Search form

NA TIKO MAI NA LEKUTU 32

O ira na Rupeni kei na Kata era taroga na vanua era tiko kina me nodra, 1-5. Sa vunauci ira ko Mosese, 6-15. Era kaya me ra vukei ira ga na wekadra e nodra i valu, 16-19. Sa qai solia vei ira na vanua ko ya ko Mosese, 20-38. Era sa ia nai valu, ka rawata kina na vanua, 39-42.

1Ia ko ira na Rupeni kei na Kata, sa ka levu sara na nodra manumanu e yavai va: a ra sa raica na vanua ko Jaseri, kei na vanua ko Kiliati, ka raica, sa vanua dina ni manumanu e yavai va na vanua ko ya; 2ia era sa lako mai na Kata kei na Rupeni, ka vosa vei Mosese kei Eliesa na bete, kei ira na turaga ni soqosoqo, ka kaya, 3Ko Ataroci, kei Taiponi, kei Jaseri, kei Nimira, kei Esiponi, kei Elale, kei Sipami, kei Nipo, kei Pioni, 4na vanua ka vakamalumalumutaka ko Jiova e na mata ni soqosoqo ni Isireli, sa vanua dina ni manumanu e yavai va, ka sa vakamanumanu koi keimami na nomuni tamata: 5Era sa kaya talega, Kevaka kemuni sa lomani keimami, me soli mada na vanua oqo vei keimami na nomuni tamata mei votavota; mo ni kakua ni kauti keimami ki na tai kadua ni Joritani.

6A sa kaya ko Mosese vei ira na Kata kei na Rupeni, Me ra lako li ki nai valu na wekamuni, ka mo ni tiko ga eke koi kemuni? 7Ia ka cava kemuni sa vakayalolailaitaki ira kina na Isireli me ra kakua kina ni lako yani ki na vanua sa solia vei ira ko Jiova? 8Eratou a kitaka vakaoqo ko ira na nomuni qase, ni'u a talai iratou mai Ketesa-parinea me raica na vanua. 9Ia ni ratou lako cake ki na buca ko Esikoli, ka raica na vanua, eratou sa qai vakayalolailaitaki ira na Isireli, me ra kakua ni lako ki na vanua sa solia vei ira ko Jiova. 10A sa waqa na cudru i Jiova e na gauna ko ya, a sa bubului ko koya, ka kaya, 11O ira na tamata sa lako cake mai Ijipita, sa ruasagavulu na nodra yabaki ka toro cake era na sega sara ni raica na vanua ka'u a bubului kina vei Eparaama, vei Aisake, kei Jekope; ni ra sa sega ni muri au tikoga: 12ia koi rau ga ko Kelepi na luve i Jifune na Kenisaiti, kei Josua na luve i Nuni; ni rau sa muri Jiova tikoga. 13A sa waqa mai na cudru i Jiova vei ira na Isireli, a sa lewa vei ira me ra veilakoyaki voli e na vanua liwa ka yabaki vasagavulu, ka me oti mada kece nai tabatamata ko ya ka caka ca e na mata i Jiova. 14Ka raica, kemuni sa tubu cake me kedrai sosomi na nomuni qase, na kawa ni tamata ca, me vakalevutaka tiko na cudru katakata i Jiova kivei ira na Isireli. 15Kevaka kemuni sa vuki tani mo ni kakua ni muri koya, ena laivi ira tale ko koya e na vanua liwa; ia kemuni na vakawabokotaki ira kece talega na tamata oqo.

16A ra sa toro mai vua, ka kaya, Keimami na tara eke eso na bai ni sipi ni neimami manumanu e yavai va, ka so na nodra koro na neimami lalai: 17ia koi keimami, keimami na vakaiyaragi tu, ka liutaki ira na Isireli, ka me keimami kauti ira mada ki na nodra yasana: a ra na tiko ga na neimami lalai e na veikoro sa vakabai, e na vuku ni lewe ni vanua oqo. 18Keimami na sega ni lesu ki na neimami veivale, ka me ra taukena mada na Isireli na tamata yadua na nonai votavota. 19Ni keimami na sega ni taukei vata kei ira, mai tai kadua ni Joritani, se ki liu, ni sa lutu vei keimami na neimami votavota e na tai oqo ni Joritani vaka ki na vanua ki na tu-i-cake.

