Search form

NA TIKO MAI NA LEKUTU 14

Era sa didi na tamata e nai tukutuku, 1-4. Erau via vakacegui ira ko Kelepi kei Josua, 5-10. Sa kaya na Kalou me cudruvi ira, a sa qai kua ga e na masumasu i Mosese, 11-25. Era sa vakatatabui na tamata ka didi, me ra kakua ni lako ki Kenani, 26-35. Sa yaviti iratou na tamata ka tukutuku vakaca ko Jiova, 36-38. Era sa yaviti e nai valu na tamata sa talaidredre, 39-45.

1A ra sa tabalaka cake na domodra ka qoqolou nai soqosoqo taucoko; a ra sa tagi na tamata e na bogi ko ya. 2A ra sa didivaki Mosese kei Eroni ko ira kecega na Isireli: a ra sa kaya vei rau nai soqosoqo taucoko, Ulei, na Kalou, E ca ni da a sega ni ciba mai na vanua ko Ijipita! Ulei, na Kalou, sa ca ni da a sega ni ciba e na vanua liwa oqo! 3Ia ka cava sa kauti keda mai ko Jiova ki na vanua oqo, me da bale kina e nai seleiwau, ka me ra vakabobulataki na watida kei na luveda? sa sega li ni vinaka cake me da lesu tale ki Ijipita? 4A ra sa veikayaka vakai ira, Tou lesia mada e dua na turaga, me da lesu tale ki Ijipita.

5Erau a qai cuva vakatoboicu ko Mosese kei Eroni e na matadra taucoko nai soqosoqo ni Isireli. 6Ia ko Josua na luve i Nuni, kei Kelepi na luve i Jifune, maivei ira na rai vanua, erau a dresulaka na nodraui sulu: 7a rau sa vosa vei ira nai soqosoqo taucoko ni Isireli, ka kaya, Na vanua keitou a lakova me keitou raica vakavinaka, sa vanua vinaka vakaidina: 8kevaka sa rekitaki keda ko Jiova, ena vakayacori keda ki na vanua ko ya, ka solia vei keda; a vanua sa dave kina na wai-ni-sucu kei na oni: 9Ia ni kakua ni talaidredre vei Jiova, ni kakua talega ni rerevaki ira na lewe ni vanua, ni ra sa keda madrai: sa lako tani vei ira na nodra kaukauwa, a sa tiko kei keda ko Jiova: ni kakua ni rerevaki ira. 10Ia nai soqosoqo taucoko era kaya me vakaviriki rau e na vatu. A sa rairai mai e na vale ni veitavaki na serau i Jiova vei ira kecega na Isireli. 11A sa kaya vei Mosese ko Jiova, A cava tale na kena dede me ra vakacudrui au tiko kina na tamata oqo? ia na gauna cava era na vakabauti au kina, e na vuku ni vakatakilakila kecega ka'u sa cakava oti e na kedra maliwa? 12Au na yaviti ira e na mate levu, ka vakuai ira, ia ka'u na vakayacori iko mo matanitu e levu cake ka kaukauwa cake vei ira.

13A sa kaya vei Jiova ko Mosese, Era na qai rogoca ko ira na kai Ijipita, ni ko a kauti ira na tamata oqo mai na kedra maliwa e na nomuni kaukauwa levu, 14ka ra na tukuna ki na lewe ni vanua oqo: I Jiova, era sa rogoca oti ni kemuni sa tiko kei ira na tamata oqo; ka ni ra sa veiraici mata, i Jiova, kei kemuni; ni sa vakarurugi ira tiko talega na nomuni o; ka ni kemuni sa liutaki ira talega, e na duru o e na siga, kei na duru bukawaqa e na bogi. 15Ia kevaka ko ni sa vakamatei ira na tamata oqo me vaka era le dua ga na tamata, era na qai vosa ko ira na veimatanitu era sa rogoca na kemuni rogorogo, ka kaya, 16Sa sega ni kauti ira rawa na tamata oqo ko Jiova ki na vanua ka bubului kina vei ira, sa qai vakamatei ira kina ko koya e na vanua liwa. 17Ia oqo, me levu mada na kaukauwa ni noqu Turaga, me vaka na nomuni vosa, ni kemuni a kaya, 18Ko Jiova sa vosavosa vakadede, ka sa levu na nona yalololoma, a sa sega ni sauma nai valavala ca kei na talaidredre, ia sa sega ga ni vakadonuya na tamata ca: ka sa cudruvaka na nodra caka ca na qase vei ira na luvedra, ka yacova nai katolu ni tabatamata, kei na kenai kava. 19Mo ni kakua mada ni sauma na nodra caka ca na tamata oqo, me vaka na kena levu ni nomuni yalololoma, ka me vaka kemuni sa sega talega ni cudruvi ira na tamata oqo, ka vakatekivu mai Ijipita ka yacova na siga edaidai.

