Search form

NA TIKO MAI NA LEKUTU 20

Sa mate ko Miriama, 1. Era didi na tamata ni sa sega na wai, a sa vure na wai mai na vatu, ni sa tukia ko Mosese, 2-13. Sa ra bese ko ira na Itomi ni solia na sala vei ira na Isireli me ra lako e nodra vanua, 14-21. Sa mate ko Eroni, a sa kenai sosomi ko Eliesa 22-29.

1Era sa qai lako mai na Isireli, io ko ira nai soqosoqo taucoko, ki na vanua liwa ko Sini, e nai matai ni vula: a ra sa tiko mai Ketesa na tamata; a sa mate maikea ko Miriama, a sa bulu kina.

2A sa sega na medra wai nai soqosoqo: a ra sa soqoni vata me veivorati kei Mosese kei Eroni. 3A ra sa veileti kei Mosese na tamata, ka kaya, ulei, na Kalou, E ca ni keimami a sega ni ciba ni ra ciba e na mata i Jiova na weka i keimami! 4Ia a cava drau sa kauti ira kina nai soqosoqo i Jiova ki na vanua liwa oqo, me keimami mate kina kei na neimami manumanu e yavai va? 5Ia a cava drau sa kauti keimami cake kina mai Ijipita, me kauti keimami ki na vanua ca oqo? sa sega ni vanua ni sore ni kau, se ni lolo, se ni veivaivaini, se ni pomekaraneti; ka sa sega talega na wai ni gunu.

6A rau a lako yani ko Mosese kei Eroni maivei ira nai soqosoqo ki na katuba ni vale ni veitavaki, a rau sa cuva vakatoboicu: a sa rairai vei rau na serau i Jiova. 7A sa kaya vei Mosese ko Jiova, 8Mo kauta nai titoko, ka vakasoqoni ira vata nai soqosoqo, ko iko kei Eroni na tuakamu, ia drau vosa ki na uluvatu e na matadra me solia mai na kena wai; ia ko na kauta mai vei ira na wai mai na vatu: ko na vagunuva kina nai soqosoqo kei na nodra manumanu e yavai va.

9A sa kauta nai titoko ko Mosese mai na mata i Jiova, me vaka ka vakarota vua. 10A rau sa vakasoqona vata nai soqosoqo ko Mosese kei Eroni me ra donuya na uluvatu, a sa kaya vei ira ko koya, Dou rogoca mada, na tamata talaidredre; me keirau vakavurea beka mai na memudou wai mai na vatu oqo? 11A sa dodoka na ligana ko Mosese, ka tukia vakarua na vatu e nonai titoko: a sa dave vakalevu na wai; a ra sa gunu nai soqosoqo, kei na nodra manumanu e yavai va.

12A sa kaya vei Mosese kei Eroni ko Jiova, Ni drau a sega ni vakabauti au, mo drau dokai au e na matadra na Isireli, drau na sega kina ni kauta nai soqosoqo oqo ki na vanua ka'u sa solia vei ira.

13Oqo na wai ni Meripa [A veileti]; ni ra veileti kei Jiova na Isireli: ia sa vakarokorokotaki ko koya vei ira.

14A sa tala eso nai talaki ko Mosese mai Ketesa vua na tui Itomi, me kaya vua, Sa vosa vakaoqo na wekamu na Isireli, Ko sa kila na oca kecega sa yacovi keimami: 15ni ra a lako sobu ki Ijipita na neimami qase, ka keimami sa tiko vakadede mai Ijipita; a ra sa vakararawataki keimami, kei ira ka neimami qase, ko ira na kai Ijipita: 16ia ni keimami a tagi vei Jiova, sa rogoca na domo i keimami ko koya, a sa tala na agilose, ka kauti keimami tani mai Ijipita; ka raica, keimami sa mai tiko e Ketesa, na koro e nai yalayala ni nomu vanua: 17au sa kerei iko mo laivi keimami me keimami lako mada e nomu loma ni vanua: keimami na sega ni lako e loma ni veiwere, se na veivaivaini, keimami na sega talega ni gunuva na wai mai nai keli-wai: keimami na lako ga e na salatu ni tui, keimami na sega ni lako vaka ki nai matau se ki nai mawi, ka me keimami sivia mada nai yalayala ni nomu vanua. 18A sa kaya vua ko tui Itomi, Mo kakua ni lako e noqu loma ni vanua, de'u sa la'ki veivala kei iko. 19A ra sa kaya vua ko ira na Isireli, Keimami na lako ga e na salatu: ia kevaka keimami sa gunuva na nomu wai, koi au, se na noqu manumanu e yavai va, ka'u na sauma ga: au na lako walega e yavaqu, ka sai koya ga. 20A sa kaya ko koya, Ko na sega ni lako kina. A sa lako yani ko tui Itomi, kei ira na tamata e lewe vuqa, me veivala kei ira. 21A sa bese ko tui Itomi ni laivi ira na Isireli me ra lako e nona loma ni vanua: a sa gole tani mai vua ko ira na Isireli.

22A ra sa lako mai Ketesa ko ira na Isireli, ko ira nai vavakoso taucoko, ka yaco ki na ulu-ni-vanua ko Ori.

23A sa vosa vei Mosese kei Eroni ko Jiova mai na ulu-ni-vanua ko Ori, e nai yalayala ni vanua ko Itomi, ka kaya, 24Ko Eroni, ena toki yani vei ira na kai nona: ni na sega ni curu ki na vanua ka'u sa solia vei ira na Isireli, ni drau a talaidredre ki na noqu vosa mai na wai ko Meripa: 25mo kauti Eroni kei Eliesa na luvena, ka kauti rau cake ki na ulu-ni-vanua ko Ori: 26ia mo luvata nai sulu i Eroni, ka vakasuluma kina na luvena ko Eliesa: ena qai toki yani vei ira na kai nona ko Eroni, io ena mate maikea. 27A sa kitaka ko Mosese me vaka ka vakarota ko Jiova: a ratou a cabeta na ulu-ni-vanua ko Ori, e na matadra nai soqosoqo taucoko: 28a sa luvata nai sulu i Eroni ko Mosese, ka vakasuluma kina na luvena ko Eliesa; a sa ciba maikea ko Eroni e na dela ni ulu-ni-vanua: a rau sa siro sobu mai na ulu-ni-vanua ko Mosese kei Eliesa. 29Ia ni ra sa raica nai soqosoqo taucoko ni sa mate ko Eroni, era a tagicaki Eroni ka bogi tolusagavulu, io ko ira kecega na mataqali i Isireli.

Vakavakadewa Makawa

©1974 Bible Society of the South Pacific

More Info | Version Index