Search form

NA TIKO MAI NA LEKUTU 15

A vunau e na vuku ni madrali laukana kei nai madrali liviraki, 1-21. Ai soro e na vuku ni vakacalaka, 22-29. Na kenai sau ni valavala ca sa nakiti, 30,31. A tamata ka ca buka e na siga ni vakacecegu, 32-36. A vunau e na vuku ni bele ni sulu, 37-41.

1A sa kaya vei Mosese ko Jiova, 2Mo vosa vei ira na Isireli, ka kaya vei ira, Ni dou sa yaco ki na vanua dou na tiko kina, o koya ka'u sa solia vei kemudou, 3ka dou sa vakacabora e dua na ka e na bukawaqa vei Jiova, ai soro kama, sei soro me vakayacora na bubului, se nai soro sa cabori e na yalomakutu, se e na nomudou soqoni levu, mo dou cakava na ka e boi vinaka vei Jiova, mai na qele ni pulumokau se na qele ni sipi: 4me qai kauta ga mai ko koya sa vakacabora na nonai madrali vei Jiova, mei madrali laukana, e dua na omeri madrai droka vinaka sa veiwaki vata kei na waiwai e rua na paidi ka levu cake; 5ka rua na paidi ka levu cake na waini mei madrali liviraki, mo vakarautaka kei nai soro kama se nai soro tani, na ka ni lami yadua. 6Se me ka ni sipi tagane, mo vakarautaka mei madrali laukana e rua na omeri madrai droka vinaka sa veiwaki vata kei na waiwai ka tolu na paidi ka levu cake; 7ia na ka mei madrali liviraki mo cabora e tolu na paidi ka levu cake ni waini, me ka boi vinaka vei Jiova. 8Ia ni ko sa vakarautaka e dua na pulumokau mei soro kama, se mei soro me vakayacora na bubului, sei madrali ni veivinakati vei Jiova: 9me qai kau vata kei na pulumokau nai madrali laukana, e tolu na omeri madrai droka vinaka sa veiwaki vata kei na waiwai e lima na paidi. 10Ia mo kauta mei madrali liviraki e lima na paidi waini, me sa cabori e na bukawaqa, me ka boi vinaka vei Jiova. 11Me caka vakaoqo na pulumokau yadua, se na sipi tagane yadua, se na lami tagane yadua, se na luve ni me. 12Me tautauvata kei na kedrai wiliwili na ka dou sa vakarautaka, dou kitaka vakakina ki na manumanu yadua me vaka na kedrai wiliwili. 13O ira kecega nai taukei me ra kitaka vakakina na ka oqo, ni sa vakacabora na ka sa cabori e na bukawaqa, me ka boi vinaka vei Jiova. 14Ia kevaka sa tiko vakavulagi kei kemudou na kai tani, se na tamata tani sa tiko kei kemudou e na nomudou veitabatamata, a sa vakacabora na ka sa cabori e na bukawaqa, me ka boi vinaka vei Jiova; me vaka na ka dou kitaka me kitaka vakakina ko koya. 15Ena dua ga na kenai vakarau vei kemudou nai soqosoqo, kei koya na kai tani sa tiko vakavulagi; nai lesilesi ka sega ni mudu e na nomudou veitabatamata: me vakataki kemudou sa vakakina ko koya na kai tani e na mata i Jiova. 16Ena dua ga na lewa ka dua ga na kenai valavala vei kemudou kei na kai tani sa tiko vakavulagi kei kemudou.

17Sa kaya talega vei Mosese ko Jiova, 18Mo vosa vei ira na Isireli, ka kaya vei ira, Ni dou sa yacova na vanua ka'u sa kauti kemudou kina, 19ena qai yaco, ni dou sa kania na kakana ni vanua, dou na vakacabora e dua nai soro e lavelaveti vei Jiova. 20Dou na vakacabora e dua na keki mai na madrai taumada, mei soro e lavelaveti: dou lavelaveta me vaka nai soro e lavelaveti mai na rara ni buturaki sila. 21Dou solia vei Jiova eso na nomudou madrai taumada, mei soro e lavelaveti, e na nomudou veitabatamata.

