Search form

NA VUNAU NI SORO 25

Ai kavitu ni yabaki na yabaki ni vakacecegu, 1-7. A vunau e nai valavala ni kenai kalimasagavulu ni yabaki, na yacana na jupeli, 8-55.

1A sa vosa vei Mosese ko Jiova mai na ulu-ni-vanua ko Saineai, ka kaya, 2Mo kaya vei ira na Isireli, Ni dou sa yaco ki na vanua ka'u sa solia vei kemudou, me qai ia e dua na vakacecegu vei Jiova na vanua. 3E ono na yabaki ko na kaburaka kina na sila e na nomu veiwere, ka ono na yabaki ko na samaka kina na nomu veivaini, ka kumuna na vuana: 4ia na kenai kavitu ni yabaki me sa gauna ni vakacecegu me vakacegu kina na vanua, a vakacecegu vei Jiova: mo kakua ni kaburaka na sila e na nomu veiwere, se samaka na nomu veivaini. 5A ka sa tubu mai na nomu sila ka lutu e na yabaki sa oti, mo kakua ni tamusuka, se vetia nai soso mai na nomu vaini sa sega ni samaki: sa yabaki me vakacegu kina na vanua. 6Ia ena kemudou na ka sa tubu e na gauna sa vakacegu kina na vanua; a kemu, kei na kena na nomu tamata, kei na kena na nomu vada, kei na kena na nomu tamata sa voli na nona cakacaka, kei na kena na kai tani, sa tiko vulagi kei iko, 7kei na kedra na nomu manumanu e yavai va, kei na kedra na manumanu tawa lasa sa tiko e nomu vanua, io ena kedra na ka kecega sa tubu kina.

8Ia mo qai wilika vei iko e vitu na yabaki ni vakacecegu, me vitu vakavitu na yabaki; ia na kena dede e vitu na yabaki ni vakacecegu, ko ya sa vasagavulu ka ciwa na yabaki. 9Mo qai vakauvuca yani na davui sa domo levu, e na kenai katini ni siga e na kenai kavitu ni vula: e na siga ni veibuluti, dou vakauvuca yani kina na davui e na nomudou vanua taucoko. 10Ia dou vakatabuya na kenai kalimasagavulu ni yabaki, ka kacivaka yani na veisereki kivei ira kecega na lewe ni vanua: ena yabaki ni jupeli vei kemudou; ia dou na vakalesuya na tamata yadua ki na yasana sai taukei kina eliu, dou na vakalesuya na tamata yadua talega ki na nona mataqali. 11Ena yabaki ni jupeli vei kemudou na kenai kalimasagavulu ni yabaki ko ya: dou kakua ni kaburaka na sila, se tamusuka na ka sa tubu kina mai na sila sa lutu, se vetia nai soso mai na vaini sa sega ni samaki kina: 12ni sa jupeli: ena tabu vei kemudou; dou kania ga na ka sa tubu mai na were. 13E na yabaki ni jupeli oqo dou na vakalesuya na tamata yadua ki na yasana sai taukei kina eliu. 14Ia kevaka e dua vei kemudou sa volitaka e dua na ka vua na kai nomu, se volia maivua e dua na ka dou kakua ni domo-ni-kocotaka: 15mo volia vua na kai nomu me vaka nai wiliwili ni yabaki sa oti kina na jupeli; me volitaka vei iko ko koya me vaka nai wiliwili ni yabaki ni vuata: 16ke sa vuqa na yabaki, mo vakalevutaka na kenai voli; ia ke sa vica ga na yabaki, mo vakalailaitaka na kenai voli: ni sa volitaka vei iko ko koya me vaka nai wiliwili ni vuata. 17Ia mo dou kakua ni dui cakava vakadomo-ni-koco; mo rerevaka ga na nomu Kalou: ni sai au ko Jiova na nomu Kalou.

18Ia dou cakava na noqu i vakaro, ka vakabauta na noqu lewa, ka muria; dou na qai tiko vakasautu e na vanua. 19Ia ena vuataka na kena vuata na vanua, ia dou na kana ka mamau, ka tiko vakasautu kina.

20Ia de dou sa kaya, A cava na ka me keimami kania e na kenai kavitu ni yabaki? raica, keimami na sega ni kaburaka na sila, se kumuna vata na neimami vuata: 21au na vakarota mo dou kalougata e na kenai kaono ni yabaki, ia ena vuataka kina na vuana me rauta e tolu na yabaki. 22Ia dou na kaburaka na sila e na kenai kawalu ni yabaki, ka kania na vuata makawa ka yacova nai kaciwa ni yabaki; dou na kania tiko na vuata makawa ka me kumuni mada na vuata.

23Me kakua ni volitaki na vanua me takali sara: ni sa noqu ga na vanua; ia koi kemudou dou sa kai tani ka tiko vulagi ga vei au. 24Ia e na vanua taucoko dou sa taukena, dou na solia me voli tale na vanua. 25Kevaka sa dravudravua mai na wekamu, a sa volitaka eso na nona vanua, me qai volia tale e dua na wekana na ka ka volitaka yani na wekana. 26Ia kevaka sa sega na wekana na tamata ko ya me volia tale, a sa qai rawata emuri ko koya me volia tale; 27me qai wilika ko koya na veiyabaki sa volitaki kina, ka vakasuka na kena caca ni voli vua na tamata ka volia; ka me qai lesu ko koya ki na vanua sa taukena eliu. 28Ia kevaka sa sega ni rawata me vakasuka vua, ena nona tiko ka volia me yaco mada na yabaki ni jupeli: ia e na jupeli, ena lutu mai vua, ena qai lesu ki na vanua ko koya sa taukena eliu.

