Search form

NA TIKO MAI NA LEKUTU 31

Sa moku ko ira na kai Mitiani, a sa vakamatei vata kei ira ko Pelami, 1-12. Sa cudru ko Mosese ni sa vakabulai ko ira na yalewa, 13-18. Ai valavala ni nodra veivakasavasavataki ko ira na tamata, kei nai toki, 21-24. Era vota nai toki, 25-47. Ai madrali vua na Kalou, 48-54.

1A sa vosa vei Mosese ko Jiova, ka kaya, 2Mo cudruvaki ira na Isireli vei ira na kai Mitiani: sa oti, ko na qai toki yani vei ira na kai nomu.

3A sa vosa vei ira na tamata ko Mosese, ka kaya, Me so vei kemudou me vakaiyaragi ki nai valu, me ra laki veivala kei ira na kai Mitiani, me vakayacora na cudru i Jiova vei ira na kai Mitiani: 4me dua na udolu mai na veimataqali yadua, e na veimataqali kecega ni Isireli, mo dou tala ki nai valu. 5A sa le tinikarua na udolu sa vakaiyaragi ki nai valu, sa tawase maivei ira na veiudolu ni Isireli, sa dua na udolu mai na mataqali yadua. 6A sa talai ira ki nai valu ko Mosese, sa dua na udolu e na mataqali yadua, ko ira vata kei Finiase na luve i Eliesa na bete, ki nai valu, kei nai yaya tabu, kei na davui e na ligana me uvuca. 7A ra ia nai valu vei ira na kai Mitiani, me vaka na vosa i Jiova vei Mosese; a ra sa vakamatei ira kecega na tagane. 8Ia ko iratou talega na tui ni Mitiani, eratou sa moku vata kei ira sa moku; io ko Ivi, kei Rekemi, kei Suri, kei Uri, kei Repa, e le lima na tui ni Mitiani: ko Pelami talega na luve i Piori, era sa vakamatea e nai seleiwau. 9Ia era sa vakabobulataki ira na yalewa ni Mitiani ko ira na Isireli kei na nodra lalai, ka ra sa tokitaka na nodra pulumokau kecega, kei na nodra manumanu kecega, kei na nodra i yau kecega. 10A ra sa vakama na nodra veikoro kecega era tiko kina, kei na nodra vale kecega ni valu. 11A ra sa taura nai yau kecega, kei na ka kecega era tokitaka, na tamata kei na manumanu. 12A ra sa kauti ira na bobula, kei na ka era sa tokitaka, kei nai yau, kivei Mosese, kei Eliesa na bete, ki vei ira nai soqosoqo ni Isireli, ki nai tikotiko e na vanua cecelevu mai Moapi, sa voleka ki na Joritani, ka donui Jeriko.

13A ra sa lako yani ki nai bili ni tikotiko, me tavaki ira, ko Mosese, kei Eliesa na bete, kei na turaga kecega ni soqosoqo. 14A sa cudru ko Mosese vei ira na turaga ni valu, era turaga ni yaudolu, ka turaga ni yadrau, era sa lako mai nai valu: 15A sa kaya vei ira ko Mosese, Dou sa vakabulai ira kecega li na yalewa? 16Raica, ko ira oqo, e na vosa i Pelami, era sa vakavuna na nodra i valavala ca vei Jiova ko ira na Isireli e na vuku i Piori, ka sa dua kina na mate levu vei ira nai soqosoqo i Jiova: 17Ia oqo, mo dou vakamatea kecega na gonetagane vei ira na lalai, ka vakamatea na yalewa kecega era veiyacovi kei na tagane: 18Ia na goneyalewa kecega, era sa sega ni veiyacovi kei na tagane, dou vakabula me nomudou. 19Ia dou tiko ga e nai bili ni tikotiko, ka bogi vitu: ko ira kecega era sa vakamatea e dua, kei ira kecega sa tara e dua sa moku, dou vakasavasavataki kemudou kei na nomudou bobula, e nai katolu ni siga, kei nai kavitu ni siga: 20Ka vakasavasavataka nai sulu kecega, kei na ka kecega sa caka e na kuli ni manumanu, kei na ka kecega sa caka e na vutika ni me, kei na ka kecega sa caka e na kau.

21A sa kaya ko Eliesa na bete vei ira na tamata i valu era lako ki nai valu, Oqo na ka sa lesi e na vunau sa vakarota ko Jiova vei Mosese: 22A koula ga, kei na siliva, na parasa, na aironi, na tine, kei na uma, 23a ka kecega sa sega ni yavu e na bukawaqa, dou biuta ga ki loma ni bukawaqa, ena qai savasava: ia me vakasavasavataki ga ena wai sa savai koya sa tawase: ia na ka kecega sa yavu rawa e na bukawaqa dou biuta ki loma ni wai. 24Ia mo dou savata na nomudou i sulu e nai kavitu ni siga, dou na qai savasava, ia dou na qai lako mai ki nai tikotiko.

