Search form

NA VUNAU NI SORO 5

Ai soro ni tamata sa bese ni tukutuku ni sa vakabubuluitaki; kei koya sa tara na ka sa sega ni savasava; kei koya sa bubului walega, 1-13. Ai soro tani eso ni tamata sa cala ni sa vakacalaka, 14-19.

1Ia kevaka sai valavala ca e dua na tamata, ni sa vakabubuluitaki, ka sa raica se sa kila e dua na ka; kevaka sa sega ni tukuna, sa qai cala kina; 2se dua na tamata sa tara na ka sa sega ni savasava, se yago ni manumanu tawa lasa sa sega ni savasava, se na yago ni manumanu manoa sa sega ni savasava, se na yago ni ka sa dolo sa sega ni savasava, a sa vuni ga vua, sa na sega ni savasava ko koya, sa na cala ga; 3se sa tara na ka sa sega ni savasava kina na tamata, se cava na ka sa sega ni savasava kina ko koya, a sa vuni ga vua; ni sa kila ga mai, sa na cala ga; 4se dua na tamata sa bubului vakailoa me kitaka na ka ca, se me kitaka na ka vinaka, a ka kecega ena bubului vakailoa kina na tamata, a sa vuni vua; ni sa kila mai, sa na qai cala e na dua na ka oqo; 5ia ni sa cala ko koya e na dua na ka oqo, me qai vakatusa na ka sai valavala ca kina; 6ka me kauta vei Jiova na nonai soro, e na vuku ni nonai valavala ca sa kitaka ko koya, e dua na ka yalewa mai na qele ni manumanu, e dua na luve ni sipi se na me, mei soro ni valavala ca; ia me sorovaki koya na bete e na vuku ni nonai valavala ca.

7Ia kevaka sa sega ni rawata ko koya e dua na lami, me qai kauta mai vei Jiova e na vuku ni nonai valavala ca, e rua na soqe, se rua na luve ni ruve; e dua mei soro ni valavala ca, ia kadua mei soro kama. 8Ia me kauta vua na bete, ia ko koya sai soro ni valavala ca me vakacabora eliu ko koya, ka kinita na uluna mai na domona, ia me kakua ga ni drutia laivi: 9me qai kureitaka e dua na dra ni soro ni valavala ca e na yasa ni cabocabo-ni-soro; ia na kena vo ni dra, me loba yani ki na vu ni cabocabo-ni-soro: oqo nai soro ni valavala ca. 10Me qai cabora nai karua mei soro kama, me vaka na kenai valavala: ia me sorovaki koya na bete e na vuku ni nonai valavala ca sa cakava oti, ena qai sega ni cudruvi kina.

11Ia kevaka sa sega ni rawata e rua na soqe, se rua na luve ni ruve, me qai kauta mai ko koya sai valavala ca me nonai madrali e dua na omeri madrai droka vinaka mei soro ni valavala ca; me kakua ni livi kina na waiwai, me kakua talega ni viri kina na drega me vakamai: ni sai soro ni valavala ca. 12Me qai kauta vua na bete, ia me yakuta vakadua ko koya, me kenai vakananumi, ka vakama e nai cabocabo-ni-soro, me vaka na ka sa vakacabori vei Jiova e na bukawaqa: oqo nai soro ni valavala ca. 13Ia me sorovaki koya na bete e na vuku ni nonai valavala ca sa cala kina e na dua na ka oqo, ena qai sega ni cudruvi kina; ia na kena vo me nona na bete, me vaka nai madrali laukana.

14A sa vosa vei Mosese ko Jiova, ka kaya, 15Kevaka sai valavala vakatani e dua na tamata, ka vakacalaka e na vuku ni ka sa tabu vei Jiova; me qai kauta vei Jiova mei soro ni nona caka cala e dua na sipi tagane sa sega na kena ca, mai na qele ni sipi, ni ko sa lewa mada na ka sa rauta na nona cala e na sikeli siliva, me vaka na sikeli ni vale tabu; 16ia me sauma na ca sa cala kina e na vuku ni ka e tabu, ia me qai vakaikuritaka e na dua na kena wase ni sa wase lima, ka solia vua na bete: ia me sorovaki koya na bete e na sipi tagane ai soro ni caka cala, ena qai sega ni cudruvi kina.

17Ia kevaka sa cala e dua na tamata, ni sa kitaka e dua na ka sa vakatabui e na vunau i Jiova, ke sa sega ni kila, ena cudruvi ga e na nona caka cala; 18me qai kauta e dua na sipi tagane sa sega na kena ca, mai na qele ni sipi, vua na bete, ni ko sa lewa mada na ka sa rauta na nona cala: ia me sorovaki koya na bete e na vuku ni nona vakacalaka, ka sega ni kila, ena qai sega ni cudruvi kina. 19O koya nai soro ni caka cala: sa cala vakaidina ko koya vei Jiova.

Vakavakadewa Makawa

©1974 Bible Society of the South Pacific

More Info | Version Index