22Ia kevaka dou sa cala, ka sega ni muria kecega nai vakaro oqo, sa vosataka vei Mosese ko Jiova, 23io na ka kecega sa vakarota ko Jiova vei kemudou e na gusu i Mosese, mai na siga ka vakarota kina ko Jiova, ka yacova na nomudou veitabatamata emuri; 24kevaka sa vakacalakataki ka ra sa sega ni kila nai soqosoqo, me ra qai vakacabora e dua na pulumokau sa gone ko ira nai soqosoqo taucoko, mei soro kama, me ka boi vinaka vei Jiova, kei na kenai madrali laukana kei na kenai madrali liviraki, me vaka na kenai lesilesi, ka dua na me tagane mei soro ni valavala ca. 25Me qai sorovaki ira nai soqosoqo taucoko ni Isireli ko koya na bete, a ra na sega ni cudruvi kina: ni sa vakacalakataki: ka ra sa kauta na nodra i madrali, ka sa cabori e na bukawaqa vei Jiova, kei na nodra i soro ni valavala ca, kivei Jiova, e na vuku ni nodra vakacalaka: 26era na qai sega ni cudruvi kina ko ira nai soqosoqo taucoko ni Isireli, kei na kai tani sa tiko vakavulagi kei ira; ni ra sa vakacalaka ga na tamata kecega.

27Ia kevaka sa vakacalaka e dua na tamata, me qai kau e dua na me yalewa sa yabaki dua ga, mei soro ni valavala ca. 28Ia na bete ena qai sorovaki koya na tamata sa vakacalaka, ni sa cala e na nona vakacalaka e na mata i Jiova, ena qai sega ni cudruvi kina ko koya. 29Ena dua ga vei kemudou na lawa vei koya sa vakacalaka, sei taukei ko koya vei ira na Isireli, se kai tani sa tiko vakavulagi vei ira.

30Ia na tamata sai valavala vakaukauwa, sei taukei se vulagi, se beci Jiova; ia na tamata ko ya ena tawase tani vei ira na kai nona. 31Ni sa beca na vosa i Jiova, a sa vakacataka na nonai vakaro, ena tawase laivi na tamata ko ya; ena baleti koya na nona caka ca.

32Ia ni ra a tiko mai na vanua liwa na Isireli, era sa kunea e dua na tamata sa ca buka tiko e na siga ni vakacecegu. 33Ia ko iratou eratou sa kunei koya ni sa ca buka tiko, eratou sa kauta vei Mosese kei Eroni, vei ira talega nai soqosoqo taucoko. 34A ra sa sogolati koya, ni sa sega ni macala na ka me caka vua. 35A sa kaya vei Mosese ko Jiova, Ena vakamatei dina ga na tamata: me ra vakaviriki koya e na vatu ko ira nai soqosoqo taucoko, mai nai bili ni tikotiko. 36Ia ko ira nai soqosoqo taucoko era sa kauti koya ki nai bili ni tikotiko, ka vakaviriki koya e na vatu, a sa mate kina ko koya; me vaka ka vakarota vei Mosese ko Jiova.

37A sa kaya vei Mosese ko Jiova, 38Mo vosa vei ira na Isireli, ka kaya vei ira me ra kitaka na ka vakaiukuuku e na bele ni nodra i sulu, e na nodra veitabatamata, ka me ra cula ki nai ukuuku ni bele ni sulu, e dua na wa pelu: 39ia ena dua na ka vakaiukuuku vei kemudou, mo dou raica, ka nanuma nai vakaro kecega i Jiova, ka cakava; ia mo dou kakua kina ni gadreva mo dou muria na lomamudou, kei na matamudou, dou a daulako vakatani kina mo dou muria; 40mo dou nanuma kina, ka cakava na noqu i vakaro kecega, mo dou tabu kina me nona na nomudou Kalou. 41Sai au ko Jiova na nomudou Kalou, ko koya ka kauti kemudou mai na vanua ko Ijipita, me'u nomudou Kalou: Koi au ko Jiova na nomudou Kalou.

Vakavakadewa Makawa

©1974 Bible Society of the South Pacific

More Info | Version Index