Search form

NA VUNAU NI SORO 24

A waiwai ni cina, 1-4. A madrai dauraici, 5-9. Sa rukaka na Kalou na luvei i Silomeci, 10-16. A lewa e na veivakamatei, kei na veivakacacani, 17-22. Sa lauviri ko koya ka rukaka na Kalou, 23.

1A sa vosa vei Mosese ko Jiova, ka kaya, 2Mo vakaroti ira na Isireli, me ra kauta mai vei iko na waiwai olive makare sa lauvutu, me yaga e na cina, me caudre tikoga kina na cina. 3Me vakarautaka ko Eroni, mai taudaku ni lati ni kato ni vunau, e na vale ni veitavaki, me caudre tikoga mai na yakavi me yacova na mataka, e na mata i Jiova; oqo sa kenai lesilesi ka tawa mudu e na nomudou veitabatamata. 4Me vakarautaka tikoga ko koya na veicina e nai tutu-ni-cina makamakalivata, e na mata i Jiova.

5Ia mo kauta na madrai droka vinaka, ka vavia e tinikarua na keki: me rua na omeri e na dua na keki: 6mo qai tuva me yatu rua, me yaono na yatu yadua, e na dela ni tepeli makamakalivata e na mata i Jiova: 7mo qai viritura na drega dina me vakamai e na dela ni yatu kadua, me tu ki na madrai me dauveivakananumi, io nai madrali sa cabori e na bukawaqa vei Jiova. 8Me vakatura vinaka tikoga ko koya e na mata i Jiova e na veisiga ni vakacecegu kecega, e na vukudra na Isireli e na veiyalayalati sa sega ni mudu. 9Ia ena kedratou ko Eroni kei na luvena; me ra kania e na tikina tabu: ni sa nona ka sa tabu sara mai na veimadrali sa cabo vei Jiova e na bukawaqa, oqo nai vakaro ka sega ni mudu.

10A sa dua na luve ni yalewa ni Isireli, sa kai Ijipita na tamana, sa lako yani ki na kedra maliwa na Isireli; ka rau a veivala e nai tikotiko, na luve ni yalewa ni Isireli oqo, kei na dua na tagane ni Isireli; 11a sa vosavakacacataka na Yaca i Jiova ko koya na luve ni yalewa ni Isireli, ka ruru. A ra sa kauti koya vei Mosese: ia na yaca i tinana ko Silomeci, na luve i Tipiri, e na mataqali i Tani: 12a ra sa sogolati koya mada me vakatakilai vei ira na loma i Jiova. 13A sa vosa vei Mosese ko Jiova, ka kaya, 14Mo kauti koya sa ruru ki nai bili ni tikotiko; ia ko ira kecega sa rogoci koya, me ra tabaka na uluna e na ligadra, me ra qai vakavirika e na vatu ko ira nai soqosoqo taucoko. 15Ia mo vosa vei ira na Isireli, ka kaya, Ko koya yadua sa rukaka na nona Kalou me cudruvi e na vuku ni nonai valavala ca. 16Ia ko koya sa vosavakacacataka na yaca i Jiova, me sa vakamatei vakaidina; era na vakavirika vakaidina e na vatu ko ira nai soqosoqo taucoko: na vulagi se nai taukei, ni sa vosavakacacataka na yaca ko ya, ena vakamatei.

17Ia ko koya sa mokutamate e dua na tamata, me vakamatei vakaidina ko koya. 18Kei koya sa mokutamate na manumanu e yavai va, me sauma na manumanu ko ya e na dua sa tautauvata. 19Ia kevaka sa vakamavoataka na kai nona e dua na tamata, ena caka vua me vaka sa kitaka ko koya; 20a mavoa mei sau ni mavoa, a mata mei sau ni mata, a bati mei sau ni bati: me vaka sa vakamavoataka e dua na tamata ko koya, ena caka vaka talega kina vua. 21Io ko koya sa vakamatea na manumanu e yavai va, me sauma me vakatautauvata: ia ko koya sa vakamatea na tamata, me vakamatei. 22Me dua ga na nomudou lawa, vei koya na vulagi, vei koya nai taukei: ni sai au ko Jiova na nomudou Kalou.

23A sa vosa vei ira na Isireli ko Mosese, era qai kauti koya ka ruru ki nai bili ni koro, ka vakavirika e na vatu. A ra sa kitaka na Isireli, me vaka ka vakarota vei Mosese ko Jiova.

Vakavakadewa Makawa

©1974 Bible Society of the South Pacific

More Info | Version Index