Search form

NA TIKO MAI NA LEKUTU 16

A talaidredre i Kora, kei Tecani, kei Epairami, 1-22. Era sa cudruvi, 23-40. Era sa qai didi na tamata, ka ra sa cudruvi, 41-45. Sa mudu na mate levu, ni sa sorovaki ira ko Eroni, 46-50.

1Ia ko Kora na luve i Isari, o koya na luve i Koaca, na luve i Livai, kei Tecani kei Epairami, na luve i Iliapi, kei Oni na luve i Peleci, eratou luve i Rupeni eratou kauta na tamata: 2a ratou sa tu e na mata i Mosese, kei ira vata eso na Isireli, era lewe rua na drau ka limasagavulu era turaga vei ira nai soqosoqo, era kilai e nai soqosoqo, ka ra tamata rogo: 3a ra sa soqoni vata me beitaki Mosese kei Eroni, ka kaya vei rau, Drau sa viavialevu, ni ra sa savasava ko ira kece sara nai soqosoqo taucoko, ka sa tiko vei ira ko Jiova: a cava drau sa vakalevulevui kemudrau cake kina vei ira nai soqosoqo i Jiova?

4Ia ni sa rogoca ko Mosese, sa cuva vakatoboicu: 5a sa kaya vei Kora kei ira kecega na nonai tokani, E na mataka ena vakatakila ko Jiova se ko cei sa nona, kei koya sa savasava, ia ena cakava me toro vua; ia na tamata sa digitaka ko koya, ena cakava me toro vua. 6Dou kitaka na ka oqo: Dou taura eso na miqa ni ka boi vinaka, ko Kora, kei kemudou kecega na nonai lawalawa; 7ka biuta kina na bukawaqa, ka viritaka kina na ka boi vinaka e na mata i Jiova, e na mataka: ia na tamata sa digitaka ko Jiova, sai koya ga sa savasava: dou sa viavialevu koi kemudou na Livai.

8A sa kaya vei Kora ko Mosese, Dou vakarorogo mada, na Livai: 9sa ka lailai beka vei kemudou, ni sa tawasei kemudou na Kalou ni Isireli maivei ira nai soqosoqo ni Isireli me kauti kemudou mo dou voleka vua, mo dou kitaka na cakacaka ni vale i Jiova, ka me tu e na matadra nai soqosoqo me cakacaka e na vukudra? 10A sa kauti iko mo voleka vua, kei ira kecega na wekamu na Livai: ia dou sa via taura talega na cakacaka vakabete? 11E na ka oqo, dou sa soqoni vata kina mo dou veivala kei Jiova, ko iko kei ira na nomu i lawalawa kecega: ia ko cei ko Eroni, mo dou kudrukudrutaki koya?

12A sa talatala ko Mosese vei Tecani kei Epairami na luve i Iliapi me rau lako mai vua; ka rau a kaya, Keirau na sega ni lako yani: 13a ka lailai beka ni ko sa kauti keimami cake mai na vanua ka dave kina na wai-ni-sucu kei na oni, me vakamatei keimami kina e na vanua liwa, mo qai viaviaturaga talega vei keimami? 14ia ko sa sega ni kauti keimami ki na vanua sa dave kina na wai-ni-sucu kei na oni, ka sega ni solia vei keimami me keimami taukena na veiwere kei na veivaivaini: ia ko na vakamatabokotaka beka na matadra na tamata oqo? keirau na sega ni lako yani.

15A sa cudru vakalevu ko Mosese, ka kaya vei Jiova, Mo ni kakua ni donuya na nodra i madrali: au sa sega ni kovea vei ira e dua na asa, au sa sega talega ni vakacacana e dua vei ira. 16A sa kaya vei Kora ko Mosese, O iko, kei ira kecega na nomu i lawalawa, dou mai tiko e na mata i Jiova, e na mataka, ko iko, kei ira, kei Eroni: 17ia me kauta na nona miqa ni ka boi vinaka na tamata yadua, ka viritaka kina na ka boi vinaka, ka kauta mai ki na mata i Jiova na tamata yadua na nona miqa, e rua na drau ka limasagavulu na miqa; ko iko talega, kei Eroni, mo drau taura yadua na nona miqa.

18A ra sa taura na tamata yadua na nona miqa ni ka boi vinaka, ka biuta kina na bukawaqa, ka viritaka kina na ka boi vinaka, ka tu vata kei Mosese kei Eroni mai na katuba ni vale ni veitavaki. 19Ia ko Kora sa vakasoqona nai soqosoqo taucoko ki na katuba ni vale ni veitavaki, me veileti kei rau: a sa rairai na serau i Jiova vei ira nai soqosoqo taucoko.

20A sa kaya vei Mosese kei Eroni ko Jiova, 21Drau tawasei kemudrau mai nai soqosoqo oqo, me'u sa vakarusai ira vakasauri. 22A rau a cuva vakaitoboicu, ka kaya, Kemuni na Kalou, na Kalou ni yalo ni tamata kecega, kemuni na cudruvi ira li nai soqosoqo taucoko ni sai valavala ca e le dua na tamata?

