Search form

NA VUNAU NI SORO 26

Sa tabu na matakau, 1. Me nanumi na siga ni vakacecegu, 2. Sa yalataki na ka vinaka vei ira sa talairawarawa, 3-13. Sa na cudruvi ko ira sa talaidredre, 14-39. Sa na lomani ira na Kalou era veivutuni mai, 40-46.

1Dou kakua ni cakava vei kemudou na kalou lasu, se nai vakatakarakara e ceuceu se vakaduria na matakau, se na vatu sai vakatakarakara, e na nomudou vanua, mo dou cuva kina: ni sai au ko Jiova na nomudou Kalou.

2Dou vakabauta na noqu veisiga ni vakacecegu, ka vakarokorokotaka na noqu vale tabu: Koi au ko Jiova.

3Kevaka dou sa muria na ka ka'u sa lesia, ka vakabauta na noqu vunau, ka cakava; 4au na qai vakatauca vei kemudou na uca e na kena vula, ka na vuataka na kena vuata na vanua, ka vuataka na vuana na kau ni veiwere. 5Ia na nomudou samu sila ena yacova na vula e veti kina na vua ni vaini, ia dou na vetia tiko na vua ni vaini ka yacova na kaburaki sila, ia dou na kania na kemudou me mamau kina, ka tiko vakasautu e na nomudou vanua. 6Ia ka'u na solia na sautu e na vanua, dou na koto sobu kina ka sega e dua me vakarerei kemudou: au na vakaotia tani talega e na vanua na manumanu ca, ena sega talega ni lakova na nomudou vanua nai seleiwau. 7Ia dou na vakasavi ira na nomudou meca, a ra na bale e nai seleiwau e na matamudou. 8Ia e lewe lima vei kemudou ena vakasava rawa na lewe drau, ka dua na drau vei kemudou ena vakasava rawa e lewe tini na udolu: ia era na bale e nai seleiwau na nomudou meca e na matamudou. 9Ni'u na golevi kemudou, ka vakaluveataki kemudou, ka vakalewevuqataki kemudou, ka vakataudeitaka vei kemudou na noqu veiyalayalati. 10Ia dou na kania tiko na ka sa tu dede, ka kauta ki tuba na ka sa tu dede me vakaisosomitaki e na ka vou. 11Ia ka'u na vakaduria na noqu vale e na kemudou maliwa: ia ena sega ni cati kemudou na yaloqu. 12Ia ka'u na lako voli e na kemudou maliwa, ia ka'u na nomudou Kalou, ia dou na noqu tamata. 13Sai au ko Jiova na nomudou Kalou, ka'u a kauti kemudou tani mai na vanua ko Ijipita, mo dou kakua ni nodra bobula tiko; ia ka'u sa sereka nai vesu dou a vauci kina, ka qisi kemudou mo dou lako vakadodonu.

14Ia kevaka dou sa bese ni vakarorogo vei au, ka bese ni kitaka na vunau kecega oqo; 15ka sa beca ga na noqu i lesilesi, se sa cata na noqu lewa na lomamudou, mo dou kakua kina ni kitaka na noqu vunau kecega, ka sa vakacataka ga na noqu veiyalayalati: 16au na qai kitaka na ka oqo vei kemudou; au na vakayacora na domobula, na lila balavu, kei na katakata, me tauvi kemudou, me kania na matamudou, ka vakararawataka na lomamudou: ia ena sega ni yaga ni dou sa kaburaka na nomudou sila, ni ra na kania na nomudou meca. 17Ia ka'u na rai vakatani vei kemudou, ia dou na vakamatei e na matadra na nomudou meca: a ra na lewai kemudou ko ira era sa cati kemudou; ia dou na dro ni sa sega e vakasavi kemudou.

18Ia kevaka dou sa bese tiko ni vakarorogo vei au, ni sa yaco na veika oqo, au na qai cudruvi kemudou vakavitu cake e na vuku ni nomudou i valavala ca. 19Ia ka'u na muduka na kaukauwa dou sa totoka kina; ka cakava na lomalagi me vaka na kaukamea vei kemudou, kei na nomudou qele me vaka na parasa: 20ia dou na oca walega: ni na sega ni vakalewe na nomudou vanua, ka sega ni vuataka na vuana na kau ni vanua.

21Ia kevaka dou na lako vakatani vei au, ka bese ni vakarorogo vei au; au na qai vakayacora na mate ca vakavitu cake vei kemudou e na vuku ni nomudou i valavala ca. 22Ia ka'u na vakatala na manumanu tawa lasa ki na kemudou maliwa, a ra na butakoca na luvemudou, ka vakamatea na nomudou manumanu e yavai va, ka vakalewelailaitaki kemudou; ia ena sega ni lakovi na nomudou veisalatu.

