Search form

NA TIKO MAI NA LEKUTU 18

A nodra cakacaka na bete kei na luve i Livai, 1-7. A nodra i votavota na bete, 8-19; na nodra na Livai, 20-24; kei nai votavota me ra solia vei ira na bete, 25-32.

1A sa kaya vei Eroni ko Jiova, O iko kei ira na luvemu kei na mataqali ni nomu qase, dou na tarogi e na vuku ni cala kecega sa caka e na ka ni vale tabu: ia koi kemudou vata kei ira na luvemu, dou na tarogi e na vuku ni cala sa caka e na nomudou cakacaka vakabete. 2Ia na wekamu talega e na mataqali i Livai, a mataqali ni nomu qase, mo kauta vata kei iko, me ra tiko vei iko, ka qaravi iko; ia koi kemudou vata kei na luvemu, dou na dauveiqaravi e na mata ni vale ni vunau. 3Ia me ra qarava na ka ko sa lesia, kei na cakacaka e na Vale tabu taucoko: ia me ra kakua ga ni torova nai yaya ni tikina tabu kei nai cabocabo-ni-soro, me ra kakua kina ni mate, ko ira kei kemudou talega. 4Ia era na tiko vata kei iko, ka qarava na cakacaka ni vale ni veitavaki, ka ia na cakacaka kecega ni Vale tabu: ia me kakua ni torovi kemudou na tamata tani. 5Ia dou na qarava na cakacaka ni tikina tabu, kei na cakacaka ni cabocabo-ni-soro: me kakua tale ni cudruvi ko ira na Isireli. 6Ia koi au, raica, au sa kauti ira na wekamudou na Livai, maivei ira na Isireli: era sa soli vei kemudou mei solisoli, me nei Jiova, me kitaka na cakacaka ni vale ni veitavaki. 7Ia koi kemudou vata kei na luvemu, dou na kitaka na nomudou cakacaka vakabete e na ka kecega ni cabocabo-ni-soro, kei na ka mai loma ni lati; ia dou na qarava; au sa solia vei kemudou na cakacaka vakabete me cakacaka sa soli: ia na tamata tani sa torova ena vakamatei.

8Sa kaya talega vei Eroni ko Jiova, Raica, au sa solia talega vei iko na cakacaka ni noqu i soro sa lavelaveti, io na ka kecega era vakatabuya na Isireli; au sa solia vei iko mei votavota, vei ira talega na luvemu, me kemudou ka tawa mudu. 9A ka oqo sa maroroi mai na bukawaqa me nomu e na veika sa tabu sara: a ka kecega era vakacabora, na nodra i madrali kecega e laukana, kei na nodra i soro kecega ni valavala ca, kei na nodra i soro kecega ni caka cala, era na solia vei au, ena tabu sara me nomu se me nodra na luvemu. 10Mo kania ga e na tikina tabu sara; ena kania na tagane kecega; sa vakatabui me kemu ga. 11Ia na ka oqo sa kemu; a nodra i soro sa lavelaveti sai solisoli, kei nai soro kecega ni Isireli sa yalovaki: au sa solia vei kemudou kei na luvemu tagane, kei na luvemu yalewa, me kemudou ka tawa mudu: ko ira kecega e na nomu vale sa savasava ena kana kina. 12A waiwai kecega e vinaka sara, kei na waini vinaka sara talega kei na witi vinaka sara, na kedrai sevu era sa vakacabora vei Jiova, au sa solia vei iko. 13Na vuana kecega sa dreu taumada e na nodra vanua, era sa kauta vei Jiova, ena nomu; ko ira kecega e na nomu vale sa savasava ena kana kina. 14A ka kecega era sa vakatabuya na Isireli e na bubului, ena nomu. 15A ulumatua ni ka kecega, era sa kauta vei Jiova, se tamata se manumanu e yavai va, ena nomu: ia na ulumatua ni tamata mo volia sara ga, ka volia talega na ulumatua ni manumanu e yavai va sa sega ni savasava. 16Ia na ka me voli, ni sa vula dua mo volia, me vaka na ka ko sa lewa, me lima na sikeli siliva, me vaka na sikeli ni tikina tabu, (o koya sa ruasagavulu na kera). 17Ia na ulumatua ni pulumokau, se na ulumatua ni sipi, se na ulumatua ni me, mo kakua ni volia; era sa tabu: mo kureitaka ga na kedra dra ki nai cabocabo-ni-soro, ka vakama na kedra uro me ka sa vakacabori e na bukawaqa, me ka boi vinaka vei Jiova. 18Ia ena kemu ga na lewedra; me vaka na serena sa yalovaki, kei na tabana i matau, ena kemu. 19Ai soro kecega sa lavelaveti e na ka tabu, era sa vakacabora vei Jiova na Isireli, au sa solia vei iko kei ira na luvemu tagane, kei na luvemu yalewa, me kemudou ka tawa mudu: oqo na veiyalayalati sa caka e na masima me tawa mudu e na mata i Jiova, vei iko kei ira talega na nomu kawa.