20A sa kaya vei ira ko Mosese, Kevaka kemuni na kitaka na ka oqo, kevaka kemuni na lako vakaiyaragi e na mata i Jiova ki nai valu, 21ka lako kecega ki tai kadua ni Joritani e na mata i Jiova, ka sa vakaiyaragi tu, ka me vakasava tani mada ko koya na nona meca e matana, 22a sa vakamalumalumutaki na vanua e na mata i Jiova: kemuni na qai lesu, ia kemuni na sega ni cala vei Jiova, kei ira na Isireli; ia ena nomuni votavota na vanua oqo e na mata i Jiova. 23Ia kevaka kemuni na sega ni kitaka vakakina, raica, kemuni sa na cala vei Jiova: ia mo ni kila ena talevi kemuni tale na nomuni cala. 24Ni tara eso na nodra koro na nomuni lalai, ka so na bai ni nomuni sipi; ka cakava na ka kemuni sa vosa oti kina.

25A ra sa vosa vei Mosese na Kata kei na Rupeni, ka kaya, Koi keimami na nomuni tamata keimami na cakava ga na ka ko ni sa vakarota na turaga. 26Ko ira na neimami lalai, kei na wati i keimami, na neimami qele ni sipi, kei na neimami manumanu e yavai va kecega, era na tiko mai na veikoro mai Kiliati: 27ia koi keimami na nomuni tamata keimami na lako ki tai kadua e na mata i Jiova, ka na vakaiyaragi na tamata yadua ki nai valu, me vaka ko ni sa kaya na turaga.

28Ia sa vakarota e na vukudra ko Mosese vei Eliesa na bete, kei Josua na luve i Nuni, kei ira sa turaga qase vei ira na nodra veimataqali na Isireli: 29a sa kaya vei ira ko Mosese, Kevaka era na lako vata kei kemuni ki tai kadua ni Joritani ko ira na Kata kei na Rupeni, ka ra vakaiyaragi ki nai valu na tamata kecega, e na mata i Jiova, ka sa vakamalumalumutaki vei kemuni na vanua; kemuni na qai solia vei ira na vanua ko Kiliati me nodra i votavota: 30ia kevaka era na sega ni lako vata kei kemuni ki tai kadua, ka vakaiyaragi, me ra qai votai kei kemuni mai na vanua ko Kenani. 31A ra sa vosa na Kata kei na Rupeni, ka kaya, Me vaka na ka sa kaya ko Jiova vei keimami na nomuni tamata, keimami na kitaka vakakina: 32keimami na lako ki tai kadua, ki na vanua ko Kenani, ka vakaiyaragi, e na mata i Jiova, me keimami taukena kina na neimami votavota e na tai oqo ni Joritani.

33A sa solia ko Mosese vei ira, io vei ira na Kata, kei ira na Rupeni, kei ira e dua na kena wase ni mataqali i Manasa na luve i Josefa, na matanitu i Sioni na tui ni Amoraiti, kei na matanitu i Oki na tui Pasani, na vanua, kei na kena veikoro e na kenai yalayala, io na veikoro ni vanua taucoko.

34Ia na Kata era tarai Taiponi, kei Ataroci, kei Aroeri, 35kei Atiroci, ko Sofani, kei Jaseri, kei Jokipa, 36kei Peci-nimira, kei Peci-arani, na veikoro sa vakabai: ka so talega na bai ni sipi.

37Ia na Rupeni era tarai Esiponi, kei Elale, kei Kiri-aceimi, 38kei Nipo, kei Peali-mioni (sa dua tani mai na yacadra), kei Sipima: ka ra vakayacana vou na veikoro era tara.

39A ra sa lako ki Kiliati ko ira na luve i Mekiri na luve i Manasa, ka kaba, ka vakasavi ira tani na Amoraiti era tiko kina. 40A sa soli Kiliati ko Mosese kivei Mekiri na luve i Manasa; a sa tiko kina ko koya. 41A sa lako ko Jairi na luve i Manasa, ka kaba na kena veikoro lalai ka vakatoka, Na veikoro i Jairi. 42A sa lako ko Nopa ka kabai Kinaci, kei na kena veikoro lalai, ka vakayacana ga vua, ko Nopa.

Vakavakadewa Makawa

©1974 Bible Society of the South Pacific

More Info | Version Index