23Ia kevaka dou sa bese tiko ni vakavinakataki mai vei au, ni sa yaco na veika oqo, ka sai valavala vakatani tiko vei au; 24ka'u na qai valavala vakatani talega vei kemudou, ia ka'u na cudruvi kemudou vakavitu tale, e na vuku ni nomudou i valavala ca; 25ia ka'u na vakayacora vei kemudou nai seleiwau, sa na cudrutaka na veiyalayalati, ka dou na soqoni vata kina e na nomudou loma ni veikoro; ia ka'u na tala na mate ca vei kemudou; ia dou na soli ki na ligadra na meca. 26Ni'u sa vakaotia na madrai dou sa bula kina, ena qai lewe tini na yalewa sa na vavia na kemudou madrai e na dua na lovo, a ra na vakarautaka na bibi ni kemudou madrai, ni sa bera ni vota; ia dou na kana, ka sega ni mamau.

27Ia kevaka dou na sega ni vakarorogo vei au, ni sa yaco na ka kece oqo, kai valavala vakatani tiko vei au; 28ka'u na qai valavala vakatani vei kemudou e na cudru rerevaki; ia koi au, ka'u na cudruvi kemudou vakavitu tale, e na vuku ni nomudou i valavala ca: 29ia dou na kania na lewedra na luvemudou tagane; kei na lewedra na luvemudou yalewa. 30Au na vakarusa talega na nomudou veitikina cecere, ka taya sobu na nomudou veimatakau e vaka na mata-ni-siga, ka biuta na yagomudou ni sa mate ki dela ni yagodra na nomudou matakau: ia ena cati kemudou na yaloqu. 31Ia ka'u na vakalalataka na nomudou veikoro, ka vakarusa na nomudou veivale tabu, ka'u na sega ni boica na nomudou i madrali boi vinaka. 32Au na vakarusa talega na vanua: a ra na kurabui kina ko ira na nomudou meca era tiko kina. 33Ia ka'u na vakasesei kemudou ki na veimatanitu, ka ucuna nai seleiwau me muri kemudou: ia na nomudou vanua ena lekutu wale, ka na lala na nomudou veikoro. 34Sa na qai marautaka na veisiga ni vakacecegu na vanua, ni sa lekutu tu, ni dou sa tiko e na nodra vanua na nomudou meca; sa na qai vakacegu na vanua, ka marautaka na kena siga ni vakacecegu: 35e na gauna kece sa lekutu kina, ena vakacegu; ka ni sa sega ni vakacegu e na nomudou gauna ni vakacecegu, ni dou a tiko kina.

36Ia ka'u na tala na rere me kania na lomadra era sa vo vei kemudou, e na vanua ni nodra meca; ia na rorogo ni drau-ni-kau sa cagina voli ena vakubutaki ira; a ra na dro, me vaka ni ra drotaka nai seleiwau; a ra na bale ni sa sega e vakasava: 37a ra na veibaleti, me vaka sa muri ira nai seleiwau, ni sa sega e vakasava: ia ena sega vei kemudou na kaukauwa mo dou tu kina e na matadra na nomudou meca. 38Ia dou na rusa e na kedra maliwa na veimatanitu, ia ena kani kemudou na nodra vanua na nomudou meca. 39Ia ko ira sa vo vei kemudou, ena waicala yani na yalodra, e na vuku ni nodra i valavala ca, e na nodra vanua na nomudou meca; ia e na vuku ni nodra i valavala ca na nodra qase talega, ena waicala kina na yalodra.

40Ka ra na vakatusa na nodra i valavala ca, kei nai valavala ca ni nodra qase, kei na nodra caka cala era sa kitaka vei au, ka ni ra sai valavala vakatani vei au; 41ni'u sai valavala vakatani talega vei ira, ka kauti ira ki na vanua ni nodra meca; kevaka sa qai malumalumu mai na lomadra sa sega ni cilivi, a ra sa qai vakadonuya nai sau ni nodra i valavala ca: 42au na qai nanuma na noqu veiyalayalati kei Jekope; kei na noqu veiyalayalati talega kei Aisake, kei na noqu veiyalayalati kei Eparaama, ka'u na nanuma; ka'u na nanuma talega na vanua.

43Era na takali mai na nodra vanua, ia na vanua ena marautaka na kena gauna ni vakacecegu, ni sa veikau mai ni ra sa takali kina: a ra na vakadonuya nai sau ni nodra i valavala ca, ni ra sa beca na noqu lewa, ka sa cata na noqu i lesilesi na yalodra. 44Ia ni sa oti kece na ka oqo, ka ra na tiko e na vanua ni nodra meca, au na sega ni biuti ira laivi, se cati ira me'u vakarusai ira sara, ka me vakacacataka na noqu veiyalayalati kei ira: ni sai au ko Jiova na nodra Kalou. 45Ia e na vukudra ga, ka'u na nanuma na veiyalayalati kei ira na nodra qase, ko ira ka'u a kauta tani mai na vanua ko Ijipita e na matadra na veimatanitu, me'u nodra Kalou: Koi au ko Jiova.

46Oqo nai lesilesi, kei na lewa, kei na vunau, sa cakava ko Jiova e na ulu-ni-vanua ko Saineai, e na gusu i Mosese, me veiyalayalati kina ko koya kei ira na Isireli.

Vakavakadewa Makawa

©1974 Bible Society of the South Pacific

More Info | Version Index