Search form

NA TIKO MAI NA LEKUTU 27

Eratou taroga na nodratou i votavota ni vanua ko iratou na yalewa na luve i Silofati, 1-4. Sa soli vei iratou, 5-11. Sa tukuna vei Mosese ko Jiova na nona mate, 12-14. A sa vakamamasu ko Mosese me dua na kenai sosomi, a sa lesi ko Josua, 15-23.

1Eratou sa qai lako mai ko iratou na yalewa na luve i Silofati, na luve i Eferi ka tagane, na luve i Kiliati ka tagane, na luve i Mekiri ka tagane, na luve i Manasa ka tagane, e na veimataqali i Manasa na luve i Josefa: ia oqo na yacadratou na luvena yalewa: o Mala, ko Noa, kei Okila, kei Milika, kei Tirisa. 2A ratou sa tu e na mata i Mosese, kei na mata i Eliesa na bete, kei na matadra na turaga kei ira nai soqosoqo taucoko, e na katuba ni vale ni veitavaki, ka ratou kaya, 3Sa mate na tama i keitou mai na vanua liwa, ka sega ni tiko vata kei ira era soqoni vata me vala kei Jiova e nai lawalawa i Kora; sa mate ga e na nonai valavala ca, ka sa sega na luvena tagane. 4Me bokoci laivi e na vuku ni cava na yaca ni tama i keitou mai na nona mataqali, ni sa sega na luvena tagane? Mo ni solia ga vei keitou nai votavota e na kedra maliwa na wekana na tama i keitou.

5A sa kauta na nodratou vosa ko Mosese me lewa ko Jiova. 6A sa vosa vei Mosese ko Jiova, ka kaya, 7Sa dodonu na nodratou vosa na goneyalewa na luve i Silofati: mo solia dina ga vei iratou e dua nai votavota me ratou taukena e na kedra maliwa na wekana na tamadratou; ia mo solia vei iratou nai votavota ni tamadratou. 8Ia mo vosa vei ira na Isireli, ka kaya, Kevaka sa mate e dua na tamata, ka sa sega na luvena tagane, dou qai solia na nonai votavota vua na luvena yalewa: 9ia kevaka sa sega na luvena yalewa, dou solia ga na nonai votavota vei ira na tuakana kei na tacina: 10ia kevaka sa sega na tuakana se na tacina, dou solia na nonai votavota vei ira na tamana lalai: 11ia kevaka sa sega na tamana lalai, dou solia na nonai votavota vua na wekana sa wekana dina e nona mataqali, me taukena ko koya: ia oqo sa kenai lesilesi vei ira na Isireli me ra lewa vakakina, me vaka ka vakarota vei Mosese ko Jiova.

12A sa kaya vei Mosese ko Jiova, Mo cabeta na ulu-ni-vanua oqo ko Aparimi, ka raica na vanua ka'u sa solia vei ira na Isireli: 13Ia ni ko sa raica oti, ko na qai toki talega vei ira na kai nomu, me vaka ka toki yani ko Eroni na tuakamu: 14ni drau a talaidredre ki na noqu vunau, mai na vanua liwa ko Sini, ni drau sa sega ni vakarokorokotaki au mai na wai e matadra nai soqosoqo, ni ra sa veileti: (ko ya na wai ko Meripa mai Ketesa e na vanua liwa ko Sini.)

15A sa vosa vei Jiova ko Mosese, ka kaya, 16Me lesia mada ko Jiova na Kalou ni yalodra na tamata kecega e dua na tamata me lewai ira nai soqosoqo, 17ka me lako voli e na kedra maliwa, me liutaki ira ko koya ni ra curu yani, ka liutaki ira ni ra sa curu mai; me ra kakua kina ni vaka na sipi sa sega na kedrai vakatawa ko ira nai soqosoqo i Jiova.

18A sa kaya vei Mosese ko Jiova, Mo kauti Josua na luve i Nuni, a tamata sa tiko vua na Yalo Tabu, ka tabaki koya e na ligamu; 19ka vakaturi koya e na mata i Eliesa na bete, kei na matadra nai soqosoqo taucoko; ka vakaroti koya e matadra. 20Ia mo lesi koya me vakataki iko e na ka eso, me ra talairawarawa kina nai soqosoqo taucoko ni Isireli. 21Ia me dau tu ko koya e na mata i Eliesa na bete, o koya ena taroga e na vukuna vaka na lewa ni Urimi e na mata i Jiova: era na curu yani e na nona vosa, ka curu mai e na nona vosa, ko koya kei ira kece vata kaya na Isireli, io nai soqosoqo taucoko.

22A sa kitaka ko Mosese me vaka ka vakarota vua ko Jiova: ka sa kauti Josua, ka vakatura e na mata i Eliesa na bete, kei na matadra nai soqosoqo taucoko: 23a sa tabaka e na ligana, a sa vakaroti koya, me vaka ka vakarota ko Jiova e na gusu i Mosese.

Vakavakadewa Makawa

©1974 Bible Society of the South Pacific

More Info | Version Index