Search form

NA TIKO MAI NA LEKUTU 28

Sa tukuni nai soro kecega sa lesi me caka tiko e na veisiga, 3-8; e na siga ni vakacecegu, 9,10; e na vula vou, 11-15; e na kana vata ni lako-sivia, 16-25; kei nai sevu ni vanua, 26-31.

1A sa vosa vei Mosese ko Jiova, ka kaya, 2Mo vakaroti ira na Isireli, ka kaya vei ira, Nai madrali vei au, na noqu kakana kei na veika sa vakacabori vei au e na bukawaqa, me ka boi vinaka vei au, dou nanuma mo dou vakacabora ga vei au e na kena gauna sa lokuci.

3Ia mo kaya vei ira, Oqo na ka sa vakacabori e na bukawaqa dou na vakacabora vei Jiova; e rua na lami sa yabaki yadua sa sega na kena ca, e na veisiga, mei soro kama sa ia tikoga. 4Mo vakacabora e dua na lami e na mataka, ka vakacabora na kenai karua ni lami e na yakavi; 5kei na omeri madrai droka vinaka mei madrali laukana, sa veiwaki vata kei na waiwai sa lauvutu e rua na paidi ka levu cake: 6nai soro kama sa ia tikoga, sa lesi mai na ulu-ni-vanua ko Saineai me ka boi vinaka, na ka sa vakacabori e na bukawaqa vei Jiova. 7Ia na kenai madrali liviraki e rua na paidi ka levu cake ki na lami e dua: mo liviraka e na tikina tabu na waini mei madrali liviraki vei Jiova. 8Ia na lami kadua mo vakacabora e na yakavi: mo vakacabora me vaka nai madrali laukana vakamataka, kei na kenai madrali liviraki, me ka sa vakacabori e na bukawaqa, na ka boi vinaka vei Jiova.

9Ia e na siga ni vakacecegu me rua na lami sa yabaki yadua sa sega na kena ca, ka rua na omeri madrai droka vinaka, sa veiwaki vata kei na waiwai, mei madrali laukana, kei na kenai madrali liviraki: 10oqo nai soro kama ni siga ni vakacecegu kecega, mei kuri ni soro kama sa ia tikoga, kei na kenai madrali liviraki.

11Ia e nai vakatekivu ni nomudou veivula dou na vakacabora nai soro kama vei Jiova; e rua na pulumokau sa gone, ka dua na sipi tagane, e vitu na lami sa yabaki yadua sa sega na kena ca; 12ka tolu na omeri madrai droka vinaka, sa veiwaki vata kei na waiwai, mei madrali laukana kei na pulumokau yadua; ka rua na omeri madrai droka vinaka, sa veiwaki vata kei na waiwai, mei madrali laukana kei na sipi tagane e dua; 13me yadua talega na omeri madrai droka vinaka, sa veiwaki vata kei na waiwai, mei madrali laukana kei na lami e dua; ko ya nai soro kama, me ka boi vinaka, me ka sa vakacabori e na bukawaqa vei Jiova. 14Ia na kedrai madrali liviraki me waini e lima na paidi ki na pulumokau, ka tolu na paidi ka levu cake ki na sipi tagane, ka rua na paidi ka levu cake ki na lami: oqo nai soro kama e na vula yadua, e na yabaki taucoko. 15Ka dua na luve ni me mei soro ni valavala ca me vakacabori vei Jiova, kei na kenai madrali liviraki, mei kuri ni soro kama sa ia tikoga.

16Ia e nai katinikava ni siga ni matai ni vula me caka na kana vata ni lako-sivia i Jiova. 17Ia e nai katinikalima ni siga ni vula oqo me ia na kana vata: me laukana e na siga e vitu na madrai sa sega ni vakalevenitaki. 18Me dua nai soqosoqo tabu e nai matai ni siga; dou kakua ni cakava kina e dua na cakacaka vakavuravura: 19ia dou vakacabora na ka e na bukawaqa, mei soro kama vei Jiova: e rua na pulumokau sa gone, ka dua na sipi tagane, ka vitu na lami sa yabaki yadua: me ra nomudou ka e sega na kena ca: 20ia na kedrai madrali laukana me madrai droka vinaka, sa veiwaki vata kei na waiwai: dou vakacabora vata e tolu na omeri kei na dua na pulumokau, ka rua na omeri kei na dua na sipi tagane; 21dou na vakacabora e dua na omeri kei na lami yadua vei ira na lami vituvitu: 22ka dua na me tagane me kenai soro ni valavala ca, me sorovaki kemudou kina. 23Dou vakacabora na veika oqo, mei kuri ni soro kama vakamataka, ko ya nai soro kama sa ia tikoga. 24Dou vakacabora vakaoqo e na veisiga, e na siga e vitu, na kakana vata kei na ka sa vakacabori e na bukawaqa, na ka boi vinaka vei Jiova: me vakacabori oqo kei na kenai madrali liviraki, mei kuri ni soro kama sa ia tikoga. 25Me dua talega na nomudou i soqosoqo tabu e nai kavitu ni siga; dou kakua ni cakava kina e dua na cakacaka vakavuravura.

26E na siga talega sa ia kina nai sevu, ni dou sa kauta e dua nai madrali laukana vou vei Jiova, ni sa oti na nomudou veiwiki, me dua na nomudou i soqosoqo tabu; dou kakua ni cakava kina e dua na cakacaka vakavuravura: 27ia dou vakacabora ga nai soro kama, me ka boi vinaka vei Jiova; e rua na pulumokau sa gone, e dua na sipi tagane, e vitu na lami, sa yabaki yadua; 28ia na kedrai madrali laukana me madrai droka vinaka, sa veiwaki vata kei na waiwai, e tolu na omeri kei na pulumokau e dua, e rua na omeri kei na sipi tagane e dua, 29me dua na omeri kei na lami yadua, vei ira na lami vituvitu, 30e dua na luve ni me, me sorovaki kemudou kina. 31Dou na vakacabora mei kuri ni soro kama sa ia tikoga, kei na kenai madrali laukana, kei na kedrai madrali liviraki (ka me ra nomudou ka e sega na kena ca).

Vakavakadewa Makawa

©1974 Bible Society of the South Pacific

More Info | Version Index