25A sa vosa vei Mosese ko Jiova, ka kaya, 26Mo okata na veika e nai toki sa tokitaki, na tamata kei na manumanu, koi kemudou, kei Eliesa na bete, kei ira sa turaga qase vei ira nai soqosoqo: 27ia mo wasea rua nai toki; me dua na nodra wase era a bolea nai valu, ka lako ki nai valu, ka dua na nodra wase nai soqosoqo kecega: 28ka lesia nai vakacavacava me nei Jiova, me nodra i tavi na tamata i valu ka lako ki nai valu: me dua mai vei ira na le lima na drau, na tamata, kei na pulumokau, kei na asa, kei na sipi: 29mo dou taura mai na kena wase sa nodra, ka solia vei Eliesa na bete, mei madrali e lavelaveti vei Jiova. 30Ia mai na wase sa nodra na Isireli, mo kauta e dua mai vei ira na le limasagavulu, mai vei ira na tamata, mai na pulumokau, mai na asa, kei na qele ni sipi, mai na mataqali manumanu kecega, ka solia vei ira na Livai, era sa qarava na cakacaka ni vale i Jiova. 31A rau sa kitaka ko Mosese kei Eliesa na bete, me vaka ka vakaroti Mosese ko Jiova.

32Ia nai toki ni valu sa vo mai nai toki era a rawata ko ira na tamata i valu, sa onosagavulu ka vitu na oba ka lima na udolu na sipi, 33ka vitu na oba ka rua na udolu na pulumokau, 34ka ono na oba ka dua na udolu na asa, 35ka sa le tolu na oba ka rua na udolu era yalewa kecega sa sega ni veiyacovi kei na tagane.

36Ia na kena wase, sa nodra i votavota era lako ki nai valu, sa kenai wiliwili e tolusagavulu ka tolu na oba ka vitu na udolu ka lima na drau na sipi: 37ia nai vakacavacava ni sipi vei Jiova sa ono na drau ka vitusagavulu ka lima. 38Ia na pulumokau sa tolu na oba ka ono na udolu; a sa vitusagavulu ka rua kina nai vakacavacava vei Jiova. 39Ia na asa sa tolu na oba ka lima na drau; a sa onosagavulu ka dua kina nai vakacavacava vei Jiova. 40Ia na tamata era le dua na oba ka ono na udolu; a sa le tolusagavulu ka rua kina na tamata nai vakacavacava vei Jiova. 41Ia nai vakacavacava, ko ya nai soro e lavelaveti vei Jiova, sa solia ko Mosese vei Eliesa na bete, me vaka ka vakaroti Mosese ko Jiova.

42Ia mai na kena wase sa nodra na Isireli, ka wasea ko Mosese maivei ira na tamata ka ia nai valu, (43ia na kena wase sa nodra nai soqosoqo sa tolusagavulu ka tolu na oba ka vitu na udolu ka lima na drau na sipi, 44ka tolusagavulu ka ono na udolu na pulumokau, 45ka tolu na oba ka lima na drau na asa, 46ka le dua na oba ka ono na udolu na tamata;) 47io mai na kena wase sa nodra na Isireli, sa taura ko Mosese e dua mai na limasagavulu yadua, na tamata kei na manumanu, ka solia vei ira na Livai, era sa qarava na cakacaka ni vale i Jiova, me vaka ka vakaroti Mosese ko Jiova.

48Ia ko ira na turaga era lewa na le udolu ni valu ko ira na turaga ni yayaudolu, kei ira na turaga ni yayadrau, era sa lako mai kivei Mosese: 49a ra sa kaya vei Mosese, Koi keitou na nomu tamata, keitou sa wiliki ira oti na tamata i valu keitou sa lesi me lewa, ka sa sega ni yali e dua vei keimami: 50ia keitou sa kauta mai nai madrali vei Jiova, e na ka kecega sa rawata na tamata yadua, nai yaya koula, na sinucodo, kei na qato, na mama, na sau ni daliga, kei nai taube, me sorovaki keimami kina e mata i Jiova. 51A sa taura maivei ira ko Mosese kei Eliesa na bete na koula, o koya kece sa caka mei ukuuku. 52Ia na koula kecega sai madrali, era vakacabora vei Jiova ko ira na turaga ni yayaudolu, kei ira na turaga ni yayadrau, sa dua na oba ka ono na udolu ka vitu na drau ka limasagavulu na sikeli. 53(Ko ira na tamata i valu yadua era sa taura nai toki eso me nona). 54A rau sa taura ko Mosese kei Eliesa na bete na koula maivei ira na turaga ni yayaudolu kei ira na turaga ni yayadrau, ka kauta ki loma ni vale ni veitavaki. Me kenai vakananumi e na vukudra na Isireli e na mata i Jiova.

Vakavakadewa Makawa

©1974 Bible Society of the South Pacific

More Info | Version Index