29Ia kevaka sa dua na tamata sa volitaka na vale sa tiko e loma ni koro vakabai, ena qai tara me volia tale e na yabaki ka volitaka kina; ni sa sega ni oti e dua na yabaki, sa tara vua me volia tale. 30Ia kevaka sa oti dina e dua na yabaki, ka sa sega ni voli tale, ena qai nona tiko ka volia na vale ko ya, kei na nona veitabatamata ka tawa mudu ena sega ni suka e na yabaki ni jupeli. 31Ia na veivale e na koro lalai sa sega ni vakabai, ena vakatauvatani kei na veiwere ni vanua: e tara ga me voli tale, a ra na suka e na jupeli. 32Ia e na nodra veikoro na Livai, na veivale e na koro era sai taukei kina, e tara me ra volia tale na Livai e na veigauna kecega. 33Ia kevaka sa volia tale e dua vei ira na Livai; ena qai suka e na jupeli na vale ka volitaki, ka tu e na koro sai taukei kina: ni ra taukena na Livai, e na kedra maliwa na veivale e na nodra veikoro na Isireli. 34Ia na vanua sa volita na nodra veikoro sa tabu ni volitaki; ni ra sa taukena ka tawa mudu.

35Ia kevaka sa dravudravua mai na wekamu, ka sa malumalumu mai na ligana ni drau a tiko kaya, mo qai vukei koya; me vaka na kai tani, se vulagi; me bula vata kei iko ko koya. 36Mo kakua ni taura maivei koya na kenai kere ni ka sa kerea vei iko, se nai kuri ni ka: mo rerevaka ga na nomu Kalou; me bula vata kei iko na wekamu. 37Mo kakua ni solia vua na nomu i lavo me dua kina na kenai kere, se solia vua na nomu kakana me vakuria. 38Koi au ko Jiova na nomudou Kalou, ka kauti kemudou mai na vanua ko Ijipita, me solia vei kemudou na vanua ko Kenani, me'u nomudou Kalou.

39Ia kevaka sa dravudravua mai na wekamu ni drau a tiko kaya, a sa volitaki koya vei iko, mo kakua ni caka vua me vaka sa bobula: 40ena tiko ga vei iko me vaka na tamata sa voli na nona cakacaka, se vaka na vulagi; me qaravi iko, ka yacova na yabaki ni jupeli: 41me qai lako tani vei iko, ko koya, kei iratou vata kaya na luvena, ka lesu ki na nona mataqali, ia me lesu ki na vanua ka ra taukena na nona qase eliu. 42Ni ra sa noqu tamata, ka'u a kauta mai na vanua ko Ijipita: me ra kakua ni volitaki me vaka na bobula. 43Mo kakua ni valavala vakaukauwa vua; mo rerevaka ga na nomu Kalou. 44Ia na nomu tagane bobula, kei na nomu yalewa bobula, ko na rawata maivei ira na veimatanitu era sa tiko voleka vei kemudou, ni sa tara mo dou volia maikina na tagane bobula kei na yalewa bobula. 45E tara talega mo dou volia maivei ira na luve ni kai tani sa tiko vulagi kei kemudou, ka maivei ira na nodra mataqali era sa tiko kei kemudou, ko ira sa sucu vei ira e na nomudou vanua: ia dou na taukeni ira. 46Ia dou na tauri ira me nodra na luvemudou era na taravi kemudou, me ra taukena tiko emuri; era na nomudou bobula ka tawa mudu: ia vei ira ga na wekamudou na Isireli, dou kakua ni valavala vakaukauwa, e dua vua e dua.

47Ia kevaka sa vutuniyau mai na kai tani se na vulagi drau sa tiko kaya, a sa dravudravua mai na wekamu erau sa tiko vata kaya, a sa volitaki koya ko koya vua na kai tani, se vua na vulagi drau sa tiko kaya, se vei ira na kawa ni mataqali era kai tani: 48ni sa volitaki oti, sa tara me voli tale mai; me voli koya tale e dua vei ira na wekana: 49e tara me voli koya tale na tamana lailai, se na luvena na tamana lailai; se tara me voli koya tale e dua sa wekana dina sa rau mataqali vata; ia kevaka sa rawata, me sa voli koya tale ko koya. 50Ia me wilika kei koya sa voli koya mai na yabaki sa volitaki oti vua, me yacova na yabaki ni jupeli: ia nai lavo me kenai voli me na vakarauvatani kei nai wiliwili ni yabaki: ena vaka talega na nona yabaki na tamata sa voli na nona cakacaka. 51Kevaka sa vuqa na yabaki sa vo tiko, me solia tale ko koya me vakakina nai voli ni nonai sere, mai nai lavo sa voli kina. 52Ia kevaka sa vica ga na yabaki sa vo me yacova na yabaki ni jupeli, me rau qai wilika vata kaya; ka me solia tale ko koya nai lavo ni nonai sere me vaka na kena yabaki sa vo. 53Ena tiko vata kaya me vaka na tamata sa voli vakayabaki na nona cakacaka: me kakua ni valavala vakaukauwa vua ko koya e matamu. 54Ia kevaka sa sega ni voli tale vakakina, ena qai sereki ko koya e na yabaki ni jupeli, ko koya, kei iratou vata kaya na luvena. 55Ni sa noqu tamata ko ira na Isireli; era sa noqu tamata, ka'u a kauta mai na vanua ko Ijipita: Koi au ko Jiova na nomudou Kalou.

Vakavakadewa Makawa

©1974 Bible Society of the South Pacific

More Info | Version Index