20Sa kaya talega vei Eroni ko Jiova, Ko na sega ni vakaivotavota e na nodra vanua, ia ena sega ni nomu i votavota e na kedra maliwa: au sa nomu tikina koi au, kei na nomu i votavota e na kedra maliwa na Isireli. 21Ka raica, ka'u sa solia vei ira na mataqali i Livai nai katini ni nodra ka kecega na Isireli me nodra i votavota, mei sau ni cakacaka era kitaka, io na cakacaka ni vale ni veitavaki. 22Me ra kakua ni toro tale emuri ki na vale ni veitavaki ko ira na Isireli, de ra cudruvi e nai valavala ca, ka mate. 23Ia ko ira na Livai, era na kitaka na cakacaka ni vale ni veitavaki, ka ra na tarogi ni ra caka cala: sa kenai lesilesi ka sega ni mudu e na nomudou veitabatamata, me kakua na nodra i votavota e na kedra maliwa na Isireli. 24Ia nai katini ni nodra ka na Isireli, era vakacabora mei soro e lavelaveti vei Jiova, au sa solia vei ira na Livai me kedrai votavota: o koya ka'u sa kaya kina vei ira, Me kakua na nodra i votavota e na kedra maliwa na Isireli.

25A sa kaya vei Mosese ko Jiova, 26Ia mo kaya vei ira na Livai, Ni dou sa kauta nai katini ni nodra ka na Isireli, ko koya ka'u sa solia vei kemudou maivei ira me nomudou i votavota, dou na qai vakacabora vei Jiova mei soro e lavelaveti, nai katini ni kenai katini. 27Ia na nomudou i soro e lavelaveti ena nanumi vei kemudou, me vaka sa sila mai na rara ni buturaki sila, kei na waini sa sinai kina nai keli-waini. 28Sa vakakina, dou na vakacabora talega vei Jiova nai soro e lavelaveti, mai na nomudou i katini kecega ni ka dou sa rawata maivei ira na Isireli; ia dou na solia maikina vei Eroni na bete nai soro e lavelaveti vei Jiova. 29Mai na ka kecega sa soli vei kemudou, dou na vakacabora maikina nai soro kecega e lavelaveti vei Jiova, io mai na ka kecega e vinaka sara, ia na tikina sa tabu. 30Mo kaya talega vei ira, Ni dou sa lavelaveta maikina na kena ka vinaka sara, ena qai nanumi vei ira na Livai, me vaka sa sila mai na rara ni buturaki sila kei na waini mai nai keli-waini. 31Ia dou na kania e na tikina kecega, oi kemudou kei ira na nomudou lewe-ni-vale: ni sai sau ni nomudou cakacaka e na vale ni veitavaki. 32Ia dou na sega ni cudruvi kina e nai valavala ca, ni dou sa vakacabora na kena e vinaka sara: dou na sega talega ni vakatawasavasavataka na nodra ka tabu na Isireli, de dou mate.

Vakavakadewa Makawa

©1974 Bible Society of the South Pacific

More Info | Version Index