Search form

NA VUNAU NI SORO 17

Sa tabu me ra vakacabora vakailoa nai soro e na yasana kecega ko ira na tamata, 1-9. Sa tabu me laukana na dra, 10-14, se na ka sa mate loa se dresulaka na manumanu, 15,16.

1A sa vosa vei Mosese ko Jiova, ka kaya, 2Mo vosa vei Eroni kei iratou na luvena, kei ira kece na Isireli, ka kaya vei ira, Oqo na ka sa vakarota ko Jiova, ka vaka, 3A tamata kecega vei ira na mataqali i Isireli sa vakamatea na pulumokau, se lami, se me, e loma ni tikotiko, se vakamatea e nai bili ni tikotiko, 4a sa sega ni kauta ki na katuba ni vale ni veitavaki, me cabora nai madrali vei Jiova, e na mata ni vale nei Jiova; ena beitaki na tamata ko ya ni sa vakadave dra: sa vakadavea walega na dra ko koya; ia ena muduki tani na tamata ko ya mai vei ira na kai nona: 5ka me ra kauta ga na nodra i soro na Isireli era vakacabora mai vanua, io me ra kauta vei Jiova, ki na katuba ni vale ni veitavaki, vua na bete, ka vakacabora mei madrali ni veivinakati sa cabori vei Jiova. 6Ia me kureitaki na dra na bete e na dela ni cabocabo-ni-soro i Jiova, sa tu mai na katuba ni vale ni veitavaki, ka vakama na uro me ka boi vinaka vei Jiova. 7Ia me ra kakua ni vakacabora tale na nodra i soro vei ira na me tagane, era sa lako tani kina me muria. A ka oqo sa kenai lesilesi ka tawa mudu vei ira e na nodra veitabatamata.

8Ia mo kaya vei ira, A tamata kecega vei ira na mataqali i Isireli, se na kai tani sa tiko vulagi kei ira, sa vakacabora nai soro kama se dua nai soro, 9ka sega ni kauta ki na katuba ni vale ni veitavaki, me vakacabora vei Jiova; na tamata ko ya ena muduki tani vei ira na kai nona.

10Ia na tamata kecega vei ira na mataqali i Isireli, se na kai tani sa tiko vulagi kei ira, sa kania e dua na dra; ena dua tani kina na mataqu vua na tamata ko ya sa kana dra, ia ka'u na muduki koya tani mai vei ira na kai nona. 11Ni sa kena bula ni yago na dra: ia ka'u sa solia vei kemudou me sorovaka na yalomudou e na dela ni cabocabo-ni-soro: ia sa rawa mei soro na dra, ni sai koya na bula. 12O koya ka'u a kaya kina vei ira na Isireli, Me kakua e dua vei kemudou me kania na dra, me kakua talega ni kania na dra e dua na kai tani sa tiko vulagi kei kemudou.

13Kei na tamata kecega vei ira na Isireli, se vei ira na kai tani sa tiko vulagi kei ira, sa vakasasa manumanu e yavai va se manumanu vuka sa tara me laukana; me livia mada ga ko koya na kena dra, ka ubia e na soso. 14Ni sa kena bula ni yago kecega na dra sa tu e na yagona: o koya ka'u a kaya kina vei ira na Isireli, Mo dou kakua ni kania na dra ni dua na manumanu: ni sa kena bula ni yago kecega na dra sa tu e na manumanu kecega: ko ira kecega sa kania ena muduki tani.

15Kei na tamata kecega sa kania na ka sa mate vakailoa, se na ka sa katilaka na manumanu, se dua vei kemudou, se sa kai tani, me sava nonai sulu ko koya, ka sili e na wai, ia ena sega ni savasava ka yacova na yakavi: ena qai savasava. 16Ia kevaka sa sega ni sava nonai sulu, se sili e na wai, ena qai cudruvi e na nona caka ca.

Vakavakadewa Makawa

©1974 Bible Society of the South Pacific

More Info | Version Index