Search form

NA VUNAU NI SORO 8

Sa buli ko Eroni kei iratou na luvena, me ratou bete.

1A sa vosa vei Mosese ko Jiova, ka kaya, 2Mo kauti Eroni kei iratou vata kaya na luvena, kei na veisulu, kei na waiwai ni veilumuti, kei na pulumokau mei soro ni valavala ca, kei na sipi tagane ruarua, kei na kato ni madrai sa sega ni vakaleveni; 3ka vakasoqoni ira vata nai soqosoqo taucoko ki na katuba ni vale ni veitavaki.

4A sa kitaka ko Mosese me vaka ka vakarota vua ko Jiova; a sa soqoni ira vata nai soqosoqo ki na katuba ni vale ni veitavaki. 5A sa kaya vei ira nai soqosoqo ko Mosese, Sa vakaoqo na ka sa vakarota ko Jiova me caka. 6A sa kauti Eroni kei iratou na luvena ko Mosese, ka vakasilimi iratou e na wai. 7A sa vakaisulutaki koya e nai curucuru balavu, ka vauci koya e nai vau ni tolona, ka vakaisulutaki koya e nai sulu eloma, ka vakasuluma e na efoti, ka vauci koya e nai vau talei ni efoti, ka vauca kina vua. 8A sa taubeni koya e nai taube: a sa vonota nai taube e nai Urimi kei na Cumimi. 9A sa vakaisalataka e nai sala; ia, e taudaku ni sala, e na yadrena, sa vauca na koula raraba sa mamare, me nonai sala tabu; me vaka ka vakarota vei Mosese ko Jiova.

10A sa taura na waiwai ni lumu ko Mosese, ka lumuta na vale ni Kalou, kei na ka kece sa tu kina, ka vakatabuya: 11a sa kureitaka vakavitu ki dela ni cabocabo-ni-soro, ka lumuta nai cabocabo-ni-soro kei na kenai yaya kecega, kei na taqi kei na kenai tutu, ka me vakatabuya. 12A sa livia e dua na waiwai ni lumu ki na ulu i Eroni, ka lumuta, ka me vakatabuya. 13A sa kauti iratou na luve i Eroni ko Mosese, ka vakaisulutaki iratou e nai curucuru balavu, ka vauci iratou e nai vau ni tolodra, ka vakaisalataki iratou e nai sala; me vaka ka vakarota vei Mosese ko Jiova.

14A sa kauta na pulumokau ko koya mei soro ni valavala ca: ia ko Eroni kei iratou na luvena, eratou sa tabaka e na ligadratou na ulu ni pulumokau mei soro ni valavala ca: 15a sa qai vakamatei; a sa kauta na dra ko Mosese, ka boroya voli e nai qaqalo ni ligana na tutuna sa balavu cake e nai cabocabo-ni-soro, ka vakasavasavataka nai cabocabo-ni-soro, ka sova yani na dra ki na vu ni cabocabo-ni-soro, ka vakatabuya, me ia e delana nai bulubulu. 16A sa taura na uro kecega sa tu e na gacagaca, kei nai latikoso sa toka e cake ka toka era na yate, kei na ivi ruarua, kei na kena uro, a sa vakama ko Mosese e na dela ni cabocabo-ni-soro. 17Ia na pulumokau, kei na kulina, kei na lewena, kei na dena, sa vakama e na bukawaqa e nai bili ni tikotiko; me vaka ka vakarota vei Mosese ko Jiova.

18Sa qai kauta ko koya na sipi tagane mei soro kama: ia ko Eroni kei na luvena, eratou sa tabaka na ulu ni sipi tagane e na ligadratou: 19a sa vakamatea ko koya; a sa volita nai cabocabo-ni-soro ko Mosese, ka kureitaka kina na dra. 20A sa tava na sipi tagane ko Mosese me vaka na kenai tavatava; a sa vakama ko Mosese na uluna, kei na kenai tavatava, kei na uro. 21A sa vuya ko koya na gacagaca, kei na yavana, e na wai; a sa vakama na sipi tagane taucoko ko Mosese e na dela ni cabocabo-ni-soro: oqo nai soro kama me ka boi vinaka, sa vakacabori e na bukawaqa vei Jiova; me vaka ka vakarota vei Mosese ko Jiova.

