya na nonai sulu, a sa savasava. 35Ia kevaka sa tetela vakalevu na bu ca e na kulina, ni sa savasava oti; 36me qai dikevi koya na bete: ia kevaka sa tetela na bu ca e na kulina, me qai kakua ni vakasaqara na drauna dromodromoa na bete; sa sega ni savasava ko koya. 37Ia kevaka sa rairai vua ni sa tu ga na bu ca, a sa tubu kina na drauna loaloa; sa mavo na bu ca, sa savasava ko koya; ia me tukuni koya na bete ni sa savasava.

38Ia kevaka sa dua na tagane se dua na yalewa, sa tu e na kulina na tikina eso sa rama, na tikina rama e vulavula; 39me qai dikeva na bete: ia kevaka sa vulavula ka loaloa mai na tikina sa rama e na kulina; oqo na tikina tavukadiridiri sa tubu e na kulina; sa savasava ko koya.

40Ia na tamata sa lutu na drau ni uluna, sa ulu cou; ia sa savasava ga: 41kei koya sa lutu na drau ni uluna mai na yadrena, sa yadre drika; ia sa savasava ga. 42Ia kevaka sa tu e na ulu cou, se na yadre drika, e dua na drakusi sa vulavula ka damudamu mai; oqo na vukavuka sa tubu e na uluna sa cou, se na yadrena sa drika: 43Ia me dikevi koya na bete: ia kevaka sa vulavula ka via damudamu mai na vuvuce ni drakusi e na uluna sa cou, se na yadrena sa drika, me vaka nai rairai ni vukavuka e na kulina; 44sa qai tamata vukavuka ko koya, sa sega ni savasava: me tukuni koya na bete ni sa sega sara ni savasava; sa tiko e na uluna na nona mate.

45Ia ko koya sa vukavuka, me dresulaki na nonai sulu, ka me kua ni vakaisala na uluna, ka me tabonaki na tebenigusuna e cake, ka me qai kacivaka ko koya, Au sega ni savasava! au sega ni savasava! 46A veisiga kecega sa mate kina ko koya, ena sega ni savasava: sa sega ni savasava ko koya: me tiko ga vakai koya; me tiko e nai bili ni tikotiko na nona vale.

47Ai sulu talega sa tu kina na vukavuka, sei sulu vutika ni sipi sei sulu lineni; 48se sa tiko e ketena se dakuna, e na vutika ni sipi sei sulu lineni, e na kuli ni manumanu, se dua na ka sa caka maikina: 49ia kevaka sa via karakarawa se via damudamu mai na mate e nai sulu, se na kuli ni manumanu, e ketena se dakuna, se dua na ka sa caka e na kuli ni manumanu; oqo na vukavuka, ia me vakaraitaki vua na bete: 50ia me dikeva na mate na bete, ka noca vakatikitiki tani, ka bogi vitu: 51me qai raica tale ko koya na mate e na kenai kavitu ni siga: kevaka sa teteva nai sulu na mate, e na ketena se dakuna, se na kuli ni manumanu, se dua na ka sa caka maikina; sa qai vukavuka kakana na mate ko ya: sa sega ni savasava. 52Me vakama ko koya nai sulu ko ya, ke tiko e ketena se dakuna, ke vutika ni sipi sei sulu lineni, se dua na ka sa caka e na kuli ni manumanu, sa tiko kina na mate: ni sa vukavuka kakana; me vakamai e na bukawaqa.

53Ia kevaka sa dikeva na bete, ka sa sega ni teteva nai sulu na mate, e ketena se dakuna, se dua na ka sa caka e na kuli ni manumanu; 54me qai vakarota na bete me ra savata na ka sa tu kina na mate, ena qai noca vakatikitiki tani, ka bogi vitu tale: 55me qai raica na mate na bete, ni sa sava oti: ia kevaka sa sega ni roka tani mai na mate, a sa sega ni teteva na mate; sa sega ni savasava; mo vakama e na bukawaqa; sa teteva eloma, se dravudravua e ketena se dakuna. 56Ia kevaka sa dikeva na bete; ia ke sa loaloa mai na mate ni sa sava oti; me qai dresuka tani mai nai sulu, se na kuli ni manumanu, ke tiko e ketena se dakuna: 57ia kevaka sa rairai tiko e nai sulu, e ketena se dakuna, se dua na ka sa caka e na kuli ni manumanu; sa teteva tiko; mo vakama e na bukawaqa na ka sa tiko kina na mate. 58Ia nai sulu, na ketena se dakuna, se dua na ka sa caka e na kuli ni manumanu, ko sa sava oti, kevaka sa takali tani kina na mate, me qai baci sava tale, ena qai savasava.

59Oqo na lewa e na vuku ni vukavuka e nai sulu, se vutika ni sipi sei sulu lineni, ke tiko e ketena se dakuna, se dua na ka sa caka e na kuli ni manumanu, me tukuni kina ni sa savasava, se me tukuni ni sa sega ni savasava.

Vakavakadewa Makawa

©1974 Bible Society of the South Pacific

More Info | Version Index