Search form

NA TIKO MAI NA LEKUTU 23

Sa via vatonaki ira na Isireli ko Pelami, ka sa tarova tikoga ko Jiova.

1Ka sa kaya vei Pelaki ko Pelami, Mo cakava mada eke vei au e vitu nai cabocabo-ni-soro, ka vakarautaka eke e vitu na pulumokau, ka vitu na sipi tagane. 2A sa kitaka ko Pelaki me vaka na vosa i Pelami; a sa vakacabora ko Pelaki kei Pelami, e nai cabocabo-ni-soro yadua, e dua na pulumokau ka dua na sipi tagane. 3A sa kaya vei Pelaki ko Pelami, Mo tu voleka mada ki na nomu i soro kama, ka'u na lako mada: de mai tavaki au ko Jiova: ia na ka sa vakatakila mai vei au, au na tukuna vei iko. A sa lako yani ko koya ki na tikina cecere.

4A sa mai tavaki Pelami na Kalou: a sa kaya vua ko koya, Au sa cakava oti e vitu nai cabocabo-ni-soro, ka vakacabora oti e nai cabocabo-ni-soro yadua e dua na pulumokau ka dua na sipi tagane. 5A sa solia na vosa ki na gusu i Pelami ko Jiova, a sa kaya, Mo lesu vei Pelaki, ka vosa vakaoqo. 6A sa lesu vei koya; ka raica, sa tu voleka ki na nonai soro kama, o koya, kei ira kecega na turaga ni Moapi. 7A sa lagata na nona vosa vakaibalebale, ka vaka, Sa kauti au mai Erami ko Pelaki Na tui Moapi mai na veiulu-ni-vanua mai na tu-i-cake, Mo lako mai, mo vatonaki ira na Jekope e na vukuqu; Ia mo lako mai, mo lesavi ira na Isireli. 8Au na vatonaki koya vakacava sa sega ni vatonaka ko koya na Kalou? Se'u na lesavi koya vakacava sa sega ni lesava ko Jiova? 9Mai na dela ni uluvatu ka'u sa raici koya, Ka kunei koya mai na veivanua cecere: Raica, era sa tiko vakataki ira na tamata, Ka na sega ni wili vata kei ira na veimatanitu. 10O cei me wiliki ira rawa na Jekope sa vaka na kuvu ni soso, Se okata e dua na kena wase ni Isireli ni sa wase va? Me'u mate mada me vaka sa mate na tamata yalododonu, Ia me vaka mada na nonai otioti me vakakina na noqu i otioti!

11A sa kaya vei Pelami ko Pelaki, A cava ko sa kitaka vei au? au a kauti iko mo mai vatonaki ira na noqu meca; ka raica, ko sa vosavakalougatataki ira sara. 12A sa kaya ko koya, Me'u kakua beka ni nanuma vinaka me'u cavuta ga na ka sa solia mai vei au ko Jiova?

13A sa kaya vua ko Pelaki, Daru lako mada ki na yasana tani, ko na raici ira maikina: ko na raici ira walega era sa tiko vakayawa ia ko na sega ni raici ira kecega; ia mo vatonaki ira maikea. 14A sa kauti koya ki na vanua ko Sofimi, ki na dela i Pisika, ka cakava e vitu nai cabocabo-ni-soro, ka vakacabora e nai cabocabo-ni-soro yadua e dua na pulumokau ka dua na sipi tagane. 15A sa kaya vei Pelaki ko koya, Mo tu mada eke voleka ki na nomu i soro kama, ka'u na lako mada yani me'u veitavaki kei Jiova.

16A sa mai tavaki Pelami ko Jiova, ka solia e dua na vosa vua, ka kaya, Mo lesu vei Pelaki, ka vosa vakaoqo. 17Ia ni sa lako mai kivei koya, raica, sa tu voleka ki na nonai soro kama, kei ira vata kaya na turaga ni Moapi. A sa kaya vua ko Pelaki, A cava sa kaya ko Jiova? 18A sa lagata na nona vosa vakaibalebale, ka kaya, I Pelaki, mo tu cake ka vakarorogo; Mo rogoci au, na luve i Sipori: 19Sa sega ni tamata na Kalou, me mai vosa lasu ko koya; Se na luve ni tamata, me mai veivutuni: Sa kaya li ko koya, ka na sega ni cakava? Se sa vosa li ko koya, ka na sega ni vakayacora? 20Raica, sa vakaroti vei au me'u vosavakalougatataka, A sa vakalougatataka ko koya; ia ka'u sa sega ni vakadaroya rawa. 21Sa sega ni raica ko koya na cala vei ira na Jekope, Ia sa sega ni raica ko koya na yalovakatani vei ira na Isireli: Sa tiko kaya ko Jiova na nodra Kalou, Ia sa dua na tui sa kailavaki e na kedra maliwa. 22Sa kauti ira tani mai Ijipita na Kalou; Sa kaukauwa ko ira me vaka na iunikoni. 23Sa sega sara ni sauvi rawa ko ira na Jekope, Ka sega ni vakayacori rawa na ca vei ira na Isireli: E na gauna oqo sa kainaki e na vukudra na Jekope kei na Isireli, A ka vakaidina sa cakava na Kalou! 24Raica, era na tu cake na tamata me vaka na laioni yalewa, Ka wavu tu me vaka na laioni: Ena sega ni koto tale, ena kania mada na kena sa rawa, Ka gunuva na dra ni kena sa vakamatei.

25A sa kaya vei Pelami ko Pelaki, Mo kakua sara ni vatonaki ira, mo kakua talega ni vosavakalougatataki ira. 26A sa kaya vei Pelaki ko Pelami, Au a sega li ni tukuna vei iko, ka kaya, A ka kecega sa kaya ko Jiova, ko ya ga au na kitaka?

27A sa kaya vei Pelami ko Pelaki, Daru lako mada, au na kauti iko ki na dua na yasana tani: de sa qai vinaka vua na Kalou mo vatonaki ira maikea. 28A sa kauti Pelami ko Pelaki ki na dela i Piori, ko koya sa donuya na Veikau. 29A sa kaya vei Pelaki ko Pelami, Mo cakava vei au eke e vitu nai cabocabo-ni-soro, ka vakarautaka vei au eke e vitu na pulumokau ka vitu na sipi tagane. 30A sa kitaka ko Pelaki me vaka na vosa i Pelami, ka vakacabora e nai cabocabo-ni-soro yadua e dua na pulumokau ka dua na sipi tagane.

Vakavakadewa Makawa

©1974 Bible Society of the South Pacific

More Info | Version Index