Search form

NA VUNAU NI SORO 19

Sa tukuni tale eso na vunau eliu.

1A sa vosa vei Mosese ko Jiova, ka kaya, 2Mo vosa vei ira nai soqosoqo taucoko ni Isireli, ka kaya vei ira, Mo dou savasava; ni'u sa savasava koi au ko Jiova na nomudou Kalou.

3Dou rerevaka na tamata yadua na tinana kei na tamana, ka vakatabuya na noqu veisiga ni vakacecegu: Koi au ko Jiova na nomudou Kalou.

4Dou kakua ni vuki vei ira na kalou lasu, se cakava vei kemudou na kalou e na ka sa vakawaicalataki: Koi au ko Jiova na nomudou Kalou.

5Ia kevaka dou sa vakacabora eso nai madrali ni veivinakati vei Jiova, dou vakacabora mo dou vinakati kina: 6me laukana ga e na siga dou sa cabora kina, kei na mataka: ia kevaka sa vo e na kenai katolu ni siga, me vakamai e na bukawaqa. 7Ia kevaka sa kani e dua na tikina e na kenai katolu ni siga, sa vakasisilataki; ena sega ni donu. 8Ia ko koya sa kania ena cudruvi e na nona caka ca, ni sa cakava me ka wale na ka tabu i Jiova: ia na tamata ko ya ena muduki tani maivei ira na kai nona.

9Ia ni dou sa tamusuka na vuata ni nomudou vanua, mo kakua ni tamusuka kece sara na tutu ni nomu veiwere, ka kakua ni tomitomika na ka sa vo e na nomu vuata. 10Ia mo kakua ni tomitomika na nomu veivaini, se tauca na vua ni vaini kecega e na nomu veivaini: mo laiva ga me nodra na dravudravua kei na vulagi: Koi au ko Jiova na nomudou Kalou.

11Dou kakua ni butako; ia dou kakua ni cakacaka vakailasu, se vosa lasu, e dua vua e dua. 12Dou kakua talega ni bubului vakailasu e na yacaqu; ia mo kakua ni vosavakacacataka na yaca ni nomu Kalou: Koi au ko Jiova. 13Mo kakua ni vakasaurarataka na kai nomu, se butakoca: na kenai voli ni nomu tamata cakacaka, me kakua ni tiko vei iko e na bogi ka siga.

14Mo kakua ni rukaki koya sa didivara, se biuta e dua na ka e na mata ni mataboko me tarabe kina, ia mo rerevaki koya ga na nomu Kalou: Koi au ko Jiova.

15Dou kakua ni cakava e dua na ka sa sega ni dodonu ni dou sa ia na veilewai: mo kakua ni golevi koya sa dravudravua, se dokai koya na turaga levu: mo lewa vakadodonu ga vua na kai nomu.

16Mo kakua ni daukakase voli e na kedra maliwa na kai nomu: mo kakua ni vosa me mate na kai nomu: Koi au ko Jiova. 17Mo kakua ni cata na wekamu e lomamu: mo vunauca dina ga na kai nomu, ka kakua ni laiva mei valavala ca. 18Mo kakua ni cudruva, se naki ca me saumi ira na luvedra na kai nomu, mo lomani koya ga na kai nomu me vaka ko sa lomani iko: Koi au ko Jiova. 19Dou vakabauta na noqu vunau. Me kakua ni kabata na nomu manumanu e na veiyavusa sa dua tani, me vakaluvea kina. Mo kakua ni kaburaka vata na sore ni sila kei na sore ni ka tani e na nomu were: mo kakua talega ni sulumaka nai sulu lineni ka vutivuti talega.

20Ia ko koya sa mocera e dua na yalewa bobula, sa musuki vua e dua me watina, ka sega sara ni voli, se soli na kenai sere; erau na cudruvi: erau na sega ni vakamatei, ka ni sa bobula ko koya. 21Ia me kauta na tagane na nonai soro ni caka cala vei Jiova, ki na katuba ni vale ni veitavaki, io na sipi tagane mei soro ni caka cala. 22Ia ena sorovaki koya na bete, e na sipi tagane sai soro ni caka cala, e na mata i Jiova, e na vuku ni valavala ca sa cakava ko koya: ena qai sega ni cudruvi e na vuku ni valavala ca sa cakava ko koya.

23Ia ni dou na yaco ki na vanua ko ya, ka sa tea oti na kau kecega sa laukana na vuana, dou na qai nanuma na vuana me vaka e dua sa sega ni cili: me tolu na yabaki me vaka sa sega ni cili vei kemudou; me kakua ni kani. 24Ia e na kenai kava ni yabaki ena tabu na vuana kecega, me vakavinavinakataki kina ko Jiova. 25Ia e na kenai kalima ni yabaki mo dou kania na vuana, me dauvuataka kina vei kemudou na kena vuata: Koi au ko Jiova na nomudou Kalou.

26Mo dou kakua ni kania e dua na ka sa tu kina na kena dra; mo ni kakua talega ni parofisai e na gata, se daudigitaka na siga eso.

27Mo dou kakua ni kotiva na tutu ni ulumudou, se vakacacana na tutu ni kumimudou. 28Mo dou kakua ni tavalaka na yagomudou e na vuku ni mate, se samuqawetaka na yagomudou: Koi au ko Jiova.

29Mo kakua ni vakacacana na luvemu yalewa ni ko soli koya me dautagane; de sa gole ki na veibutakoci na vanua, ka sinai kina na vanua e na ca.

30Dou vakabauta na noqu veisiga ni vakacecegu, ka vakarokorokotaka na noqu vale tabu: Koi au ko Jiova. 31Dou kakua ni golevi ira sa daucurumi, se tarogi ira na dauveinita, mo dou vakadukadukalitaki kina: Koi au ko Jiova na nomudou Kalou.

32Mo tu cake e matadra sa sika na uluna, ka doka na matadra na tamata qase, ka rerevaka na nomudou Kalou: Koi au ko Jiova.

33Ia kevaka sa tiko vulagi kei iko e na nomudou vanua e dua na kai tani, mo dou kakua ni vakararawataki koya: 34na kai tani sa tiko vulagi kei kemudou ena tautauvata vei kemudou kei na dua na kai nomudou, ia mo lomani koya me vaka ko sa lomani iko; ni dou a vulagi mai na vanua ko Ijipita: Koi au ko Jiova na nomudou Kalou.

35Dou kakua ni lewa vakatawadodonu, e nai vakarau ni balavu ni ka, se nai vakarau ni bibi ni ka se nai vakarau ni levu ni ka: 36me dodonu ga na nomudou i vakarau ni bibi, me dodonu na kena bibi, me dodonu nai vakarau ni ka mamaca, ka dodonu nai vakarau ni ka liviraki; Koi au ko Jiova na nomudou Kalou, ka kauti kemudou tani mai na vanua ko Ijipita. 37Mo dou vakabauta kina na noqu vunau kecega, kei na noqu lewa, ka mo dou cakava: Koi au ko Jiova.

Vakavakadewa Makawa

©1974 Bible Society of the South Pacific

More Info | Version Index