Search form

NA TIKO MAI NA LEKUTU 25

Era sa dauyalewa mai Sitimi ko ira na Isireli, 1-5. Ai valavala i Finiase, 6-9. Sa lesi me nonai tavi na cakacaka vakabete, 10-18.

1A sa tiko mai Sitimi ko ira na Isireli, a ra sa qai dauveibutakoci kei ira na goneyalewa ni Moapi ko ira na tamata. 2Ka ra sa kacivi ira na tamata ki nai soro vei ira na nodra kalou: a ra sa kana na tamata, ka cuva ki na nodra kalou na yalewa. 3A ra sa kabiti Peali-piori na Isireli: a sa waqa mai na cudru i Jiova vei ira na Isireli. 4A sa kaya vei Mosese ko Jiova, Mo tauri ira kecega era sa turaga vei ira na tamata, ka vakarubeci ira e mata-ni-siga vei Jiova, me mudu kina na cudru i Jiova vei ira na Isireli. 5A sa kaya ko Mosese vei ira na mataveilewai e Isireli, Dou dui vakamatea yadua na nona tamata era sa kabiti Peali-piori.

6Ka raica, sa lako mai e dua vei ira na Isireli, ka kauta mai kivei ira na wekana e dua na yalewa ni Mitiani, e na mata i Mosese, e matadra talega nai soqosoqo taucoko ni Isireli, ni ra sa tagi tiko mai na katuba ni vale ni veitavaki. 7Ia ni sa raica ko Finiase na luve i Eliesa, na luve i Eroni na bete, sa tu cake maivei ira nai soqosoqo, a sa taura e dua na moto: 8ka muri koya na tamata ni Isireli ki na vale laca, a sa cokaveituituitaki rau, na tamata ni Isireli, kei na yalewa e na ketena. A sa mudu kina na mate levu vei ira na Isireli. 9Ia ko ira ka mate e na mate levu, era le rua na oba ka va na udolu.

10A sa vosa vei Mosese ko Jiova, ka kaya, 11Ko Finiase, na luve i Eliesa, na luve i Eroni na bete, sa muduka na noqu cudru vei ira na Isireli, ni sa gumatua ni totaki au ko koya e na kedra maliwa, ia ka'u a sega kina ni vakaoti ira na Isireli e na noqu vuvu. 12O koya mo kaya kina, Raica, ka'u sa cakava vua na vosa ni noqu veiyalayalati me kalougata; 13ia ena nona, kei na nona kawa talega na vosa ni yalayala me ra taura na cakacaka vakabete ka tawa mudu; ni sa gumatua ko koya me totaka na nona Kalou, ka ni sa sorovaki ira na Isireli. 14Ia na yacana na tamata ni Isireli ka vakamatei vata kei na yalewa ni Mitiani, ko Simiri, na luve i Salu, a turaga e na nodra mataqali turaga na Simioni. 15Ia na yaca ni yalewa ni Mitiani ka vakamatei ko Kosipi, na luve i Suri; a turaga ko koya vei ira na tamata eso, mai na dua na mataqali turaga mai Mitiani.

16A sa vosa vei Mosese ko Jiova, ka kaya, 17Mo vakararawataki ira na kai Mitiani, ka mo dou mokuti ira; 18ni ra sa vakararawataki kemudou e na nodra vere, era sa vereti kemudou kina e na vuku i Piori, kei na vuku i Kosipi, na luve ni dua na turaga ni Mitiani, na ganedra, ko koya ka vakamatei e na siga ni mate levu e na vuku i Piori.

Vakavakadewa Makawa

©1974 Bible Society of the South Pacific

More Info | Version Index