22A sa kauta ko koya na sipi tagane kadua, na sipi tagane ni veibuli: ia ko Eroni kei iratou na luvena, eratou sa tabaka na ulu ni sipi tagane e na ligadratou. 23A sa vakamatea ko koya: a sa kauta e dua na kena dra ko Mosese, ka boroya kina na vuso ni daliga i matau i Eroni, kei nai dovidovi-ni-kakana ni ligana i matau, kei nai qaqalo levu ni yavana i matau. 24A sa kauti iratou na luve i Eroni, a sa boroya e na dra na vuso ni daligadratou i matau, kei nai dovidovi-ni-kakana ni ligadratou i matau, kei nai qaqalo levu ni yavadratou i matau; a sa volita nai cabocabo-ni-soro ko Mosese, ka kureitaka kina na dra. 25A sa taura na uro, kei na buina uro, kei na uro kecega sa tu e na gacagaca, kei nai latikoso ni yate, kei na ivi ruarua, kei na kena uro, kei na tabana i matau: 26ia mai na kato ni madrai sa sega ni vakaleveni, sa tu e na mata i Jiova, sa kauta e dua na keki sa sega ni vakalevenitaki, ka dua nai buli madrai sa caka e na waiwai, ka dua na keki mamare sara, ka viritu e dela ni uro, kei na dela ni tabana i matau: 27a sa solia kecega ki na liga i Eroni kei na ligadratou na luvena, a sa yalovaka mei soro e yalovaki e na mata i Jiova. 28A sa qai taura mai na ligadratou ko Mosese, ka vakama e na dela ni cabocabo-ni-soro e dela ni soro kama: oqo na ka ni veibuli me ka boi vinaka: oqo na ka sa cabo e na bukawaqa vei Jiova. 29A sa kauta na serena ko Mosese, ka yalovaka mei soro sa yalovaki e na mata i Jiova: na tiki ni sipi tagane ni veibuli oqo nai votavota i Mosese; me vaka ka vakarota vei Mosese ko Jiova.

30A sa kauta e dua na waiwai ni veilumuti ko Mosese, ka dua na dra sa tu e dela ni cabocabo-ni-soro, ka kureitaka vei Eroni, kei na nonai sulu, kei iratou na luvena, kei na nodratou i sulu na luvena; a sa vakatabui Eroni, kei na nonai sulu, kei iratou na luvena, kei na nodratou i sulu na luvena.

31A sa kaya vei Eroni kei iratou na luvena ko Mosese, Dou vakasaqa na lewena mai na katuba ni vale ni veitavaki; ka kania talega maikea, kei na madrai sa tu e na kato ni ka ni veibuli, me vaka ka'u a vakarota, ka kaya, Me kania ko Eroni kei iratou na luvena. 32Ia na kena vo ni lewena kei na madrai dou vakama e na bukawaqa. 33Ia dou kakua ni curu ki tautuba mai na vale ni veitavaki ka bogi vitu, me oti mada na nomudou siga ni veibuli: ni na bogi vitu ni sa ia tiko ko koya na nomudou veibuli. 34Me vaka sa caka e na siga oqo, sa vakarota ko Jiova me caka, me sorovaki kemudou. 35Dou tiko kina ki na katuba ni vale ni veitavaki ka siga vitu ka bogi vitu, ka vakabauta na ka sa vakarota ko Jiova, mo dou kakua ni mate: ni'u sa vakaroti vakakina. 36A sa cakava ko Eroni kei iratou na luvena na ka kecega sa vakarota ko Jiova e na gusu i Mosese.

Vakavakadewa Makawa

©1974 Bible Society of the South Pacific

More Info | Version Index