Search form

NA VUNAU NI SORO 20

Sa tukuna ko Jiova eso tale na ka e tabu.

1A sa vosa vei Mosese ko Jiova, ka kaya, 2Mo kaya tale vei ira na Isireli, A tamata yadua vei ira na Isireli, se vei ira na kai tani sa tiko vulagi kei ira na Isireli, sa solia e dua na luvena vei Moloke; ena vakamatei vakaidina ko koya: me ra vakaviriki koya e na vatu ko ira na lewe ni vanua. 3Ia ka'u na cudruva na tamata ko ya, ka muduka tani vei ira na kai nona; ni sa solia e dua na luvena vei Moloke, me vakadukadukalitaka na noqu vale tabu, ka vakacacana na yacaqu tabu. 4Ia kevaka sa tabonaka na matadra vua na tamata ko ya ko ira na lewe ni vanua, ni sa solia e dua na luvena vei Moloke, ka sega ni vakamatei koya: 5au na qai cudruva na tamata ko ya, kei na nona lewe-ni-vale, ka muduki koya tani, kei ira kece era sa muri koya, me gole vei Moloke, maivei ira na kai nodra. 6Kei na tamata sa golevi ira sa daucurumi, kei ira na dauveinita, me muri ira, ka'u na cudruva na tamata ko ya, ka muduka tani maivei ira na kai nona. 7O koya mo dou vakasavasavataki kemudou kina, mo dou savasava: ni sai au ko Jiova na nomudou Kalou: 8Ia dou vakabauta na noqu vunau, ka cakava: Koi au ko Jiova, o koya sa vakasavasavataki kemudou.

9Ena vakamatei vakaidina ko koya yadua sa rukaka na tamana se tinana: sa rukaka na tamana se tinana ko koya; sa baleti koya ga na nona mate.

10A tagane talega sa veibutakoci kei na watina na tani, io sa veibutakoci kei na wati ni kai nona, erau na vakamatei vakaidina ruarua, na tagane sa dauyalewa kei na yalewa sa dautagane.

11Kei na tagane sa koto kei na wati ni tamana, sa veibutakoci kei koya erau sa veiyacovi kei tamana; erau na vakamatei vakaidina ruarua; sa baleti rau ga na nodrau mate.

12Ia kevaka sa moce e dua na tagane kei na watina na luvena tagane, erau na vakamatei vakaidina ruarua: erau sa kitaka na ka ni veivakamaduataki; sa baleti rau ga na nodrau mate.

13Ia kevaka sa koto kei na tagane e dua na tagane me vaka sa koto kei na yalewa, erau sa kitaka ruarua na ka vakasisila: erau na vakamatei vakaidina; sa baleti rau ga na nodrau mate.

14Ia kevaka e dua na tagane sa na vakawati kei na dua na yalewa kei na tinana, sa ka ca sara: eratou na vakamai e na bukawaqa, ko koya kei rau talega; me kakua kina na ca e na kemudou maliwa.

15Ia kevaka sa koto kei na manumanu e dua na tagane, ena vakamatei vakaidina ko koya; mo dou vakamatea talega na manumanu. 16Ia kevaka sa dua na yalewa sa torova e dua na manumanu, me koto kaya, mo dou vakamatea na yalewa, kei na manumanu: erau na vakamatei vakaidina; sa baleti rau na nodrau mate.

17Ia kevaka sa dua na tagane sa vakawati kei na ganena, na luve i tamana, se na luve i tinana, ka rau sa veibutakoci, erau sa kitaka na ka e veivakamaduataki; erau na muduki tani e na matadra na kai nodrau: sa veibutakoci kei na ganena na tagane ko ya: ena cudruvi ko koya e na nona caka ca.

18Ia kevaka erau sa veimoceri na tagane kei na yalewa ni sa tauvi mate vakayalewa; sa vakarairaitaka na nona vure ko koya na tagane; ia sa vakarairaitaka na nona vure ni dra ko koya na yalewa; a rau na muduki tani ruarua vei ira na kai nodrau.

19Mo kakua talega ni veimoceri kei na taci i tinamu se na tuakana, se na gane i tamamu: ni sa veimoceri ni veiwekani dina oqo: erau na cudruvi e na nodrau caka ca. 20Ia kevaka sa veimoceri na tagane kei na wati ni tamana lailai sa veimoceri ko koya kei koya erau sa veiyacovi kei tamana lailai: erau na cudruvi e na nodraui valavala ca; erau na mate sa na sega na luvedrau. 21Ke dua na tagane sa taura na watina na tuakana se tacina, sa ka velavela: sa veimoceri ko koya kei koya erau sa veiyacovi kei tuakana se tacina; ena sega na luvedrau.

22Ia dou muria na noqu vunau kecega, kei na noqu lewa kecega, ka cakava: me kakua ni luaraki kemudou kina na vanua ka'u sa kauti kemudou kina mo dou tiko kina. 23Ia dou kakua ni muria nai valavala ni matanitu, ka'u sa vakaseva tani e na matamudou: ni ra a kitaka na ka kecega oqo, era qai velavela sara vei au: 24ia ka'u a kaya vei kemudou, Dou na taukena na nodra vanua, ia ka'u na solia vei kemudou mo dou taukena, a vanua sa dave kina na wai-ni-sucu kei na oni: Koi au ko Jiova na nomudou Kalou, o koya sa tawasei kemudou tani maivei ira na veimatanitu.

25Dou vakatakilakilataka kina na manumanu savasava kei na manumanu sa sega ni savasava, kei na manumanu vuka sa savasava kei na manumanu vuka sa sega ni savasava: mo dou kakua kina ni vakavelavelataki kemudou e na vuku ni manumanu e yavai va, se na manumanu vuka, se dua na ka sa yaqa voli e na qele, ka'u sa wasea tani me sega ni savasava vei kemudou. 26Ia dou savasava vei au: ni'u sa savasava koi au ko Jiova, ia ka'u sa tawasei kemudou maivei ira na veimatanitu, mo dou noqu.

27Ia na tagane se yalewa sa daucurumi, se sa dauveinita, me vakamatei vakaidina: me ra vakaviriki ira e na vatu: sa baleti ira na nodra mate.

Vakavakadewa Makawa

©1974 Bible Society of the South Pacific

More Info | Version Index