23A sa kaya vei Mosese ko Jiova, 24Mo vosa vei ira nai soqosoqo, ka kaya, Dou lako tani sara mai na veiyasana ni vale i Kora, kei Tecani kei Epairami. 25A sa cavu tu ko Mosese, ka lako vei Tecani kei Epairami; a ra sa muri koya ko ira na qase ni Isireli. 26A sa vosa ko koya vei ira nai soqosoqo, ka kaya, Dou lako tani mada mai na nodra veivale laca na tamata ca oqo, ka kakua ni tara e dua na nodra ka, de dou vakarusai e na vuku ni nodra i valavala ca. 27A ra sa lako tani kina mai na veiyasana ni vale i Kora, kei Tecani, kei Epairami: a sa curu mai ko Tecani kei Epairami, ka tu mai na katuba ni nodrau vale laca, kei na watidrau, kei iratou na luvedrau tagane, kei na nodrau lalai. 28A sa kaya ko Mosese, E na ka oqo dou na kila kina ni sa talai au ko Jiova me'u kitaka na cakacaka kecega oqo; ka ni sa sega ni vu ga mai na lomaqu: 29Kevaka era mate na tamata oqo me vaka sa mate na tamata kecega, se ra cudruvi me vaka era sa daucudruvi na tamata kecega; sa qai sega ni talai au ko Jiova. 30Ia kevaka sa cakava e dua na ka vou ko Jiova, a sa dalaga na gusuna na vanua, ka tilomi ira vata kei na nodra ka kecega; a ra sa lutu bulabula sobu ki nai bulubulu; dou na qai kila ni ra vakacudrui Jiova na tamata oqo.

31Ia ni sa vosataka oti na vosa kecega oqo, sa qai kasei na vanua era tu kina: 32a sa dalaga na gusuna na vanua, ka tilomi ira, kei na nodra veivale, kei na tamata kecega sa tiko vei Kora, kei nai yaya kecega. 33Ko ira, kei na nodra ka kecega, sa lutu bulabula sobu ki nai bulubulu, a sa buluti ira na vanua: a ra sa yali sara mai nai soqosoqo. 34Ia sa dro e na vuku ni nodra tagi ko ira kecega na Isireli, sa tiko voliti ira, ni ra kaya, De tilomi keda na vanua.

35A sa lako maivei Jiova na bukawaqa, ka kani ira na lewe rua na drau ka limasagavulu era sa cabora na ka boi vinaka.

36A sa kaya vei Mosese ko Jiova, 37Mo vosa vei Eliesa na luve i Eroni na bete, me la'ki tara mai na veimiqa ni ka boi vinaka mai na yasana sa kama kina, ni sa ka tabu ga; ka mo biuta laivi maikea na bukawaqa; 38a nodra miqa ni ka boi vinaka na tamata oqo sa vakacataka na yalodra, me caka kina eso nai botani mei ubi ni cabocabo-ni-soro: ni ra sa vakacabora na miqa oqo vei Jiova, a sa tabu kina: ka me sai vakatakilakila tiko vei ira na Isireli. 39A sa kauta ko Eliesa na bete ni veimiqa parasa ni ka boi vinaka, era a vakacabora ko ira sa kama; a ra sa tukilaka me rabailevu kina mei ubi ni cabocabo-ni-soro: 40me ra nanuma tikoga na Isireli, me kakua kina na tamata tani, sa sega ni kawa i Eroni, me toro mai me cabora na ka boi vinaka vei Jiova; me kakua ni vakataki Kora, kei na nonai lawalawa: me vaka ka kaya vua ko Jiova e na gusu i Mosese.

41Ia e na mataka, era sa didivaki Mosese kei Eroni nai soqosoqo taucoko ni Isireli, ka kaya, Drau sa vakamatei ira na tamata i Jiova. 42Ia ni ra sa soqoni vata tu nai soqosoqo me vorati Mosese kei Eroni, era sa qai rai yani ki na vale ni veitavaki: ka raica, sa ubia na o, a sa rairai mai na serau i Jiova. 43A rau sa lako mai ki na mata ni vale ni veitavaki ko Mosese kei Eroni. 44A sa kaya vei Mosese ko Jiova, 45Mo drau lako tani mai nai soqosoqo oqo, me'u sa vakarusai ira vakasauri. A rau a cuva vakatoboicu.

46A sa kaya vei Eroni ko Mosese, Mo kauta mada na nomu miqa ni ka boi vinaka, ka biuta kina na bukawaqa mai nai cabocabo-ni-soro, ka viritaka kina na ka boi vinaka, ka lako vakusakusa ki nai soqosoqo, ka sorovaki ira: ni sa lako yani na cudru maivei Jiova; ka sa tekivu na mate levu. 47A sa kauta ko Eroni me vaka na vosa i Mosese, ka cici yani ki na kedra maliwa nai soqosoqo; ka raica, sa tekivu na mate levu vei ira na tamata: a sa viritaka ko koya na ka boi vinaka, ka sorovaki ira na tamata. 48A sa tu ko koya e na kedra maliwa na mate kei na bula; a sa mudu na mate levu. 49Ia ko ira ka ciba e na mate levu, era sa le tinikava na udolu ka vitu na drau, ia sa sega ni wili vata ko ira sa mate e na vuku i Kora. 50A sa lesu maivei Mosese ko Eroni ki na katuba ni vale ni veitavaki; a sa mudu na mate levu.

Vakavakadewa Makawa

©1974 Bible Society of the South Pacific

More Info | Version Index