Search form

NA TIKO MAI NA LEKUTU 19

A lawa e na vuku ni wai ni veivakasavasavataki, 1-10, kei na kenai valavala, 11-22.

1A sa kaya vei Mosese kei Eroni ko Jiova, 2Sa vakaoqo nai valavala ni lawa sa vakarota ko Jiova, ka vaka, Mo kaya vei ira na Isireli, me ra kauta mai vei iko e dua na pulumokau yalewa damudamu, sa sega na kena ca, ka sa vinaka taucoko, sa sega ni toka kina nai vua: 3ia dou qai solia kivei Eliesa na bete, me kauta ki nai bili ni tikotiko, me qai vakamatei e matana: 4me qai tara na kena dra e na nonai qaqalo ko Eliesa na bete, ka kureitaka vakavitu me donuya na mata ni vale ni veitavaki: 5me qai vakamai na pulumokau e matana; na kulina, kei na lewena, kei na kena dra, kei na dena: 6me qai kauta na kau sitari na bete, kei na isopi, kei na ka kulakula, ka biuta ki na bukawaqa sa kama kina na pulumokau: 7me qai savata na nonai sulu na bete, ka sili e na wai, ka oti ena qai lako mai ki loma ni tikotiko, ia ena sega ni savasava na bete ka yacova na yakavi. 8Kei koya sa vakama na pulumokau, ena savata nonai sulu e na wai, ka sili e na wai, ia ena qai sega ni savasava ka yacova na yakavi. 9Ia me qai dua na tamata e savasava me kumuna vata na dravusa ni pulumokau yalewa, ka maroroya e na tikina savasava mai nai bili ni tikotiko, ia ena maroroi me nodra nai soqosoqo ni Isireli me wai sa savai koya sa tawase: oqori sa dua nai sava ni valavala ca. 10Ia ko koya sa kumuna na dravusa ni pulumokau yalewa me savata nonai sulu, ia ena tawa savasava ka yacova na yakavi. Ia oqo sai vakaro ka tawa mudu vei ira na Isireli, kei na kai tani sa tiko vulagi kei ira.

11O koya sa tara na yago ni tamata sa mate ena sega ni savasava ka bogi vitu: 12ia me vakasavasavataki koya kina e nai katolu ni siga, ia e nai kavitu ni siga ena savasava ko koya: ia kevaka sa sega ni vakasavasavataki koya e nai katolu ni siga, ena sega ni savasava e nai kavitu ni siga. 13O koya sa tara na yago ni tamata sa mate, ka sa sega ni vakasavasavataki koya, sa vakadukadukalitaka na vale i Jiova; ia na tamata ko ya ena muduki tani maivei ira na Isireli: ni sa sega ni kureitaki vua na wai sa savai koya sa tawase, sa sega ni savasava ko koya; sa tiko ga vua na nona tawa savasava.

14Oqo na lewa, ni sa mate e dua na tamata e na vale laca: o ira kecega sa curu ki vale laca, kei ira kecega era tiko kina, ena sega ni savasava ka bogi vitu: 15kei na bilo kecega sa dola tu, sa sega ni vauci kina na kenai ubi, ena sega ni savasava: 16kei ira kecega era tara e dua sa vakamatei e nai seleiwau mai vanua, se dua sa mate wale, se na sui ni tamata, se nai bulubulu, ena sega ni savasava ka bogi vitu.

17Ia e na vukuna sa sega ni savasava, me ra kauta eso na dravusa ni ka sa vakamai mei sava ni valavala ca, ka sova kina na wai drodro ki na dua na bilo: 18me qai dua na tamata savasava me kauta na isopi ka tonia e na wai, ka kureitaka ki na vale laca, kei nai yaya kecega, kei na tamata era tiko kina, kei koya sa tara na sui, se koya sa vakamatei, se koya sa mate wale, se nai bulubulu: 19ia ko koya sa savasava ena kureitaka vua sa sega ni savasava e nai katolu ni siga, kei nai kavitu ni siga: ia e nai kavitu ni siga me vakasavasavataki koya, ka savata nonai sulu, ka sili e na wai, ena qai savasava e na yakavi. 20Ia na tamata sa sega ni savasava, ka sa sega ni vakasavasavataki koya, ena muduki tani maivei ira nai soqosoqo, ni sa vakadukadukalitaka na vale tabu i Jiova: sa sega ni kureitaki vua na wai sa savai koya sa tawase; sa sega ni savasava ko koya. 21Ia oqo sai vakaro ka tawa mudu vei ira, me savata na nonai sulu ko koya sa kureitaka na wai sa savasava kina ko koya sa tawase, ena sega talega ni savasava ka yacova na yakavi ko koya sa tara na wai sa vakasavasavataki koya sa tawase. 22Kei na ka kecega sa tara ko koya sa sega ni savasava, ena sega ni savasava; kei koya sa tara ena sega ni savasava ka yacova na yakavi.

Vakavakadewa Makawa

©1974 Bible Society of the South Pacific

More Info | Version Index