Search form

NA VUNAU NI SORO 2

Ai madrali madrai droka, 1-3; na madrai sa vavi, 4; na madrai sa tavu, 5-10; na oni kei na leveni, 11,12; na masima, 13; kei nai sevu ni vanua, 14-16.

1Ia ni sa vakacabora e dua na tamata nai madrali laukana vei Jiova, me madrai droka vinaka na nonai madrali; ia me livia kina ko koya na waiwai; ka viritaka kina na drega me vakamai: 2me qai kauta vei ira na bete na luve i Eroni: me taura maikina na madrai droka vinaka sa yakuta rawa e ligana, ka dua na kena waiwai, kei na kena drega kecega me vakamai; ia me vakama eso e na dela ni cabocabo-ni-soro na bete mei vakananumi, na ka sa vakacabori e na bukawaqa, me ka boi vinaka vei Jiova: 3ia na kena vo ni madrali laukana, ena kei Eroni kei iratou na luvena: oqo na ka tabu sara e na ka sa vakacabori e na bukawaqa vei Jiova.

4Ia ni ko sa vakacabora nai madrali laukana sa vavi e na lovo, me so na keki sa caka e na madrai droka vinaka sa sega ni vakalevenitaki, sa veiwaki vata kei na waiwai, se me keki mamare sara sa sega ni vakalevenitaki, sa boro e na waiwai.

5Ia kevaka sa nomu i madrali nai madrali laukana sa tavu e na dari kaukamea, me madrai droka sa sega ni vakalevenitaki, sa veiwaki vata kei na waiwai: 6mo dovia, ka livia kina na waiwai: o koya nai madrali laukana.

7Ia kevaka sa nomu i madrali nai madrali laukana mai nai tavuteke, me caka e na madrai droka vinaka kei na waiwai. 8Ia mo kauta nai madrali laukana sa caka e na ka oqo vei Jiova: ia ni sa soli vua na bete, me kauta ko koya ki nai cabocabo-ni-soro. 9Ia me na kauta tani nai vakananumi mai nai madrali laukana ko koya na bete, ka vakama e dela ni cabocabo-ni-soro: me ka sa cabori e na bukawaqa, me boi vinaka vei Jiova. 10Ia na kena vo ni madrali laukana ena kei Eroni kei iratou na luvena: oqo na ka tabu sara e na ka sa vakacabori e na bukawaqa vei Jiova.

11Me kakua e dua nai madrali laukana dou sa vakacabora vei Jiova, me vakalevenitaki: ia mo dou kakua ni vakama e dua na leveni, se na oni, me ka e cabori e na bukawaqa vei Jiova: 12e nai madrali ni sevu ga dou na vakacabora vei Jiova; ia me kakua ni cabori e nai cabocabo-ni-soro me ka boi vinaka.

13Ia nai madrali laukana kecega ko na vakacabora mo vakamasimataka; ia mo kakua talega ni guilecava na masima ni veiyalayalati ni nomu Kalou e na nomu i madrali laukana: mo vakacabora vata kei na masima na nomu i madrali kecega.

14Ia kevaka ko sa vakacabora eso nai sevu mei madrali vei Jiova, mo cabora mei madrali laukana ni nomu i sevu na sila vou sa vakararagi e na bukawaqa, sa lauvutu mai na sola vakalewena. 15Ia mo livia kina na waiwai, ka virinoca ki delana na drega me vakamai: oqo nai madrali laukana. 16Ia na bete me vakama na kenai vakananumi, eso na kena sila sa lauvutu, ka dua na kena waiwai, kei na kena drega kecega me vakamai, oqo na ka sa cabori e na bukawaqa vei Jiova.

Vakavakadewa Makawa

©1974 Bible Society of the South Pacific

More Info | Version Index