Search form

NA TIKO MAI NA LEKUTU 30

Me vakabau ga na bubului, 1,2. A bubului ni goneyalewa, 3-5. A bubului ni yalewa sa vakawati, 6-8. A bubului ni yada, 9-16.

1A sa vosa ko Mosese vei ira na turaga ni nodra veimataqali na Isireli, ka kaya, Sa vakaoqo na ka sa vakarota ko Jiova: 2Kevaka sa yalayala vei Jiova e dua na tamata, se bubului me vauci kina na yalona; me kakua ni lasutaka na nona vosa; me vakayacora na ka kecega sa cavuta na gusuna.

3Ia kevaka sa yalayala vei Jiova e dua na yalewa, ka vauci koya kina ni sa goneyalewa, ka sa tiko e na vale i tamana; 4a sa rogoca na nona yalayala ko tamana, kei na nonai vau sa vauca kina na yalona, a sa galu kina vei koya ko tamana: me qai dei ga na nona yalayala kecega, ka na dei talega nai vau kecega sa vauca kina na yalona. 5Ia kevaka sa vakadaroya ko tamana e na siga sa rogoca kina; ena qai sega ni dei e dua na nona bubului, se nonai vau sa vauca kina na yalona: ena sega talega ni cudruvi koya kina ko Jiova, ni sa vakadaroya ko tamana.

6Ia kevaka sa vakawati dina, ni sa yalayala ko koya, se ni sa cavuta vakailoa e dua na ka na gusuna me vauca kina na yalona; 7a sa rogoca na watina, ka galu kina vei koya e na siga sa rogoca: ena qai dei na nona yalayala, ka dei na nonai vau sa vauca kina na yalona. 8Ia kevaka sa vakadaroya na watina e na siga sa rogoca kina; sa na qai vakatawayagataka ko koya na nona yalayala, kei na ka sa cavuta vakailoa na gusuna me vauca kina na yalona: ena sega talega ni cudruvi koya kina ko Jiova.

9Ia na nona yalayala kecega na yada, kei koya sa veibiu kei na watina, sa vauca kina na yalona, ena dei ga vua.

10Ia kevaka sa yalayala e na vale ni watina, se sa vauca na yalona e nai vau ni sa bubului; 11a sa rogoca na watina, ka galu kina vei koya, ka sega ni vakadaroya: ena qai dei ga na nona yalayala kecega, ka dei talega nai vau kecega sa vauca kina na yalona. 12Ia kevaka sa vakadaroya sara na watina e na siga sa rogoca kina; ena qai sega ni dei na ka kecega sa cavuta na gusuna e na vuku ni nona yalayala, se na ka sa vauca kina na yalona: sa vakadaroya ga na watina; ena sega talega ni cudruvi koya kina ko Jiova. 13A yalayala kecega, kei na bubului kecega sa vauci kina me vakamalumalumutaka na yalona, ena vakataudeitaka na watina, se na vakadaroya na watina. 14Ia kevaka sa galu sara kina na watina e na veisiga; sa qai vakataudeitaka ko koya na nona yalayala kecega, kei na nonai vau kecega sa tu vua: sa vakataudeitaka ko koya, ni sa galu vua e na siga ka rogoca. 15Ia kevaka sa rogoca mada ka sa vakadaroya sara emuri; ena qai cudruvi ko koya e na vuku ni nona cala na yalewa.

16Oqo nai lesilesi sa vakarota vei Mosese ko Jiova, e na vuku ni tagane kei na watina, e na vuku talega ni tamata kei na luvena yalewa ni sa goneyalewa e na vale i tamana.

Vakavakadewa Makawa

©1974 Bible Society of the South Pacific

More Info | Version Index