20A sa kaya ko Jiova, Au na sega ni sauma vei ira, me vaka na nomu vosa: 21ia me vaka na kena dina na noqu bula, ka me vaka ena roboti vuravura na serau i Jiova; 22ko ira kecega na tamata oqo, era sa raica oti na noqu serau, kei na noqu veivakatakilakila ka'u a kitaka mai Ijipita mai na vanua liwa talega, a sa vakatini na nodra vakatovolei au vakaca, ka ra sega ni vakarorogo ki na noqu vosa; 23era na sega sara ni raica na vanua ka'u a bubului kina vei ira na nodra qase: kei ira kece talega era a vakacudrui au era na sega ni raica: 24ia ko Kelepi ga na noqu tamata, ni sa dua tani na yalona, a sa muri au tikoga, au na vakayacori koya ki na vanua ka lako kina ko koya: a ra na taukena ko ira na nona kawa. 25Ia ko ira na Amalekaiti kei ira na kai Kenani era a tiko mai na vanua buca. Dou lesu yani e na mataka, ka lako ki na vanua liwa e na sala ki na Wasa Damudamu.

26A sa vosa vei Mosese kei Eroni ko Jiova, ka kaya, 27Me vakaevei na kena dede me'u vosoti ira nai soqosoqo ca oqo, era daudidi vei au? au sa rogoca na nodra didivaki au ko ira na Isireli. 28Mo kaya vei ira, Sa kaya ko Jiova, Me vaka na kena dina na noqu bula, au na kitaka vakaidina vei kemudou me vaka dou a kaya e na daligaqu: 29na yagomudou ena bale e na vanua liwa oqo: ia koi kemudou kecega sa wili, me vaka na nomudou i wiliwili kecega, kemudou sa yabaki ruasagavulu ka levu cake, oi kemudou sa didi vei au, 30dou na sega sara ni yaco ki na vanua ka'u dulaka kina na ligaqu me'u vakatikori kemudou kina, ko Kelepi ga na luve i Jifune, kei Josua na luve i Nuni: 31ia ko ira ga na nomudou lalai, dou a kaya era na vakabobulataki, au na vakayacori ira kina, a ra na kila na vanua dou a beca: 32ia koi kemudou, ena bale na yagomudou e na vanua liwa oqo: 33ia ko ira na luvemudou, era na lako voli e na vanua liwa ka yabaki vasagavulu, ka kana rarawa e na vuku ni nomudou lako vakatani, me mate mada na yagomudou e na vanua liwa. 34Me vaka nai wiliwili ni siga dou a rai vanua kina, io na siga e vasagavulu, ena dua na yabaki me ka ni siga yadua, dou na cudruvi tiko e na vuku ni nomudou i valavala ca, io me vasagavulu na yabaki; ia dou na kila na noqu dua tani vei kemudou. 35Oi au ko Jiova, au sa vosataka, au na kitaka vakaidina na ka oqo ki nai soqosoqo ca taucoko oqo, era sa soqoni vata me veivorati kei au; e na lekutu oqo era na oti kina, ia era na mate kina.

36Ia ko iratou na tamata sa tala ko Mosese me raica na vanua, a ratou sa lesu, ka vakavuna na nodra didi vua ko ira nai soqosoqo taucoko, ni ratou a vakarogocataka na vanua ko ya, 37io ko iratou na tamata ko ya, eratou a ciba e na mate levu e na mata i Jiova. 38Ia erau sa bula tikoga ko Josua na luve i Nuni, kei Kelepi na luve i Jifune, maivei ira na tamata ka la'ki raica na vanua.

39A sa tukuna na vosa oqo ko Mosese vei ira kece na Isireli: a ra sa tagi vakalevu na tamata. 40A ra sa sou e na mataka caca, ka cabe ki dela ni ulu-ni-vanua, ka kaya, Raica, koi keimami; ia keimami na lako cake ki na vanua ka yalataka ko Jiova: ni keimami sa kitaka na ka ca. 41A sa kaya ko Mosese, A cava ni sa talaidredre kina ki nai vakaro i Jiova? ni na sega ga ni yaco. 42Mo ni kakua ni lako cake, ni sa sega ni tiko kei kemuni ko Jiova; mo ni kakua kina ni yaviti e na matadra na nomuni meca. 43Ni ra sa tiko maikina e na matamuni na Amalekaiti kei na kai Kenani, ia kemuni na bale e nai seleiwau: ni kemuni sa vuki tani maivei Jiova, ena sega kina ni tiko kei kemuni ko Jiova. 44Ia era sa doudou me cabe ki dela ni ulu-ni-vanua: ia ko Mosese kei na kato ni veiyalayalati i Jiova, sa sega ni lako tani mai na loma ni tikotiko.

45Era sa qai lako sobu na Amalekaiti kei na kai Kenani era tiko e na ulu-ni-vanua ko ya, ka yaviti ira, ka vakubutaki ira ka yacovi Orima.

Vakavakadewa Makawa

©1974 Bible Society of the South Pacific

More Info | Version Index