Search form

NA TIKO MAI NA LEKUTU 2

Ai valavala ni nodra i tikotiko.

1A sa vosa vei Mosese kei Eroni ko Jiova, ka kaya, 2Me ra tiko ko ira na Isireli, na tamata yadua me voleka ki na nona kuila, me vaka na tawake ni vale ni nodra qase: me ra tiko me donuya na vale ni veitavaki, me volita.

3Ia na kuila ni nodra i tikotiko na Juta me vakarewa ki na tu-i-cake vaka ki nai cadracadra ni mata-ni-siga ka me nodra i tikotiko na veivavakoso nei Juta: ia me turaga vei ira na luve i Juta ko Nasoni na luve i Aminatapi: 4ia na nonai vavakoso, io ko ira sa wili maivei ira, era le vitusagavulu ka va na udolu ka ono na drau. 5Ia me sa tiko voleka vei ira na mataqali i Isakari: ia me turaga vei ira na luve i Isakari ko Nicaneli na luve i Suari: 6ia na nonai vavakoso, io ko ira sa wili maivei ira, era le limasagavulu ka va na udolu ka va na drau: 7kei na mataqali i Sepuloni: ia me turaga vei ira na luve i Sepuloni ko Iliapi na luve i Eloni: 8ia na nonai vavakoso, io ko ira sa wili maivei ira, era le limasagavulu ka vitu na udolu ka va na drau. 9O ira kecega sa wili e na nodra i tikotiko na Juta, era le dua na drau ka walusagavulu ka ono na udolu ka va na drau, e na nodra veivavakoso. O ira oqo era na liu e na lako.

10Na kuila ni nodra i tikotiko na Rupeni ena donuya na ceva, e na nodra veivavakoso: ia me turaga vei ira na luve i Rupeni ko Ilisuri na luve i Siteuri: 11ia na nonai vavakoso, io ko ira sa wili maivei ira, era le vasagavulu ka ono na udolu ka lima na drau. 12Ia me tiko voleka vei ira na mataqali i Simioni: ia me turaga vei ira na luve i Simioni ko Silumieli na luve i Surisatai: 13ia na nonai vavakoso, io ko ira sa wili maivei ira, era le limasagavulu ka ciwa na udolu ka tolu na drau: 14kei na mataqali i Kata: ia me turaga vei ira na luve i Kata ko Eliasafi na luve i Riueli: 15ia na nonai vavakoso, io ko ira sa wili maivei ira, era le vasagavulu ka lima na udolu ka ono na drau ka limasagavulu. 16O ira kecega sa wili e na nodra i tikotiko na Rupeni, era le dua na drau ka limasagavulu ka dua na udolu ka va na drau ka limasagavulu, e na nodra veivavakoso. Ia era na kenai karua e na lako.

17Ena qai lako vata na vale ni veitavaki, kei ira na Livai e na veimama ni veivavakoso: me vaka na nodra tiko, ena vakakina na nodra lako, na tamata yadua e nona tikina ka voleka ki na nodra kuila.

18Na kuila ni nodra i tikotiko na Ifireimi ena donuya na ra, e na nodra veivavakoso: ia me turaga vei ira na luve i Ifireimi ko Ilisama na luve i Amiute: 19Ia na nonai vavakoso, io ko ira sa wili maivei ira, era le vasagavulu na udolu ka lima na drau. 20Ia me sa tiko voleka vei ira na mataqali i Manasa: ka me turaga vei ira na luve i Manasa ko Kamelieli na luve i Pitasuri: 21ia na nonai vavakoso, io ko ira sa wili maivei ira, era le tolusagavulu ka rua na udolu ka rua na drau. 22Kei na mataqali i Penijamini: ia me turaga vei ira na luve i Penijamini ko Epitani na luve i Kitioni: 23ia na nonai vavakoso, io ko ira sa wili maivei ira, era le tolusagavulu ka lima na udolu ka va na drau. 24O ira kecega sa wili e na nodra i tikotiko na Ifireimi, era le dua na drau ka walu na udolu ka dua na drau, e na nodra veivavakoso. Ia era na kenai katolu e na lako.

25Na kuila ni nodra i tikotiko na Tani ena donuya na tokalau, e na nodra veivavakoso: ia me turaga vei ira na luve i Tani ko Eieseri na luve i Amisatai: 26Ia na nonai vavakoso, io ko ira sa wili maivei ira, era le onosagavulu ka rua na udolu ka vitu na drau. 27Ia me tiko voleka vei ira na mataqali i Aseri: ia me turaga vei ira na luve i Aseri ko Pakieli na luve i Okirani: 28ia na nonai vavakoso, io ko ira sa wili maivei ira, era le vasagavulu ka dua na udolu ka lima na drau. 29Kei na mataqali i Nafitalai: ia me turaga vei ira na luve i Nafitalai ko Eira na luve i Enani: 30ia na nonai vavakoso, io ko ira sa wili maivei ira, era le limasagavulu ka tolu na udolu ka va na drau. 31O ira kecega sa wili e na nodra i tikotiko na Tani, era le dua na drau ka limasagavulu ka vitu na udolu ka ono na drau. Era na muri sara e na lako, me vaka na nodra kuila.

32O ira oqo era sa wili maivei ira na Isireli, kei na veivuvale ni nodra qase; ko ira kecega era sa wili e nodra i tikotiko, e na nodra veivavakoso, era le ono na drau ka tolu na udolu ka lima na drau ka limasagavulu. 33Ia sa sega ni wili vata kei ira na Isireli ko ira na Livai; me vaka ka vakarota vei Mosese ko Jiova.

34A ra sa kitaka na Isireli me vaka na ka kecega sa vakarota vei Mosese ko Jiova: a ra sa dui tiko voleka ki na nodra kuila a sa vakakina na nodra i lakolako, ko ira yadua e nodra veimataqali, me vaka na veivuvale ni nodra qase.

Vakavakadewa Makawa

©1974 Bible Society of the South Pacific

More Info | Version Index