Search form

NA VUNAU NI SORO 18

Sa kaya ko Jiova me ra muria na nona vunau, 1-5. Me ra kakua ni veiwatini na veiwekani, 6-18. Me ra kakua ni kitaka na ka vakasisila, 19-30.

1A sa vosa vei Mosese ko Jiova, ka kaya, 2Mo vosa vei ira na Isireli, ka kaya vei ira, Sai au ko Jiova na nomudou Kalou. 3Mo dou kakua ni muria nai valavala ni vanua ko Ijipita, dou a tiko kina: kei nai valavala ni vanua ko Kenani, ka'u sa kauti kemudou kina, mo dou kakua ni muria; ia mo dou kakua ni muria na nodra vunau. 4Na noqu lewa ga, mo dou cakava; kei na noqu i lesilesi, mo dou vakabauta, mo dou muria ga: sai au ko Jiova na nomudou Kalou: 5o koya mo dou vakabauta kina na noqu vunau, kei na noqu lewa; o koya kevaka sa cakava ga na tamata, ena bula kina: sai au ko Jiova.

6Me kakua e dua vei kemudou me mocera e dua na yalewa dou sa veiwekani dina kaya: sai au ko Jiova.

7Mo kakua ni mocera na tinamu, o koya erau sa veimoceri kei tamamu; sa tinamudina ko koya: mo kakua ni moce vata kaya.

8Mo kakua ni moce vata kaya na wati i tamamu; erau sa veimoceri kei tamamu ko koya.

9Mo kakua ni mocera na ganemu, se sa luve i tamamu, se sa luve i tinamu, se sa sucu mai nomudou, se sa sucu tani, mo kakua ni moceri ira.

10Mo kakua ni mocera na makubumu, se sa luvena yalewa na luvemu tagane, se sa luvena yalewa na luvemu yalewa: ni rau a tubu vua e dua drau a moce vata kaya. 11Mo kakua ni moce vata kei na luve i tamamu ka yalewa, o koya sa vakasucuma vua ko watina, sa ganemu ko koya. 12Mo kakua ni moce vata kei na gane i tamamu: ni sa wekana dina na tamamu ko koya.

13Mo kakua ni moce vata kei na taci i tinamu, se tuakana, ni sa wekana dina na tinamu ko koya. 14Mo kakua ni moce vata kei na wati i tamamu lailai, sa tinamu lailai ko koya. 15Mo kakua ni mocera na watina na luvemu tagane; mo kakua ni ca kaya. 16Mo kakua ni mocera na watina na tuakamu, se na watina na tacimu. 17Mo kakua ni mocera e dua na yalewa, kei na luvena yalewa, se dua na makubuna yalewa; ni ratou sa veiwekani dina; oqo na ka ca. 18Mo kakua talega ni vakawati kei na tuakana na watimu se na tacina, ni sa bula tiko ko koya, mo vakararawataki koya kina.

19Mo kakua talega ni mocera e dua na yalewa e na gauna sa vakatabui tu kina, ni tauvi koya na mate vakayalewa.

20Mo kakua talega ni mocera na watina na kai nomu, mo vakavelavelataki iko vata kaya.

21Ia mo kakua ni vakacabora e dua na luvemu e na bukawaqa vei Moloke, ia mo kakua ni vakacacana na yaca ni nomu Kalou: sai au ko Jiova. 22Mo kakua ni koto vata kaya na tagane me vaka kei na yalewa: oqo sa ka vakasisila. 23Mo kakua talega ni koto kaya e dua na manumanu, mo vakasisilataki iko kina: me kakua talega na yalewa me tu e mata ni manumanu me koto vua: oqo na ka ni veivakamaduataki.

24Dou kakua ni vakasisilataki kemudou e na dua na ka vakaoqo: ni ra sa vakasisilataki e na ka kecega oqo ko ira na veimatanitu, ka'u sa vakaseva tani e na matamudou: 25a sa dukadukali na vanua: o koya ka'u sa sauma kina na kenai valavala ca, ia na vanua sa luaraka tani na lewena. 26Ia mo dou vakabauta ga na noqu vunau, kei na noqu lewa, ka mo dou kakua ni kitaka e dua na ka vakasisila oqo; se na kai nomu se na kai tani sa tiko vulagi kei kemudou: 27(ni ra sa kitaka na ka vakasisila kecega oqo ko ira na lewe ni vanua era tiko kina eliu vei kemudou, a sa vakadukadukalitaki na vanua): 28me kakua ni luaraki kemudou talega na vanua, ni dou sa vakadukadukalitaka, me vaka ka luaraka na matanitu era tiko kina eliu vei kemudou. 29Ia ko ira kecega era kitaka e dua na ka vakasisila oqo, io na tamata era kitaka, era na muduki tani vei ira na kai nodra. 30O koya mo dou vakabauta kina na noqu vunau, mo dou kakua ni kitaka e dua nai valavala vakasisila oqo, sa caka eliu ni dou sa bera ni yaco kina, mo dou kakua ni vakadukadukalitaki kemudou kina: sai au ko Jiova na nomudou Kalou.

Vakavakadewa Makawa

©1974 Bible Society of the South Pacific

More Info | Version Index