Search form

NA TIKO MAI NA LEKUTU 21

Sa veivala kei ira na Isireli ko tui Arati, 1-3. Era didi na tamata, 4,5. Sa kati ira na tamata na gata; era sa vakabulai ni ra raica na gata parasa, 6-9. Era toki tale, 10-20. Era veivala kei Sioni, 21-30; kei Oki, 33-35.

1Ia ko tui Arati na kai Kenani, o koya ka tiko ki na ceva, sa rogoca ni ra sa lako mai na Isireli e na sala ka ra lako kina na rai vanua; sa qai vala kei ira na Isireli, ka vakabobulataki ira eso. 2Ia era sa bubului vei Jiova ko ira na Isireli, ka kaya, Kevaka kemuni na soli ira dina na tamata oqo ki na ligaqu, ka'u na qai vakarusa sara na nodra veikoro. 3A sa rogoca na nodra vosa na Isireli ko Jiova, ka soli ira na kai Kenani kivei ira: a ra sa vakarusai ira sara kei na nodra veikoro; a sa vakatokai na yaca ni yasana ko ya ko Orima.

4A ra sa lako tani mai na ulu-ni-vanua ko Ori e na sala vaka ki na Wasa Damudamu, me lako volita na vanua ko Itomi: a sa waicala na yalodra na tamata e na vuku ni sala. 5A ra sa vosavakacacataka na Kalou, kei Mosese, ko ira na tamata, ka kaya, A cava drau sa kauti keimami cake kina mai Ijipita, me mate e na vanua liwa? ni sa sega na kakana, ka sa sega na wai; a sa vakavure lua e na loma i keimami na kakana vakasisila oqo.

6A sa tala na gata vakabukawaqa e na kedra maliwa na tamata ko Jiova, a ra sa kati ira na tamata; ka sa mate kina e lewe vuqa vei ira na Isireli. 7A ra sa lako mai vei Mosese na tamata, ka kaya, Keimami sa cala, ni keimami sa vosavakacacataki Jiova, kei iko; mo masuti Jiova me kauta tani vei keimami na gata. A sa masulaki ira ko Mosese. 8A sa kaya vei Mosese ko Jiova, Mo cakava e dua na gata vakabukawaqa, ka vauca ki na mua ni dua na kau balavu: ia era na bula ko ira kecega sa laukata, ni ra sa raica. 9A sa cakava e dua na gata parasa ko Mosese, ka vauca ki na mua ni dua na kau balavu, a sa yaco, kevaka sa katia e dua na tamata na gata, ni sa raica na gata parasa ko koya, sa bula kina.

10A ra sa lako na Isireli, ka la'ki tiko mai Opoci.

11A ra sa lako mai Opoci, ka la'ki tiko mai Iye ni Eparimi, mai na lekutu sa donui Moapi vaka ki na isiti.

12Era sa qai cavu tu, ka la'ki tiko mai na buca mai Sereti. 13Era sa lako maikina, ka la'ki tiko mai na yasana kadua ni Arinoni, ko ya mai na lekutu ka lako mai nai yalayala ni Amoraiti: ni sai yalayala i Moapi ko Arinoni, e na macawa kei Moapi kei na Amoraiti. 14O koya sa tukuni kina e nai vola ni valu i Jiova. Ko Vaepa mai Sufa, Kei na Uciwai ko Arinoni, 15Kei na soniwai ni uciwai sa lako sobu ki na yasana ko Ari, Ka qarava nai yalayala i Moapi.

16Ia maikina era sa lako ki Pieri: ko ya nai keli-wai ka vosa kina vei Mosese ko Jiova. Mo vakasoqoni ira vata na tamata, ka'u na solia vei ira na wai. 17Sa qai seretaka na sere oqo ko ira na Isireli, Na keli-wai, mo vure mai; mo dou seretaka: 18Nai keli-wai era sa kelia na turaga, Io era sa caramaka ko ira sa lewai ira na tamata, E na nodra doko, ni vakarota ko koya na vu-ni-vunau. Ia mai na lekutu era lako ki Matana: 19ia mai Matana era lako ki Neelieli: ia mai Neelieli era lako ki Pamoci: 20ia mai Pamoci e na buca, mai na vanua ko Moapi, ki na dela i Pisika ko ya sa donuya na Veikau.

21A sa tala eso nai talaki na Isireli kivei Sioni na nodra tui na Amoraiti, me ra kaya, 22Me'u lako mada yani e nomu loma ni vanua: keimami na sega ni lako ki na veiwere, se ki na veivaivaini; keimami na sega ni gunuva na wai mai nai keli-wai: keimami na lako ga e na salatu ni tui, ka me keimami sivia mada nai yalayala ni nomu vanua. 23Ia sa bese ni laivi ira na Isireli ko Sioni me ra lako e nona loma ni vanua: ia sa vakasoqoni ira vata ga na nona tamata kecega ko Sioni, ka la'ki veivala kei ira na Isireli ki na lekutu: a sa yaco ki Jeasa, ka veivala kei ira na Isireli: 24a sa yaviti koya ko ira na Isireli e nai seleiwau, ka ra taukena na nona vanua, mai Arinoni ka la'ki yala ki Japoki, ia sa yala vei ira na luve i Amoni: ni sa kaukauwa na nodra i yalayala na luve i Amoni. 25A ra sa kaba na veikoro kecega oqori ko ira na Isireli: a ra sa tiko na Isireli e na nodra veikoro kecega na Amoraiti, mai Esiponi, kei na kena koro lalai kecega: 26Ia ko Esiponi na koro nei Sioni na nodra tui na Amoraiti, o koya ka veivala kei na tui Moapi eliu, ka kovea mai vua na nona vanua taucoko, ka yala ki Arinoni. 27Oqo era daukaya kina ko ira era taurivaka nai bole; Dou lako mai ki Esiponi: Me tara mada na koro i Sioni, ka vakacokotaki; 28Ni sa lako mai Esiponi na bukawaqa, Na yameyame ni bukawaqa mai na koro i Sioni: Sa kani Ari mai Moapi Ko iratou na turaga ni veiyasana cecere ni Arinoni. 29Ko sa ca, ko iko Moapi! Dou sa rusa, na tamata i Kimosi: Sa solia ko koya na luvena tagane me dro bula, Kei na luvena yalewa me ra bobula Vei Sioni na nodra tui na Amoraiti. 30Eda sa vanai ira; sa rusa ko Esiponi ka yaco ki Taiponi; Ia eda sa vakacaca ka yacovi Nofa, Ko ya sa volekati Metipa.

31A sa tiko e na nodra vanua na Amoraiti ko ira na Isireli. 32A sa talaki ko Mosese me yamata ki Jaseri, a ra sa kaba na kena veikoro lalai, ka vakasevi ira na Amoraiti era tiko kina.

33A ra sa gole yani, ka lako cake e na sala ki Pasani: a sa la'ki veivala kei ira ko Oki na tui Pasani, ko koya, kei ira kecega na nona tamata, me ra ia nai valu mai Etirei. 34A sa kaya vei Mosese ko Jiova, Mo kakua ni rerevaki koya: ni'u sa soli koya ki na ligamu, kei na nona tamata kecega kei na nona vanua; ia ko na kitaka vua me vaka ko a kitaka vei Sioni na nodra tui na Amoraiti, ko koya ka tiko mai Esiponi. 35A ra sa mokuti koya, kei iratou na luvena, kei na nona tamata kecega, ka sa sega ni vo bula vua e dua na tamata: a ra sa taukena na nona vanua.

Vakavakadewa Makawa

©1974 Bible Society of the South Pacific

More Info | Version Index