Search form

NA VUNAU NI SORO 22

Sa tabu vua na bete sa sega ni savasava me kania na ka tabu, 1-7; a sa tabu na ka sa mate loa, se katilaki, 8,9. Sa tabu vua na vulagi me kania na ka tabu, 10-16. A ka mei soro me sega na kena ca, 17-25. Ai valavala ni soro, 26-33.

1A sa vosa vei Mosese ko Jiova, ka kaya, 2Mo vosa vei Eroni kei iratou na luvena, me ra tawasei ira mai na ka sa tabu vei ira na Isireli, me ra kakua ni vakacacana na yacaqu tabu e na ka era vakatabuya me noqu: Koi au ko Jiova. 3Mo kaya vei ira, O koya vei ira kecega na nomudou kawa, e na nomudou veitabatamata, sa toro ki na veika tabu era vakatabuya vei Jiova na Isireli, ni sa sega ni savasava, a tamata ko ya sa na muduki tani e mataqu: Koi au ko Jiova. 4A tamata kecega vei ira na luve i Eroni sa vukavuka, se turi, me kakua ni kania ko koya na ka tabu, ka me savasava mada ko koya. Kei koya sa tara na ka sa sega ni savasava e na vuku ni mate, se na tamata sa yau loa na nona wai ni tagane; 5se koya sa tara e dua na ka sa qasi, sa vakatawasavasavataki kina, se sa tara na tamata sa tu vua e dua na ka ka sa vakatawasavasavataki kina; 6na tamata sa tara e dua sa vakakina, ena sega ni savasava ka yacova na yakavi, ka na sega ni kania na ka tabu, kevaka sa sega ni sili mada e na wai. 7Ia ni sa dromu na mata-ni-siga, ena savasava, ka me qai kania na ka tabu, ni sa kena kakana oqo. 8A ka sa mate loa, se sa katilaki, me kakua ni kania ko koya me vakavelavelataki kina: Koi au ko Jiova. 9Ia me ra vakabauta na noqu vunau, de ra cudruvi e na nodra cala, ka mate kina, ni ra sa vakacacataka: Koi au ko Jiova, ka vakasavasavataki ira.

10Me kakua ni kania na ka tabu e dua na kai tani: a nona vulagi na bete, se nona tamata sa voli na nona cakacaka, me kakua ni kania na ka tabu: 11ia kevaka sa volia e dua na tamata e nai lavo ko koya na bete, me kana kina ko koya, kei koya sa sucu e nona vale: me ra kania na kena. 12A luvena yalewa talega na bete, o koya sa veiwatini kei na kai tani, me kakua ni kana ko koya e nai madrali sa lavelaveti mai na ka tabu. 13Ia kevaka sa yada na luvena yalewa na bete, se veibiu kei na watina, ka sega na luvena, a sa lesu tale ki na vale nei tamana, me vaka ni sa goneyalewa, me kania ga na kei tamana: ia me kakua na kai tani me kania. 14Ia kevaka sa kania loa na ka tabu e dua na tamata ni sa sega ni kila, me qai solia vua na bete na ka sa tautauvata kei na ka tabu, ka kuria e na dua na kena wase ni sa wase lima. 15Ia me ra kakua ni vakacacana na nodra ka tabu na Isireli, era sa vakacabora vei Jiova; 16ia ni ra kania na kedra ka tabu, era vakavuna na nona cudruvi e na nodra caka cala; ni sai au ko Jiova, sa vakasavasavataki ira.

17Sa vosa talega vei Mosese ko Jiova, ka kaya, 18Mo vosa vei Eroni, kei iratou na luvena, kei ira kece na Isireli, ka kaya vei ira, Ko koya yadua vei ira na mataqali i Isireli, se na kai tani sa tiko kei ira na Isireli, sa vakacabora na nonai madrali, e na vuku ni dua na nona bubului, kei na nonai soro kecega sa lomana me vakacabora, era via cabora vei Jiova mei soro kama; 19mo dou vinakati kina, me dua na ka tagane sa sega na kena ca, se pulumokau, se sipi, se me. 20Ia na ka sa dua kina na kena ca, dou kakua ni cabora: ni na sega ni ka dou na vinakati kina. 21Ia ko koya yadua sa vakacabora e dua nai madrali ni veivinakati vei Jiova, me vakayacora na ka ka bubului kina, se nai soro sa lomana ga me cabora, se pulumokau se sipi, me sega na kena ca, me vinakati; me kakua kina e dua na kena ca. 22A mataboko, se ramusu, se mudu e dua na tikina, se dabo, se sa bu ca se vakanana, dou kakua ni vakacabora oqo vei Jiova, se vakacabora vei Jiova e dua na ka oqo e na bukawaqa, e na dela ni cabocabo-ni-soro. 23A pulumokau, se lami, sa dua na tikina sa vakatani se yali e dua na tikina, oqo e tara mo vakacabora ni sa lomamu ga; ia me vakayacori me ka ni bubului, ena sega ni donu kina. 24Dou kakua ni vakacabora vei Jiova na ka sa qaqi na qalana, se vorolaki, se ramusu, se sa sele; ia dou kakua ni cabora e dua na ka oqo e na nomudou vanua. 25Dou kakua talega ni taura vei ira na kai tani e dua na ka vakaoqo mo vakacabora me kakana me nei koya na nomudou Kalou; ni sa tu kina na kena vuca, kei na kena ca: dou na sega ni vinakati kina.

26Sa vosa talega vei Mosese ko Jiova, ka kaya, 27Ni sa sucu e dua na pulumokau, se sipi, se me, me tiko voli kei tinana ka bogi vitu; ia e na kenai kawalu ni siga, kei na veisiga emuri, ena donu ni sa cabo e na bukawaqa mei soro vei Jiova. 28Ia na pulumokau yalewa se sipi yalewa, dou kakua ni vakamatea ruarua, ko koya kei na luvena, e na siga e dua.

29Ia ni dou sa via vakacabora e dua nai soro ni vakavinavinaka vei Jiova, mo dou vakacabora mo dou vinakati kina: 30e na siga ko ya ga me kani; me kakua ni vo ki na mataka: Koi au ko Jiova.

31Ia dou vakabauta na noqu i vakaro, ka muria: Koi au ko Jiova. 32Dou kakua tale ni vakacacana na yacaqu tabu; ia ka'u na vakarokorokotaki ga vei ira na Isireli: Koi au ko Jiova, o koya ka vakasavasavataki kemudou, 33ka'u a kauti kemudou mai na vanua ko Ijipita, me'u nomudou Kalou: Koi au ko Jiova.

Vakavakadewa Makawa

©1974 Bible Society of the South Pacific

More Info | Version Index