Search form

NA TIKO MAI NA LEKUTU 24

Sa baci vosavakalougatataki ira tale na Isireli ko Pelami, 1-9. Sa veileti kaya tale ko Pelaki, 10-14; a sa cavuta ko Pelami eso na ka ena yaco, 15-24. Sa lesu tale ki na nona vanua, 25.

1Ia ni sa raica ko Pelami ni sa vinaka vei Jiova me vakalougatataki ira na Isireli, sa sega ni goleva tale, me vaka eliu, na ka ni veinita, ia sa vakanamata ga vaka ki na lekutu. 2A sa ta cake ko Pelami, a sa raici ira na Isireli ni ra sa tiko vakamataqali; a sa curumi koya na Yalo ni Kalou. 3A sa lagata ko koya na nona vosa vakaibalebale, ka vaka; Sa kaya ko Pelami, na luve i Piori, Io sa kaya na tamata ka vakayadrati na matana: 4Sa kaya ko koya sa rogoca na vosa ni Kalou, Ko koya sa raica na raivotu i Koya na Kaukauwa, Sa bibi mai, ia sa yadra ga na matana: 5A ka talei na nomudou veivale laca, na Jekope! Na nomudou veivale ni tiko, na Isireli! 6Sa tevuki yani me vaka na veibuca, Ka vaka na veiwere mai na bati ni uciwai, Sa vaka na yasiyasi sa tea ko Jiova, Ka vaka na sitari e na bati ni wai. 7Ena nodra na veisaqa sa drodro maikina na wai, Ia ena nodra na sila-tei e loma ni wai e vuqa; Ena levu na nodra tui, ka lailai ko Ekaki, Ia ena vueti cake na nodra matanitu. 8Sa kauti ira tani mai Ijipita na Kalou; Sa kaukauwa ko ira e vaka na iunikoni: Ena kania na veimatanitu era nodra meca, Ka qurulaka na suidra, Ka laubasikataka e na nona gasau. 9Sa koto sobu, sa koto me vaka na laioni, Ka vaka na laioni yalewa: ko cei ena vakayadrata? Sa kalougata ko ira yadua sa vosavakalougatataki iko, Ka me ra cudruvi ko ira yadua sa vatonaki iko.

10A sa waqa mai vei Pelami na cudru i Pelaki, a sa tavia vata na ligana: a sa kaya vei Pelami ko Pelaki, Au a kacivi iko mo vatonaki ira na noqu meca, ka raica, ko sa vosavakalougatataka sara ka vakatolu vakaoqo: 11ia oqo, mo dro ki na nomu yasana: au a kaya me'u vakalevulevui iko sara; ka raica, sa vakadaroya ko Jiova mo kakua kina ni vakalevulevui.

12A sa kaya vei Pelaki ko Pelami, Au a sega beka ni vosa vei ira na nomu i talaki ko a tala vei au, ka vaka, 13Kevaka sa na solia mai vei au ko Pelaki na siliva kei na koula e sinai rawa kina na nona vale, au sa sega ni sivia rawa na vosa i Jiova, me'u kitaka na ka vinaka se na ka ca e lomaqu walega; na ka ga sa cavuta ko Jiova, oqori ka'u na cavuta? 14Ia oqo, raica, ka'u sa lako vei ira na kai noqu: me'u na vakatakila mada vei iko na ka era na cakava e na gauna maimuri na tamata oqo kivei ira na nomu tamata. 15A sa lagata ko koya na nona vosa vakaibalebale, ka kaya, Sa kaya ko Pelami na luve i Piori, A sa kaya na tamata ka vakayadrati na matana: 16Sa kaya ko koya sa rogoca na vosa ni Kalou, Ka kila nai vakavuvuli i Koya na Cecere, Ko koya sa raica na raivotu i Koya na Kaukauwa, Sa bibi mai, a sa yadra ga na matana: 17Au sa raici koya, ka sa bera ga ko koya: Au sa raici koya, ka sa yawa ga ko koya: Ena vura mai e dua na kalokalo mai vei Jekope, Ka tubu e dua nai titoko vakatui mai vei Isireli, Ka yavita na veiyalayala ni Moapi, Ka vakawabokotaki ira kecega na luve i Seci: 18Ia ena taukeni Itomi ko koya, Ena taukeni Sia talega ko ira na nona meca; Ia ena gumatua na Isireli. 19Ia ko koya sa daulewa ena lako mai vei Jekope, Ka vakarusai ira era sa vo e na koro.

20A sa raici ira na Amaleki ko koya, a sa lagata na nona vosa vakaibalebale, ka kaya, Ko Amaleki ka levu vei ira na veimatanitu, Ia emuri ena rusa laivi ko ira.

21A sa raici ira na Kenaiti ko koya, a sa lagata na nona vosa vakaibalebale, ka kaya, Sa kaukauwa na nomudou i tikotiko, E na uluvatu sa caka na nomudou i mocemoce:

22Ia ena malai yani na Kenaiti, Me yaco mada na gauna sa vakabobulataki kemudou kina na kai Asiria.

23A sa lagata ko koya na nona vosa vakaibalebale, ka kaya, Ulei, ko cei me bula rawa ni sa kitaka na ka oqo na Kalou! 24Ia ena lako mai eso na waqa mai na baravi kei Kitimi, Ka vakararawataki Asiria, ka vakararawataki ira na Iperi, Ka na rusa laivi talega ko koya.

25A sa cavu tu ko Pelami, ka la'ki lesu ki na nona yasana: a sa lako talega e nona sala ko Pelaki.

Vakavakadewa Makawa

©1974 Bible Society of the South Pacific

More Info | Version Index