Search form

NA VUNAU NI SORO 7

A vunau ni soro ni caka cala, 1-10; kei nai madrali ni veivinakati, 11-21. Sa tabu ni kania na uro kei na dra, 22-27. Ai madrali ni veivinakati kei nai sigana ni bete, 28-38.

1Ia oqo na vunau ni soro ni caka cala: Oqo sa ka tabu sara: 2e na yasana era sa vakamatea kina nai soro kama, me ra vakamatea kina nai soro ni caka cala: ia na kena dra me kureitaki voli ki nai cabocabo-ni-soro. 3Ia me cabora ko koya na kena uro kecega; na buina uro, kei na uro sa ubia na wawa, 4kei na ivi ruarua, kei na uro sa tu kina, sa tu mai na sarisarina, kei nai latikoso sa toka e cake ka toka era na yate, kei na ivi; oqo me kau tani: 5ia me vakama oqo na bete e na dela ni cabocabo-ni-soro, me ka sa cabori e na bukawaqa vei Jiova: oqo nai soro ni caka cala. 6O ira kecega na tagane vei ira na bete era na kania: me laukana e na tikina tabu: sa ka tabu sara.

7Me vaka nai soro ni valavala ca sa vakakina nai soro ni caka cala: sa dua ga na kedrau vunau: na bete sa ia kina na veibulubuluti, ena nona ga. 8Ia na bete sa vakacabora na nonai soro ni valavala ca e dua na tamata, ena nona na bete ko ya na kuli ni soro kama sa vakacabora ko koya. 9Kei nai madrali laukana kecega sa vavi e na lovo, kei na ka kece sa tavu e nai tavuteke, se na dari kaukamea, ena nona na bete sa vakacabora. 10Kei nai madrali laukana kecega, sa veiwaki vata kei na waiwai, se mamaca, ena nodratou kecega na luve i Eroni, me ra duivota vakatautauvata.

11Ia oqo na vunau ni madrali ni veivinakati, ena vakacabora vei Jiova e dua na tamata: 12Kevaka sa cabora mei madrali ni vakavinavinaka, me cabora vata kei nai madrali ni vakavinavinaka na keki sa sega ni vakalevenitaki sa veiwaki vata kei na waiwai, kei na keki mamare sara sa boro e na waiwai, kei nai buli madrai sa veiwaki vata kei na waiwai, sa caka e na madrai droka vinaka, ka tavuteke. 13Me kenai kuri ni keki, me cabora talega me nonai madrali na madrai sa vakalevenitaki, mei kuri ni madrali ni vakavinavinaka mai na nonai madrali ni veivinakati. 14Ia me vakacabora e dua ko koya, mai nai madrali taucoko, mei madrali e lavelaveti vei Jiova; oqo ena nona na bete sa kureitaka na dra ni madrali ni veivinakati. 15Ia na lewena sai madrali ni vakavinavinaka mai na nonai madrali ni veivinakati ena laukana e na siga sa vakacabori kina; me kakua ni vakavoca ko koya me yacova na mataka. 16Ia kevaka sa ka ni bubului se ka sa yalataki na nonai madrali, me laukana e na siga sa cabora kina ko koya na nonai madrali: ia e na mataka me laukana talega na kena vo: 17ia na tiki ni lewena sai madrali sa vo tu e na kenai katolu ni siga, me vakamai e na bukawaqa: 18ia kevaka sa laukana e na kenai katolu ni siga e dua na tiki ni lewe ni nonai madrali ni veivinakati sa cabori, ena sega ni donu, ena sega ni yaga vua sa cabora: ena ka vakasisilataki, ia na tamata sa kana kina ena cudruvi e na nona caka ca. 19Ia na lewena sa tara e dua na ka sa sega ni savasava, me kakua ni laukana; me vakamai e na bukawaqa: ia na lewena sa vo, me ra kana kina ko ira kece sa savasava. 20Ia na tamata sa kania na lewe ni madrali ni veivinakati sa cabori, sa nei Jiova, ni sa sega ni savasava ko koya, ena muduki tani na tamata ko ya maivei ira na kai nona. 21A tamata talega sa tara e dua na ka sa sega ni savasava, se dua na ka tawa savasava e na tamata, se manumanu tawa savasava, se dua na ka tawa savasava e vakasisilataki, ka sa kania ga na lewe ni madrali ni veivinakati sa cabori, sa nei Jiova, ena muduki tani na tamata ko ya maivei ira na kai nona.

22Sa vosa talega vei Mosese ko Jiova, ka kaya, 23Mo vosa vei ira na Isireli, ka kaya, Dou kakua ni kania e dua na uro, ni pulumokau, se sipi, se me. 24Ia na uro ni manumanu sa mate vakailoa, kei na uro ni manumanu sa dresulaki, e tara me vakayagataki e na ka tani kecega: ia dou kakua sara ni kania. 25Ia ko ira kece sa kania na uro ni manumanu, sa daucabori e na bukawaqa vei Jiova io na tamata sa kania ena muduki tani maivei ira na kai nona. 26Ia mo dou kakua talega ni kania e dua na dra e na nomudou veivale kecega, se dra ni manumanu vuka, se manumanu e yavai va. 27A tamata kecega sa kania e dua na dra, ena muduki tani na tamata ko ya maivei ira na kai nona.

28Sa vosa talega vei Mosese ko Jiova, ka kaya, 29Mo vosa vei ira na Isireli, ka kaya, O koya sa vakacabora vei Jiova na nonai madrali ni veivinakati, me kauta mai vei Jiova na nonai madrali, mai na nonai madrali ni veivinakati. 30Me kauta e na ligana dina na ka sa cabori e na bukawaqa vei Jiova; me kauta na uro kei na serena, me yalovaki na serena mei soro sa yalovaki e na mata i Jiova. 31Ia na bete me vakama na uro e na dela ni cabocabo-ni-soro; ia na serena sa kedratou ko Eroni kei na luvena. 32Ia na tabana i matau mo dou solia vua na bete mei soro e lavelaveti, mai na nomudou i madrali ni veivinakati sa cabori. 33O koya vei iratou na luve i Eroni sa cabora na dra ni madrali ni veivinakati, kei na uro, ena nonai votavota na tabana i matau. 34Ni'u sa taura na serena sa yalovaki, kei na tabana sa lavelaveti maivei ira na Isireli, mai na nodra i madrali ni veivinakati, sa cabori, ka'u sa solia vei Eroni na bete kei iratou na luvena, oqo sa kenai lesilesi me tawa mudu, maivei ira na Isireli. 35Oqo na nei Eroni kei iratou na luvena e na vuku ni nodratou veilumuti, mai na ka sa cabo e na bukawaqa vei Jiova, e na siga sa kauti iratou kina ko koya me ratou bete vei Jiova; 36o koya sa vakarota ko Jiova me ra solia vei iratou ko ira na Isireli, e na siga sa lumuti iratou kina, Oqo nai lesilesi me tawa mudu e na nodra veitabatamata.

37Sa vakaoqo na vunau ni soro kama, ni madrali laukana, kei nai soro ni valavala ca, kei nai soro ni caka cala, kei na veibuli, kei nai madrali ni veivinakati me cabori; 38o koya sa vakarota vei Mosese ko Jiova mai na ulu-ni-vanua ko Saineai, e na siga sa vakaroti ira kina na Isireli me ra cabora na nodra i madrali vei Jiova e na lekutu loaloa mai Saineai.

Vakavakadewa Makawa

©1974 Bible Society of the South Pacific

More Info | Version Index